Yôsua
6 Ndi manwemel ma Yérikô ma bé nkwéhék loñge inyule bôt ba bé kon bon ba Israel woñi; mut to wada a bé pam bé mu tison, mut to wada a bé jôp+ bé to mu.
2 Yéhôva a kal Yôsua le: “Nun-ki, me mal ti Yérikô i moo moñ, nye ni kiñe yé, ni mimpémba nwé mi bôt ba gwét.+ 3 A bé bôt ba gwét bobasôna, ni ga kiiña tison ngélé yada hiki kel. Ni ga boñ hala dilo disamal. 4 U ga kal biprisi bisaambok le bi bôk i bisu bi Nkuu, hiki wada wap a ban-ga toñ i nlôm ntômba. Ndi i hilo hi nyônôs isaambok, ni ga kiiña tison ngélé isaambok, yak biprisi bi hemek bitoñ.+ 5 I ngéda ba ga hem bitoñ bi balôm ba mintômba, ni nok ki kiñ i bitoñ,* bôt ba gwét bobasôna ba nlama leñ nlondok u gwét. Ha nyen lipénd li tison li ga kwo,+ yak bôt ba gwét ba nlama jôp mu tison, hiki mut a kenek i bisu gwé.”
6 Ha nyen Yôsua, man Nun, a bi sébél biprisi, a kal gwo le: “Yoña nkuu Malômbla, biprisi bisaambok bi ga bôk i bisu bi Nkuu u Yéhôva,+ hiki wada wap a ban-ga toñ i nlôm ntômba.” 7 I mbus, a kal bôt ba gwét le: “Jôba i njel, ni kiiña ki tison. Bôt ba gwét+ ba ga bôk i bisu bi Nkuu u Yéhôva.” 8 Ndik kiki Yôsua a bi mal pôdôs bôt ba gwét, biprisi bisaambok bi bi bééna bitoñ bi balôm ba mintômba i bisu bi Nkuu u Yéhôva, bi jôp i jel, bi hemek bitoñ, yak nkuu Malômbla u Yéhôva u noñok bo. 9 Bôt ba gwét ba bééna bijôl bi gwét, ba bôgôk i bisu bi biprisi bi bi bé hem bitoñ, yak bôt ba gwét ba ba bé tat mbus ba noñok Nkuu; biprisi bi hemek ki bitoñ ibabé waa.
10 Ndi Yôsua a bi ti bôt ba gwét i oda ini: “Ni lond bañ, to pot ni pot bañ. Bañga to yada i pémél bañ mu manyo manan letee ni i kel m’a kal bé le: ‘Ni lond!’ Ha nyen n’a lond.” 11 Yôsua a boñ le ba kiiña tison ni Nkuu u Yéhôva ngélé yada; i mbus ha, ba témb i homa ba nyééne, nyoo nyen ba tégbaha u.
12 I kel i bé noñ, Yôsua a pule telep, yak biprisi bi begee Nkuu+ u Yéhôva. 13 Biprisi bisaambok bi bé bôk i bisu bi Nkuu u Yéhôva, bi ban-ga bitoñ bisaambok bi balôm ba mintômba, bi hemek bitoñ ibabé waa. Bôt ba gwét ba bééna bijôl bi gwét, ba bôgôk bo i bisu, yak bôt ba gwét ba ba bé tat mbus ba noñok Nkuu u Yéhôva; biprisi bi hemek ki bitoñ ibabé waa. 14 I hilo hi nyônôs iba, ba kiiña tison ngélé yada; i mbus, ba témb i homa ba nyééne. Ba boñ hala dilo disamal.+
15 I hilo hi nyônôs isaambok, ba pule telep i maye ma kel, ba kiiña tison kiki lem, ndi ba boñ hala ngélé isaambok. Ndik i kel i nyen ba bi kiiña tison ngélé isaambok.+ 16 I ngélé i nyônôs isaambok, i ngéda biprisi bi bi hem bitoñ, Yôsua a kal bôt ba gwét le: “Ni lond,+ inyule Yéhôva a mal ti bé tison! 17 Ni tjé+ tison ni gwom gwobisôna bi yé mukété. Gwobisôna bi yé bi Yéhôva. Ndik muda libambe le Rahab+ nyen ni nlama nwas i niñ, nye ni bôt bobasôna ba ba yé ni nye i ndap, inyule a bi sôô bôt ba mbep di bi ep.+ 18 Ndi kena haa ni hiki yom i i nlama tjiba,+ tiga le i yom i nlama tjiba i kon bé ngôñ, ni tééda ki yo,+ kayéle ni yilha liyééne li Israel kiki yom i i nlama tjiba mu kiki ni mal boñ le bikuu*+ bi kwél jo. 19 Ndi silba yosôna, ni gôl yosôna, lôñni gwom bi mamuna ni bi kei* gwobisôna bi yé bipubhaga inyu Yéhôva.+ Ba nlama tééda gwo i litéédana* li nkus li Yéhôva.”+
20 Jon i ngéda biprisi bi bi hem bitoñ, bôt ba gwét ba lond.+ Ndik kiki bôt ba gwét ba bi nok kiñ i bitoñ, ba leñ nlondok u gwét, yak lipénd li kwo.+ I mbus, bôt ba gwét ba jôp i tison, hiki mut a kenek i bisu gwé, ba yoñ ki tison. 21 Ba tjé i gwom gwobisôna bi bé mu tison ni pansoñ, bôlôm ni bôda, boñge ba wanda ni mimañ mi bôt, nyaga, mintômba ni magas.+
22 Ha nyen Yôsua a bi kal bôlôm bo iba, ba ba bi hes loñ le: “Jôba mu ndap i muda libambe, ni pémés nye ni bôt bé bobasôna, kiki ni bi kumul nye soñ.”+ 23 Jon boñge ba wanda ba ba bé bôt ba mbep, ba bi jôp mu ndap, ba pémés Rahab, ni isañ, ni nyañ, ni lôkisañ lôñni bôt bé bobasôna; ñ, ba pémés lihaa+ jé jolisôna, ba kena ki bo i mbus liyééne li bon ba Israel.
24 I mbus, bôt ba gwét ba ligis tison ni gwom gwobisôna bi bé mu. Ndi ba yoñ silba, ni gôl lôñni gwom gwobisôna bi mamuna ni bi kei,* ba bii gwo i litéédana li nkus li ndap Yéhôva.+ 25 Ndik muda libambe le Rahab nyen Yôsua+ a bi tohol, nye ni lihaa li isañ lôñni bôt bé bobasôna. Letee ni i len ini,+ a ngi niñik i Israel, inyule a bi sôô bôt ba mbep, ba Yôsua a bi ep le ba hes Yérikô.+
26 Mu dilo di nyen Yôsua a bi kum soñ,* a kal le: “Yéhôva a tiihe i mut a ga yéñ le a tiimba oñ i tison Yérikô ini. A ga nimis man wé nu bisu i ngéda a ga tek hikuu hi tison, a nimis ki man wé nu mbus i ngéda a ga ha manwemel ma tison.”+
27 Hala nyen Yéhôva a bé ni Yôsua,+ yak jôl li Yôsua li ke ngan ni hisi+ hiosôna.