Bakéés

9 I mbus ngéda, Abimélek+ man Yérub-Baal, a ke yak banyandôm* bé i Sikem, a pôdôs bo lôñni lihaa li sôgôl wé jolisôna le:* 2 “Soho, kala baéga* bobasôna ba Sikem le: ‘Kii i nlémél bé: le bon ba Yérub-Baal+ bobasôna ba ane bé, hala wee 70 ma bôt; tole mut wada nyen a ane bé? Ndi ni hôya bañ le me ni bé di yé matjél mada.’”*

3 Banyandôm bé ba bi pôdôs baane ba Sikem inyu yé. Baane ba Sikem ba kit le ba nit Abimélek, inyule ba bé kal le: “A yé mankéé wés.” 4 Ba ti nye 70 ma bipes bi silba bi bi nlôl i témpel* Baal-Bérit,+ Abimélek a gwélél i moni mi inyu boñ le ditégéé di bôt ni bôt ba lipamal ba noñ nye. 5 I mbus, a ke i ndap isañ i Ôfra,+ a nol lôkisañ,+ bon bôlôm ba Yérub-Baal, 70 ma bôt; a nôlôl bo i ngii ngok yada. Ndik Yôtam, man Yérub-Baal nu mbus nyen a bi pei inyule a bi solop.

6 I mbus hala, baane ba Sikem bobasôna ni baane ba Bét-Milô bobasôna ba kodba, ba téé Abimélek kiñe+ bebee ni e ikeñi, i homa jél li Sikem li bé.

7 Kiki ba ñañle Yôtam i mam mana, i nlélém ngéda a ke a telep i ngii hikôa Gérizim,+ a pot makeñi, a kal le: “Emblana me a baane ba Sikem, inyu boñ le yak Nyambe a emble bé.

8 “Kel yada, bie bi bi kodba inyu pohol njee a ga ba kiñe yap. Bi kal e ôlivé le: ‘Yila kiñe yés.’+ 9 Ndi e ôlivé i timbhe bo le: ‘Me nla bé nwas môô mem,* ma bôt ba ngwélél inyu ti Nyambe ni bôt ba binam lipém, inyu ndeñg i ngii bie bipe!’ 10 I mbus, bie bi kal e faigé le: ‘Loo, u yila kiñe yés.’ 11 Ndi e faigé i timbhe bo le: ‘Me nla bé nwas line jem ni matam mem malam inyu ke i ndeñg i ngii bie bipe!’ 12 I mbus, bie bi kal nkôô wai le: ‘Loo, u yila kiñe yés.’ 13 Nkôô wai u timbhe bo le: ‘Me nla bé nwas wai yem yondo i i nkônha Nyambe ni bôt ba binam maséé inyu ndeñg i ngii bie bipe!’ 14 Sôk i nsôk, bini bie bipe gwobisôna bi kal e biloo le: ‘Loo, u yila kiñe yés.’+ 15 Ha nyen e biloo i bi timbhe bie le: ‘Ibale men ni pohol toi le me ba kiñe nan, lona, ni solop isi yiye yem. Ndi ibale hala bé, wee hié hi pémél i e biloo, hi ligis bie bi sidar bi Libañ.’

16 “Baa ni mboñ mam ni maliga lôñni telepsép kiki ni ntéé Abimélek kiñe?+ Baa ni ñunda Yérub-Baal ni lihaa jé loñgeñem? Baa ni nti nye lipém li li kôli ni nye? 17 I ngéda pua yem a bi jo gwét inyu nan,+ a bé le a nimis niñ* yé inyu tohol bé i moo ma Madian.+ 18 Ndi i len ini, ni ntelep inyu jôs lihaa li pua yem, ni nol bon bé i ngii ngok+ yada, 70 ma bôt. I mbus, ni téé Abimélek man linyaa+ jé, kiñe i ngii baane ba Sikem, inyule manyuñ nan nu. 19 Ñ, ibale jam ni mboñ Yérub-Baal ni lihaa jé i len ini li yé lilam, li téé ki sép, wee kona maséé inyu Abimélek, yak nye a kon maséé inyu nan. 20 Ndi ibale hala bé, wee hié hi pémél yak Abimélek, hi ligis baane ba Sikem ni ba Bét-Milô;+ hié hi pémél ki yak baane ba Sikem ni ba Bét-Milô, hi ligis Abimélek.”+

21 I mbus, Yôtam+ a ke ngwéé, a solop i Béer, a yééne nyoo inyule a bé kon manyañ wé Abimélek woñi.

22 Abimélek a bi ane* Israel nwii maa. 23 I mbus ngéda, Nyambe a nwas le ôa i ba* ipôla Abimélek ni baane ba Sikem, ba tonbana ki Abimélek. 24 Hala a bi bôña le ndi ba pun 70 ma bon bôlôm ba Yérub-Baal ba ba bi nôla, ni le ba kogse i bôt ba bi nol bo: hala wee Abimélek inyule nyen a bi nol bo,+ ni baane ba Sikem inyule ba bi hôla nye i nol lôkisañ. 25 Baane ba Sikem ba om bôt i ngii dikôa le ba amb Abimélek, ba bé kadal gwom bi bôt ba bé tagbe bebee ni bo mu njel. I mbus ngéda, ba añle Abimélek i jam li.

