Bakéés
3 I matén mana mon Yéhôva a bi nwas le ma yégle mu loñ inyu noode bon ba Israel bobasôna ba ba bi yi bé gwét bi Kanaan+ 2 (a bi boñ hala inyu boñ le tjai di bon ba Israel di di ga noñ ha, di yi kii i yé gwét, inyule ba bi yi bé i nya jam i): 3 Baane ba bôt ba Filistia+ bo batan, Lôk Kanaan yosôna, Lôk Sidôn+ ni Lôk Hivi+ i i bé yééne i hikôa Libañ,+ ipôla hikôa Baal-Harmôn ni Lébô-Hamat.*+ 4 I matén ma, ma bé inyu noode Israel, inyu boñ le Israel a unda too a ga nôgôl mambén Yéhôva a bi ti basañ bap ni njel Môsi.+ 5 Bon ba Israel ba bi niñ ipôla Lôk Kanaan,+ Lôk Hét, Lôk Amôr, Lôk Péris, Lôk Hivi, ni Lôk Yébus. 6 Ba bé bii bingond bi matén ma, ba tinak bôlôm ba matén bingond gwap, ba bôdôl ki bégés banyambe+ bap.
7 Hala nyen bon ba Israel ba bi boñ béba i mis ma Yéhôva, ba hôya Yéhôva Nyambe wap, ba bôdôl bégés Baal+ ni mél mapubhaga.*+ 8 Inyu hala nyen Yéhôva a bi unbene bon ba Israel ngandak, a sem bo i moo ma Kusan-Risataim, kiñe Mésôpôtamia.* Bon ba Israel ba bi gwélél Kusan-Risataim nwii juem. 9 I ngéda bon ba Israel+ ba bi sébél Yéhôva le a hôla+ bo, Yéhôva a ti bo Ôtniel+ man Kénas, manyañ Kaleb le a tohol bo. 10 Yéhôva a ti nye mbuu wé,+ a yila nkéés i Israel. I ngéda a bi ke i gwét, Yéhôva a sem Kusan-Risataim kiñe Mésôpôtamia* i moo mé, a yémbél Kusan-Risataim. 11 I mbus hala, loñ i yén ikété nsañ* 40 ma nwii. I mbus, Ôtniel man Kénas, a wo.
12 Bon ba Israel ba témb ba bôdôl boñ mam mabe i mis ma Yéhôva.+ Yéhôva a nwas le Églôn, kiñe Môab+ i yémbél bon ba Israel inyule ba bi boñ mam mabe i mis ma Yéhôva. 13 Églôn a bi tinde ki Lôk Amôn+ ni Lôk Amalek+ i jôs bon ba Israel. Ba bi jôs Israel gwét, ba kadal tison maén.+ 14 Bon ba Israel ba bi gwélél Églôn, kiñe Môab 18 nwii.+ 15 I mbus, bon ba Israel ba bat Yéhôva mahôla,+ Yéhôva a ômle bo ntohol+ le Éhud,+ man Géra, man Lôk Benyamin+ nu a bé limoña.*+ Lisañ jada, bon ba Lôk Israel ba bééga Éhud tas le a ti Églôn, kiñe Môab. 16 Ndi Éhud a bi bañ pansoñ i malo ima, i bé ap hikéñéé hi woo hiada.* A kañ yo isi mambot mé, i bel wé walôm. 17 I mbus, a ke a ti Églôn kiñe Môab tas. Églôn a bé nkeñi* ngandak.
18 I ngéda, Éhud a bi mal ti tas, a témb lôñni bôt ba bé ba bééga tas. 19 Kiki ba mpam i Gilgal,+ i homa mintjok mi biôñgba mi bé,* a témb ni mbus, a ke a kal kiñe le: “A kiñe, me gwé jam le me nlama kal ndigi wetama.” Kiñe i kal le: “Nwaha bés!” Bagwélél bé bobasôna ba pam. 20 Kiñe i bé i yii i tuñ* yé, i het lisuni li bé, Éhud a tiige nye bebee. Éhud a kal nye le: “Me gwééne we nwin u u nlôl yak Nyambe.” Ha nyen kiñe i bi nyodi i yééne yé ane, i telep. 21 Ni woo wé waé, Éhud a sodol pansoñ i bé nye i bel walôm, a ôm nye yo i libum. 22 Pansoñ yosôna i jôp nye i libum, yak ni ngwén,* mahoñ ma hô yo, tjibi di pam, inyule Éhud a bi nwas pansoñ mu libum jé. 23 Éhud a pémél i libebe,* a yip makôga ma tuñ, a kwés mo. 24 Kiki a nke, bagwélél ba kiñe ba témb ba lo, ba koba le makôga ma yé nkwéhék. Ba kal le: “Bebek le a yé i libee* ikété tuñ i i gwé lisuni.” 25 Kiki ba mbem ngim ngéda, ba tehe le a ta bé i yibil makôga ma tuñ, ba yoñ hiliba, ba kwihil, ba tehe le nwet wap a niñi ’isi, a ma wo!
26 Kiki ba bé lep ngéda, Éhud a so, a ke, a tagbe bebee ni mintjok mi biôñgba,*+ a bol i Séira, a pei. 27 Kiki a mpam ndigi i mbok dikôa i Éfraim,+ a kahal hem hioñ;+ bon ba Israel ba lo, ba kahal sôs dikôa, Éhud a bôgôk bo bisu. 28 I mbus, a kal le: “Noña me inyule Yéhôva a nsem baoo banan le Lôk Môab i moo manan.” Ha nyen ba bi noñ nye, ba yoñ mabôñ* ma Yordan inyu boñ le Lôk Môab i tagbe bañ, ba bi nwas bé mut nye ki nye le a yap. 29 I lisañ li nyen ba bi nol 10 000 di bon ba Môab,+ bobasôna ba bak bôt ba ngui ni bôt ba makénd; to wada wap a bi pei bé.+ 30 Ibôdôl ni yokel nyen bon ba Israel ba bi nyodi isi énél i Lôk Môab; loñ i yén ikété nsañ* 80 ma nwii.+
31 I mbus Éhud, Samgar+ man Anat, a bi yila nkéés, nyen a bi nol 600 bôt ba Filistia+ ni likoñ+ ba ntindne nyaga; yak nye a bi tohol Israel.