Hiôb
4 Njee a nla boñ le mut nyega a gwal mut a mpôp?+
To mut!
5 Ibale dilo tjé di niñ di mal tééba,
wee yak nsoñgi u sôñ yé u yé i moo moñ;
u mal ki tééne nye minwaa a nla bé lela.+
6 Waa nun nye, le ndi a hép to ndék,
letee a mal hilo hié hi bôlô kiki mut bôlô nu a nkôhna nsaa.+
7 Inyule yak e i gwé botñem.
Ibale ba nkit yo, i ga témb i too,
yak bipom gwé bi ga kônde nañ.
8 Ibale nkañ wé u ñun ikété ’isi,
ibale yak kumul yé i nwo ikété biték,
9 i ngéda i nôgda malép,* i ga témb i too;
i pémés ki mintjep kiki bebela i ntip o.
10 Ndi mut binam a nwo, a yégle a niñi ha, ngi ngui yo ki yo;
i ngéda mut binam a nii nhébék, a nke hee?+
11 Malép ma tuye ma nyoi,
yak lom a nsa, a num ki kweñ.
12 Hala nyen yak mut binam a nañal, a ntelep ha bé.+
Ntel wonsôna ngii i ga ba, a’ tôde bé,
b’a tôdôl bé to nye ’ilo.+
13 Éé, ibale u bak to le u sôô me ikété Soñ,*+
u tééda me bisôsôli letee hiun hioñ hi tagbe,
u tééne ki me ngim ngéda inyu bigda me!+
14 Ibale mut binam a nwo, baa a nla ki niñ?+
M’a bem mu dilo tjodisôna me nson njonok,
letee kobla yem i lo.+
15 U ga sébél, me neebe we.+
U ga nyamnda ni ngôñ* i tiimba tehe nson u moo moñ.
16 Ndi nano, u nwan hiki jam me mboñ;*
u mbéñge ndik béba yem.
17 Litjañg jem li yé nsudge ikété bot,
u mband ki hihôha hiem ni hitjo.*
18 Kiki hikôa hi nkwo, hi kuubaga,
kiki yak liaa li nyodi i homa wé,
19 kiki malép ma nje ngok,
kiki yak kundul malép i nkulna biték,
hala nyen u ntjé botñem i mut binam.
20 Hala nyen u nwaa bé tét nye letee a tjiba;+
u nhéñha nyuu yé, u timbis ki nye i Soñ.