26 Kel yada, Gaal man Ébed a ke ni lôknyañ i Sikem, baane ba Sikem+ ba bôdôl nye ñem. 27 Bôt ba Sikem ba bi ke i nwom nwap, ba ket matam ma nkôô wai, ba tjo mo inyu kôhna wai, ba boñ ngand; i mbus, ba jôp i ndap Nyambe+ wap, ba je, ba nyo, ba tiihe Abimélek. 28 I mbus, Gaal man Ébed a kal le: “Njee a yé Abimélek, njee a yé Sikem le di gwélél bo? Baa a ta bé man Yérub-Baal?+ Baa Zébul a ta bé nkenwin wé? Bé, gwéélana bôt ba Hamor, isañ Sikem! Ndi inyuki bés di nlama yila bagwélél ba Abimélek? 29 Ibale litén lini li bak isi énél yem, ki me nhéya Abimélek tel yé.” I mbus, a kal Abimélek le: “Kéñbaha ntôñ woñ gwét, u loo di joo.”

30 I ngéda Zébul, ñane tison, a bi nok bibañga bi Gaal man Ébed, a unup ngandak. 31 A om balegelnwin bisôsôli* yak Abimélek, a kal nye le: “Gaal man Ébed ni lôknyañ ba yé i Sikem, ba yé i tinde bôt ba tison le ba kolba we. 32 Hanano ni, telep ni juu, we ni bôt boñ ni solop i bikai. 33 I ngéda kel i nye ndigi, yak we pule telep, u leñ tison gwét; i ngéda nye ni bôt bé ba nlo i jôs we, w’a boñ kii yosôna u nla inyu yémbél nye.”*

34 Abimélek ni bôt ba bé lôñni nye ba telep ni juu, ba bagla mintôñ mina, ba ke ba solop bebee ni Sikem. 35 I ngéda Gaal man Ébed a bi pam, a telep i lijubul li tison, Abimélek ni bôt bé ba pam i masolbene map. 36 I ngéda Gaal a bi tehe bôt, a kal Zébul le: “Béñge ki! Bôt baa ba yé i lôl i ngii dikôa.” Ndi Zébul a kal nye le: “Bititii bi dikôa gwon bi yé i pôna we bôt ba binam.”

37 I mbus ndék ngéda, Gaal a kal le: “Béñge loñge! Bôt ba binam bon ba yé i lôl i ñem loñ, ntôñ wada u yé i lôl i njel e ikeñi i Méônénim.” 38 Ha nyen Zébul a bi kal nye le: “Ngôk woñ u yé hee nano? We nu u bé kal le: ‘Njee a yé Abimélek le di gwélél nye?’+ Baa i bôt bana bé bon u bé yan? Pamak ni nano, u jôs bo gwét.”

39 Hala nyen Gaal a bi éga baane ba Sikem i jôs Abimélek. 40 Gaal a ke ngwéé, Abimélek a noñ nye, ngandak bôt i bi wo, mim mi bé mi niñi letee ni lijubul li tison.

41 Abimélek a bi kônde yééne i Aruma; yak Zébul+ a bi luhul Gaal ni lôknyañ, ba nyodi i Sikem. 42 I kel i bé noñ ha, bôt ba Sikem ba nyodi i tison ba ke bikai, ba kal Abimélek hala. 43 A yoñ bôt bé, a bagal bo mintôñ maa, ba solop i bikai. I ngéda a bi tehe bôt ba nyodi i tison, a leñ bo gwét, a nol bo. 44 Abimélek ni ntôñ u bé lôñni nye ba ke ngwéé, ba telep i lijubul li tison; mini mintôñ ima mi jôs i bôt bobasôna ba bé i bikai, ba nol bo. 45 Abimélek a bi jôs i tison ini gwét kel yosôna, a yoñ yo. A nol i bôt ba bé mukété; i mbus, a bôk yo,+ a kôp yo bas.

46 I ngéda baane bobasôna ba nkum ndap u Sikem, ba bi nok hala, ba pala jôp i lisolbene li li yé ikété ’isi, i témpel* El-Bérit.+ 47 Kiki ba nkal Abimélek le baane ba nkum ndap u Sikem ba nkodba, 48 Abimélek ni bôt bobasôna ba bé lôñni nye ba ke i hikôa Zalmôn. Abimélek a yoñ nkuleñ, a kit ntjep e, a kéhi wo i tuu, a kal bôt bé le: “I jam ni ntehe me me mboñ, yak bé ni pala boñ nlélém!” 49 Bôt bé bobasôna ba kit mintjep mi bie, ba noñ Abimélek. I mbus, ba bii mintjep mi i lisolbene, ba kuye lisolbene hié. Hala nyen yak bôt ba nkum ndap u Sikem ba bi wo, ba bé jam kiki bo 1 000 hi bôt, bôlôm ni bôda.

50 I mbus hala, Abimélek a ke i Tébes; a jôs tison Tébes gwét, a yoñ yo. 51 Nkum ndap nkeñi u bé i ñemkété u tison, bôlôm bobasôna ni bôda bobasôna ni baane bobasôna ba tison ba ke, ba solop mu. Ba kwéhba mukété, ba bet i ngii nyôl u nkum ndap. 52 Abimélek a bi pam bebee ni nkum ndap, a leñ wo gwét. A ke bebee ni lijubul li nkum ndap inyu ha wo hié. 53 Ha nyen muda wada a bi leñ Abimélek man ngok kôgôl i ño, i bol nye ño.+ 54 A pala sébél mbegee bijôl gwé bi gwét, a kal nye le: “Yoñ pansoñ yoñ, u nol me, tiga le ba kal inyu yem le: ‘Muda nyen a bi nol nye.’” Mbegee bijôl gwé bi gwét a ôm nye pansoñ, a wo.

55 I ngéda bôt ba Israel ba bi nok le Abimélek a nwo, bobasôna ba huu mambai map. 56 Hala nyen Nyambe a bi timbhe Abimélek béba a bi boñ isañ i ngéda a bi nol 70 ma lôkisañ.+ 57 Nyambe a bi boñ ki le béba i bôt ba Sikem i timbil bo. Hala nyen ndiihe i Yôtam+ man Yérub-Baal,+ i bi kwél bo.