Amôs
8 I jam lini jon Yéhôva Nwet Bayemlikok a bi unda me: nuna-ki! Me bi tehe sel i bééna matam ma ngéda sép. 2 A bat me le: “Kii u yé tehe, a Amôs?” Me timbhe le: “Sel i i gwé matam ma ngéda sép.” Ha nyen Yéhôva a bi kal me le: “Lisuk li mal lo inyu litén jem Israel. Me ga nwéhél ha bé me bo.+ 3 ‘Tjémbi di témpel di ga yila maéya i kel i,’+ hala nyen Yéhôva Nwet Bayemlikok a mpot. ‘Mim mi ga ba ngandak hiki homa.+ Homa nyensôna a ga ba nwee!’
4 Emblana i jam lini, a bé ba ni ntééñga diyeyeba
ni ntjé ki bôt ba suhulnyuu ba loñ,+
5 Ni nkal ki le: ‘Imbe ngéda ngand i sôñ mondo* i mal,+ inyu boñ le di nuñul bijek* gwés,
yak sabat,+ inyu boñ le di bii bijek gwés i nyuñga?
Inyu boñ le di kônde siibaha éfa*
ndi di kéñbaha sékel,*
di héñha kilô inyu lôk bôt;+
6 le ndi di somb hiyeyeba ni silba
di somb mut a nyend ni ndamba bitamb,+
di nuñle ki bo bijek bi bi ñôbi.’
7 Yéhôva a nkum soñ ni Lipém li Yakôb le:+
‘Maboñok map momasôna, m’a hôya bé mo kekikel.+
Loñ i ga ba kiki malép ma lom Nil i ngéda ma nhôl,
i ga bet, i témb i sa kiki lom Nil nu Égiptô.’+
9 Yéhôva Nwet Bayemlikok a nkal le: ‘I yokel nu,
m’a boñ le hiañgaa hi nañal i kosi,
m’a boñ ki le jiibe li kôp ikété loñ njamuha.+
10 M’a yilha mangand manan maéya,+
m’a yilha ki tjémbi dinan tjodisôna tjémbi di maéya.
M’a boñ le hiki mut a haba minsugut i bôbôk, a bana ki liseha i ngii ño;
njôghe ni ga nok y’a ba kiki njôghe i mut nu a nimis mpom man,
lisuk li kel i, li ga lol ngandak.’
11 Yéhôva Nwet Bayemlikok a nkal le: ‘Nuna-ki! Dilo di nlo,
le m’a ep njal ikété loñ,
ha njal bijek bé, to nyus malép bé,
ndi njal inyu nok bipôdôl bi Yéhôva.+
12 B’a tômnde ibôdôl nunu tuye ikepam tuye numpe,
ibôdôl i ñombok ikepam pes likôl.*
B’a bet, ba sôhôk i yéñ bipôdôl bi Yéhôva ndi b’a léba bé gwo.
13 I kel i, bikonji bilam bi ga kwo lihiô,
yak boñge bôlôm, inyu nyus;
14 i bet ba nkum soñ ni béba i Samaria,+ ba kalak le:
“Nyambe woñ a niñ, a Dan!”+
Ni le: “Njel i Béer-Séba i niñ!”+
Ba ga kwo, ba ga telep ha bé.’”+