Yôsua
7 Ndi bon ba Israel ba bi ndogop, mu kiki ba bi yoñ yom i i bé lama tjiba; inyule Akan+ man Karmi, man Zabdi, man Zéra, mu litén li Yuda, a bi yoñ ndék mu yom i bé lama tjiba.+ Jon Yéhôva a bi unbene bon ba Israel+ ngandak.
2 I mbus, Yôsua a om bôt, ba nyodi i Yérikô, ba ke i Ai,+ tison i i yé bebee ni Bét-Aven, i bak i pes likôl i Bétel.+ Yôsua a kal bo le: “Beda, ni hes nkoñ.” Jon i bôt bana ba bi ke i hes nkoñ u Ai. 3 I ngéda ba bi témb yak Yôsua, ba kal nye le: “I ta bé nseñ i om bôt ba gwét bobasôna nyoo. Jam kiki bo dikôô diba tole dikôô daa di bôlôm di kôli inyu yémbél Ai. U om bañ bôt ba gwét bobasôna nyoo tiga le u wéés bo, inyule ndék bôt ndik yon i nyééne nyoo.”
4 Inyu hala nyen jam kiki bo 3000 di bôlôm di bi bet nyoo, ndi ba bé nyégsaga i ke bôt ba Ai+ ngwéé. 5 Bôt ba Ai ba nol 36 bôt, ba noñ ki bana bape ibôdôl i nwemel u tison, ba sôhôk letee ni i Sébarim,* ba kônde nol bôt bape nyoo i makuli. Jon miñem mi bôt ba litén mi bi bôô bo matjél, ba nimis ki makénd map.*
6 Ha nyen Yôsua a bi was mambot mé, a ôm maboñ ’isi, a ôm ki mbom ’isi i bisu bi Nkuu u Yéhôva, nye ni mimañ mi Israel. Ba yén ha letee ni kôkôa, ba kôbôk minluñ mi biték i ngii miño nwap. 7 Yôsua a kal le: “Éé, a Nwet Bayemlikok le Yéhôva, inyuki u mboñ le i litén lini li yap Yordan inyu ti bés i moo ma Lôk Amôr, le ndi ba tjé bés? Ngo i bak nseñ le di yén ii pes* i Yordan! 8 Nwéhél me, a Yéhôva, me pot ni lelaa? Ngo bon ba Israel ba nso i bisu bi baoo bap.* 9 I ngéda Lôk Kanaan ni matén momasôna ma ma nyén mu loñ ba ga nok hala, ba ga kéña bés, ba sas ki jôl jés hana ’isi; ndi u ga boñ ni kii inyu sôñ jôl+ joñ likeñi?”
10 Yéhôva a timbhe Yôsua le: “Telep! Inyuki u ñôm mbom ’isi? 11 Bon ba Israel ba mboñ béba. Ba mbôk malômbla+ me bi kal bo le ba tééda. Ba nyoñ ndék mu yom i bé lama tjiba,+ ba nip+ yo, ba sôô ki yo mukété gwom+ gwap. 12 Inyu hala nyen bon ba Israel ba ga la bé yémbél baoo bap. Ba ga kôm baoo bap mbus, ba kee ki bo ngwéé, inyule bomede ba mal yila yom i i nlama tjiba. M’a ba ha bé ni bé, letee ni héya i yom i nlama tjiba+ ipôla nan. 13 Telep, u yilha bôt ba litén bapubhaga!+ Kal bo le: ‘Yilhana bébomede bapubhaga inyu yani, inyule Yéhôva, Nyambe nu Israel, a nkal le: “A Israel, i yom i nlama tjiba i ngi yii ipôla nan! Ni ga yémbél bé baoo banan, letee ni héya i yom i nlama tjiba ipôla nan. 14 Ni nlama lo hana kegla, matén matén. I litén Yéhôva a ga pohol+ li ga lo i bisu, bilôk bilôk. I mbus hala, i lôk Yéhôva a ga pohol i ga lo i bisu, mahaa mahaa. I lihaa Yéhôva a ga pohol li ga lo i bisu, mut wada wada. 15 I mut ba ga gwel ni i yom i nlama tjiba, ba ga ligis+ nye, nye ni gwom gwé gwobisôna, inyule a mbôk malômbla+ ma Yéhôva, ni inyule a mboñ jam li wonyuu i Israel.”’”
16 Jon Yôsua a bi pule telep bikegla, a tiigaha bon ba Israel bebee, matén matén; ha nyen Nyambe a pohol litén li Yuda. 17 Yôsua a boñ le bilôk bi Yuda bi loo i bisu, ha nyen Nyambe a pohol lôk Zéra.+ I mbus, Yôsua a boñ le lôk Zéra i loo i bisu, mut wada wada, ha nyen Nyambe a pohol Zabdi. 18 I mbus hala, Yôsua a boñ le lihaa li Zabdi li loo i bisu, mut wada wada; ha nyen Nyambe a bi pohol+ Akan, man Karmi, man Zabdi, man Zéra, mu litén li Yuda. 19 I mbus, Yôsua a kal Akan le: “A man wem, soho, ti Yéhôva, Nyambe nu Israel lipém, pahlene nye béba yoñ. Soho, kal me i jam u mboñ. U sôô bañ me jo.”
20 Akan a timbhe Yôsua le: “Ni maliga, men me mboñ béba i mis ma Yéhôva, Nyambe nu Israel. I jam lini jon me mboñ: 21 “I ngéda me bi béñge mu nkus, me tehe mbot ilam i Sinar,*+ ni 200 sékel* i silba, ni gôl i i nyét 50 ma sékel; i gwom bini bi bi kon me ngôñ, jon me bi yoñ gwo. Nano, bi sôli mu ’isi ikété ndap yem libadô, lôñni silba isi mbot.”
22 Ha nyen Yôsua a bi ep bôt, ba kee ngwéé i ndap yé libadô. Mbot i bé i sôli ikété ndap yé libadô, lôñni silba isi mbot. 23 Ba yoñ i gwom bi bé bi sôli ikété ndap libadô, ba kena gwo yak Yôsua ni yak bon ba Israel bobasôna, ba bii ki gwo i bisu bi Yéhôva. 24 Yôsua ni bon ba Israel bobasôna ba yoñ man Zéra le Akan,+ ba yoñ ki silba, ni mbot, ni gôl,+ lôñni bon bé bôlôm ni bon bé bôda, ni nyaga yé, ni jagas jé, ni mintômba nwé, ni ndap yé libadô, yak ni gwom gwé gwobisôna, ba bedna gwo i nsôsôgô* u Akôr.+ 25 Ha nyen Yôsua a bi kal le: “Inyuki u nlona bés bikuu?*+ I len ini, Yéhôva a ga lona we bikuu!” Jon bon ba Israel bobasôna ba bi ôm bo ngok,+ ba ligis+ ki bo. Hala nyen ba bi ôm bobasôna ngok. 26 I mbus, ba bédés soso nwind u ngok i ngii yé, u u ngi yii nyoo letee ni len. Ha nyen hiun hi Yéhôva hi bi sôs.+ Inyu hala nyen yak i len ini, ba nsébél i homa nu le nsôsôgô u Akôr.*