Bakéés

21 Ndi bon ba Israel ba bi kum soñ i Mizpa,+ ba kal le: “Mut to wada ikété yés a ga om bé ngond yé i libii yak man Lôk Benyamin.”+ 2 Bon ba Israel ba bi ke i Bétel,+ ba yén nyoo i bisu bi bañga Nyambe letee ni kôkôa, ba béglak, ba eek ngandak. 3 Ba bé kal le: “A Yéhôva Nyambe nu Israel, inyuki i jam lini li mbôña i Israel? Inyuki litén jada li nlama hañ i len ini i Israel?” 4 I kel i bé noñ ha, ba pule telep, ba oñ juu li bisesema, ba sem ki bisesema bi ntul i hié ni bisesema bi nsañ.+

5 I mbus, bon ba Israel ba bat le: “Ikété matén ma Israel momasôna, njee a nlo bé likoda i bisu bi Yéhôva?” Inyule bon ba Israel ba bi kum soñ le, i mut a ga lo bé i Mizpa i bisu bi Yéhôva, a nlama nôla ibabé set. 6 Bon ba Israel ba bi kônôl lôkisañ yap, bon ba Lôk Benyamin ngoo inyu jam li bi pémél bo. Ba kal le: “I len ini litén jada li nhañ i Israel. 7 Kii di nla ni boñ inyu lébna i bon ba Lôk Benyamin ba nyégle baa, hala kiki di mal kum soñ i jôl li Yéhôva+ le to wada wés a ga ti bé bo ngond yé i libii?”+

8 Ba bat le: “Ikété matén ma Israel, bonjee ba bi lo bé i bisu bi Yéhôva i Mizpa?”+ I nene le mut Yabes-Giléad to wada a bi lo bé i homa litén li bi kodba. 9 Kiki ba nsoñgol bôt, ba tehe le mut Yabes-Giléad to wada a ta bé ha. 10 Ha nyen bôt ba litén ba bi om 12 000 mimpémba mi bôt nyoo. Ba ti bo oda le: “Kena, ni nol bôt ba Yabes-Giléad ni pansoñ, yak bôda ni boñge.+ 11 I jam lini jon n’a boñ: n’a nol bôlôm bobasôna, ni nol ki bôda bobasôna ba ba ma lal ni munlôm.” 12 Ba bi koba 400 bingond bi bôda i Yabes-Giléad bi bi bé konji, bi bé ngi lal ni munlôm. Ba kena bingond bi i ñamb bisônda i Silô,+ nu a yé i loñ Kaanan.

13 Ha nyen likoda jolisôna li bi ep nwin yak bon ba Lôk Benyamin ba ba bé i liaa li Rimôn+ le ba loo, ba kôp nsañ. 14 Lôk Benyamin i témb i boni. Ba ti bo bôda ba Yabes-Giléad+ ba ba bi yégle i niñ, ndi ba bi kola bé bo. 15 Bon ba Israel ba kônôl Lôk Benyamin+ ngoo inyu jam li bi pémél bo, inyule Yéhôva a bi bagal matén ma Israel. 16 Mimañ mi litén mi kal le: “Kii di nlama boñ inyu boñ le i bon ba Lôk Benyamin ba nyégle ba bana bôda, hala kiki di bi tjé bôda ba Lôk Benyamin bobasôna?” 17 Ba timbhe le: “I mbéda le i bon ba Lôk Benyamin ba nyégle ba témbna ngababum yap inyu boñ le litén jada li lém bañ ikété Israel. 18 Ndi di kôli bé ti bo bingond gwés i mabii inyule litén li Israel li bi kum soñ le: ‘Tiihe tiihe ni mut a nti man Lôk Benyamin+ ngond yé i libii.’”

19 I mbus, ba kal le: “Ngand Yéhôva i yé hiki nwii i Silô,+ nu a yé i ñombok u Bétel ni i likôl li njel ikeñi i i nyodi i Bétel, i kenek i Sikem; nyen a yé ki i nwelmbok u Lébôna.” 20 Ba ti bon ba Lôk Benyamin oda le: “Kena, ni solop ikété nwom mi minkôô mi wai. 21 I ngéda n’a tehe bingond* bi Silô bi nyodi i tison yap, bi sagak, hiki wada nan a nyodi i nwom mi minkôô mi wai a yoñ muda ikété bingond bi Silô, i mbus, ni témb i nkoñ u Lôk Benyamin. 22 Ibale basañ bap tole lôkisañ yap i ntjeelene bés, d’a kal bo le: ‘Nwéhlana bo, boña hala inyu yés, inyule i bôda di bi lona i gwét+ ba bi kola bé bo, to bé ni nla bé ti bingond binan tiga le ni bôk i soñ ni bi kum.’”+

23 Hala nyen bon ba Lôk Benyamin ba bi boñ, hiki wada a yoñ muda ikété bingond bi bé sak. I mbus hala, ba témb i nkoñ wap, ba tiimba oñ bitison+ gwap, ba yén ki mu.

24 I mbus ngéda, bon ba Israel ba bi nyodi ha, hiki mut a témb i litén jé ni i lihaa jé; ba bi nyodi ha, hiki mut a témb i ngababum yé.

25 Ha ngéda i, kiñe i bé bé i loñ Israel.+ Hiki mut a bé boñ kiki a bé tehe loñge.*