Yôsua

4 Ndik kiki loñ yosôna i bi mal yap Yordan, Yéhôva a kal Yôsua le: 2 “Yoñ 12 bôlôm mu litén,+ hiki litén munlôm wada, 3 ti bo i oda ini: ‘Yoña 12 ngok mu ñemkété u Yordan, i homa biprisi bi bi téé makôô map,+ ni kena yo, ni bii yo i homa ni ga tégbaha u.’”+

4 Jon Yôsua a bi sébél 12 bôlôm, ba a bi bôk a tep ikété bon ba Israel, hiki litén munlôm wada, 5 ndi Yôsua a kal bo le: “Kena i ñemkété lom Yordan, i bisu bi nkuu Malômbla u Yéhôva Nyambe nan, hiki wada nan a begee ngok yada i tuu yé, inyu boñ le nsoñgi u ngok u ba nlélém ni nsoñgi u matén ma bon ba Israel, 6 i ngok ini i ga hôñlaha* bé i yom Nyambe a bi boñ. I mbus ngéda, ibale bon* banan ba mbat bé le: ‘Inyuki i ngok+ ini i yé hana?’ 7 Ni ga timbhe bo le: ‘Inyule malép ma Yordan ma bi telep i bisu bi nkuu+ Malômbla u Yéhôva. I ngéda Nkuu u bi yap Yordan, malép ma bi telep. I ngok ini i ga hôñlaha* bon ba Israel+ i jam li inyu ntandaa ngéda.’”

8 Bon ba Israel ba boñ mam momasôna Yôsua a bi kal bo. Ba yoñ 12 ngok mu ñemkété u Yordan, kiki Yéhôva a bi kal Yôsua, inyu boñ le nsoñgi u ngok u ba nlélém ni nsoñgi u matén ma bon ba Israel. Ba yoñ yo, ba kena yo i homa ba bé lama tégbaha u.

9 Yak Yôsua a yoñ 12 ngok, a téé yo mu ñemkété u Yordan, i homa biprisi bi bi mbegee Nkuu bi bi téé makôô map.+ Yak i len ini, i ngok i, i ngi yii ha.

10 I biprisi bi bé bi bééga Nkuu bi bi telep i ñemkété u Yordan letee bon ba Israel ba mal boñ mam momasôna Yéhôva a bi ti Yôsua oda le a kal litén. I nlélém ngéda, litén li bé pala yap. 11 Ndik kiki litén li mal yap, yak biprisi bi yap ni Nkuu u Yéhôva, bôt ba litén+ ba tehge. 12 Lôk Ruben, Lôk Gad ni pes litén i Manasé, ba bi yap i bisu bi bana bon ba Israel bape, ba bak ntjegek kiki mintôñ mi gwét,+ kiki Môsi a bi ti bo oda.+ 13 Jam kiki bo 40 000 ma bisônda bi bi bé nkôôbaga i jo gwét, bi bi yap i bisu bi Yéhôva, bi kenek i ñoñ u u nkéña Yérikô.

14 I kel i, Yéhôva a bi bédés Yôsua i bisu bi litén li Israel+ jolisôna; bon ba Israel ba bi ti Yôsua lipém* mu dilo tjé di niñ tjodisôna, nlélém kiki ba bi ti Môsi+ lipém.

15 Yéhôva a kal Yôsua le: 16 “Kal biprisi bi bi bééga nkuu+ Mbôgi* le bi pam mu Yordan.” 17 Jon Yôsua a bi ti biprisi oda, a kal bo le: “Pama mu Yordan.” 18 I ngéda biprisi bi bi bé bi bééga nkuu+ malômba u Yéhôva, bi bi nyodi i ñemkété u Yordan, bi bii ki mabal map i nnumuk ’isi, ha nyen malép ma Yordan ma bi témb ma kahal kuli, ma hôl kayéle ma hô mabôñ+ mé kiki ngéda bisu.

19 Litén li bi yap Yordan i hilo hi nyônôs jôm hi sôñ bisu, li yééne ki i Gilgal+ i pes likôl i Yérikô.

20 Yôsua a yoñ 12 ngok i i bi yôña i Yordan, a téé yo i Gilgal.+ 21 I mbus, Yôsua a kal bon ba Israel le: “I ngéda bon banan ba ga bat bé i dilo di nlo le: ‘I ngok ini i nkobla le kii?’+ 22 Ha nyen ni ga toñle bo le: ‘Israel a bi yap Yordan i nnumuk ’isi+ 23 i ngéda Yéhôva Nyambe nan a bi boñ le malép ma Yordan ma sa i bisu gwap letee ba mal yap Yordan, nlélém kiki Yéhôva Nyambe nan a bi boñ i tuye Nkôibaga, i ngéda a bi boñ le tuye a sa i bisu gwés letee di mal yap.+ 24 A bi boñ hala le ndi matén momasôna ma nkoñ ’isi ma yi le woo u Yéhôva u gwé ngui+ ngandak, a bi boñ ki hala le ndi ni kon Yéhôva Nyambe nan woñi ngéda yosôna.’”