Ézékiel

17 Yéhôva a kônde pôdôs me, a kal le: 2 “A man mut, añle bon ba Israel bipôdôl bi bi nlet i nok* wengoñle u nkéne bo ngén.+ 3 Kal bo le: ‘Lana nyen Nwet Bayemlikok le Yéhôva a nkal: “Nyôgôl nkeñi+ u u gwé bipapai bikeñi, u ban-ga mimbôñgô mi tjimba, nyuu yé yosôna i ban-ga ki ngandak biléé bi bi gwé minsonol, u* bi lôl i Libañ,+ u ket bisosoñ bi bi yé i manjoñ ma e sidar.+ 4 Mukété bisosoñ bi, nyôgôl u pat sosoñ i i nlôôha ba i ngii, u kena yo nyoo i loñ i bôt ba nyuñga,* u bii ki yo i tison i bôt ba nyuñga.+ 5 I mbus, nyôgôl u yoñ ndék mbôô mu loñ,+ u nwes yo mu ’isi hi hi nha bijek ngandak. U bel yo le i nañ kiki e* i i yé bebee ni ngandak malép. 6 Ha nyen i mbôô i, i bi o, i yila nkôô wai+ u u ñandal mu ’isi. Tjai tjé di bé nañ i ngii, minkañ nwé mi jôbôk ’isi. Hala nyen i* bi yila nkôô wai u u nti bisem, i ban-ga mintjep.+

7 “‘“I mbus, nyôgôl nkeñi+ umpe u lo, u ban-ga bipapai bikeñi ni tjimba dikeñi.+ Nyoo i homa nyôgôl u bééne nyen nkôô wai unu u bi boñ le minkañ nwé mi yon homa nyensôna, haa ni dikuu i het ba bi bel wo. I nkôô wai u, u kahal sambal tjai tjé i pes nyôgôl u bééne, inyu boñ le nyôgôl u kôp wo malép.+ 8 Ki le ba bi bel nkôô wai ikété loñge wom, bebee ni ngandak malép inyu boñ le u bana ngandak mintjep, u num matam, u yila ki loñge nkôô wai.”’+

9 “U ga kal le: ‘Lana nyen Nwet Bayemlikok le Yéhôva a nkal: “Baa i nkôô wai u, u ga nañ? Baa mut a ga nup bé minkañ+ nwé, a boñ ki le matam mé ma bol, ni le bisosoñ gwé bi kôt?+ I nkôô wai u, u ga kôt ngandak kayéle i ga béda bé woo u ngui, to ngandak bôt inyu nup wo. 10 To hala kiki i nkôô wai unu u bi tiimba béla, baa u ga nañ? I ngéda mbebi i nlôl i pes likôl i ga hôñ, baa i ga boñ bé le u kôt, kôt yosôna? I nkôô wai u, u ga kôt yaga mu dikuu i het u bi néñél.”’”

11 Yéhôva a pôdôs ki me, a kal le: 12 “Soho, kal litén li bôt ba ndok le: ‘Baa ni nok bé kii i mam mana ma nkobla?’ Kal bo le: ‘Emblana ki! Kiñe Babilôn i bi lo i Yérusalem, i yoñ kiñe ni baane bé, i témb ni bo i Babilôn.+ 13 Handugi hala, a yoñ mut wada mu lihaa* li kiñe,+ a boñ malômbla ni nye, a nyégsa nye i kum soñ i bisu gwé.+ I mbus, a kena yak bañga bôt i loñ,+ 14 le ndi ane i suhlana, i tiimba ha bañ bana ngui, inyu boñ le i nom ndigi ibale bôt ba litén ba ntééda malômbla.+ 15 Ndi kiñe Yuda* i bi sôk i ndogbene kiñe Babilôn,*+ i om balegelnwin i Égiptô le a ti nye bihosi+ ni ntôñ gwét nkeñi.+ Baa a ga pamba? I mut a mboñ i mam ma, baa a ga pei kogse? Baa a yé le a bôk malômbla, ndi to hala a pei?’+

16 “‘Lana nyen Nwet Bayemlikok le Yéhôva a mpot: “Me nkum soñ ni niñ yem le a ga wél i Babilôn, i het kiñe* i i bi téé nye* kiñe i yiine, inyule a bi yan i soñ a bi kum i bisu gwé, a bôk ki malômbla a bi boñ ni nye.+ 17 I ngéda bôt ba gwét ba Babilôn ba ga bédés mangund ma biték, ba oñ ki mapénd inyu kéña tison ni i tjé ngandak bôt; ntôñ gwét nkeñi ni ngandak bôt ba gwét ba Faraô ba ga la bé hôla nye mu gwét bi.+ 18 A bi yan i soñ a bi kum, a bôk ki malômbla a bi boñ. A bi boñ i mam mana momasôna, ki le a bi boñ mbônga;* jon a ga pei bé.’”

19 “‘Lana nyen Nwet Bayemlikok le Yéhôva a nkal: “Me nkum soñ ni niñ yem le, m’a boñ le maboñok mé ma timbil nye inyule a bi yan i soñ a bi kum+ i jôl jem, a bôk ki malômbla a bi boñ i bisu gwem. 20 M’a leñ pése yem i ngii yé, ñ, a ga gwéla mu pése+ yem. M’a kena nye i Babilôn, nyoo nyen m’a pémhene nye mbagi nôgôs inyule a bi téñbe bé ni me.+ 21 Bôt bé ba gwét bobasôna ba ba ga so b’a nôla ni pansoñ, yak ba bobasôna ba ga pei ba ga tjama bipes gwobisôna.*+ Ha nyen n’a yi le me Yéhôva men me bi pot.”’+

22 “‘Lana nyen Nwet Bayemlikok le Yéhôva a nkal: “M’a ket sosoñ mu manjoñ ma soso e sidar,+ me bel yo; ñ, mukété bisosoñ bi yé mu manjoñ ma e sidar nyen m’a pat sosoñ i ntomb,+ i i nlôôha ba i ngii, memede me bel yo inyu kena yo i hikôa hikeñi, hi bak hi nyôgi.+ 23 M’a bel yo mu ngii hikôa hi nyôgi hi Israel. Mintjep nwé mi ga nañ, e i num ki matam, i yila soso e sidar. Mintén mi dinuni nwominsôna mi ga yééne isi yé, mi solbene ki isi yiye i tjai tjé. 24 Ha nyen yak bie gwobisôna bi bikai bi ga yi le me Yéhôva, me bi suhus e i i bé i nyôgi, me bédés e i i bé isi;+ me bi boñ le e i i bé yômi i kôt, me boñ ki le nkôt e u ti bisem.+ Me Yéhôva, men me bi pot, me boñ ki hala.”’”