Yôsua

18 Ha nyen ntôñ u bon ba Israel wonsôna u kodba i Silô,+ ba téé ki ndap libadô i likoda ha,+ inyule ba bi suhus loñ Kanaan isi yap.+ 2 Ndi matén ma Israel masaambok ma bé ma ngi yii, ma ma bé ngi kôhna ngababum yap. 3 Jon Yôsua a bi kal bon ba Israel le: “N’a bem letee ni ngéda mbe inyu ke i yoñ loñ Yéhôva, Nyambe nu basôgôlsôgôl banan, a bi ti bé?+ 4 Ni pohol bôlôm baa ikété hiki litén, m’a om bo i kiiña mu loñ; ba ga ôt titii i loñ, ba tand ki minwaa mu, inyu ti hiki litén yé ngababum. I mbus, ba ga tiimba lo i meeni. 5 Ba ga kap loñ ngaba isaambok, hiki litén li ga yoñ yé ngaba.+ Yuda a ga yén i nkoñ wé, nyoo i pes nwelmbok;+ yak mbôda Yôsep i ga yén i nkoñ wé, nyoo i pes ñombok.+ 6 I ngéda ni ga mal kap loñ ngaba isaambok, n’a ôt ki titii i loñ, ni lona me yo. I mbus, m’a leñ mbam+ inyu nan hana i bisu bi Yéhôva Nyambe wés. 7 Ndi Lôk Lévi i ga kôhna bé ngaba mu nkoñ nan,+ inyule nson u prisi u Yéhôva won u yé ngababum+ yap. Yak Gad, ni Ruben, lôñni pes litén i Manasé,+ ba mal kôhna ngababum yap nyoo i pes likôl i Yordan; i ngababum i yon Môsi, ngwélél Yéhôva, a bi ti bo.”

8 I bôlôm ba, ba bé kôôba inyu ke. Ha nyen Yôsua a bi kal i bôlôm ba bé lama ôt titii i loñ le: “Kena, ni kiiña mu loñ, ni ôt ki titii i loñ; i mbus ha, ni loo i meeni. Ha nyen m’a leñ mbam inyu nan, hana i Silô,+ i bisu bi Yéhôva.” 9 Jon i bôlôm bana ba bi ke, ba kiiña mu loñ, ba ôt ki titii i loñ, ba kap loñ ngaba isaambok, hiki ngaba ni bitison gwé, ba tila hala i kaat. I mbus, ba témb yak Yôsua, i homa litén li bé yééne i Silô. 10 I mbus, Yôsua a leñ mbam inyu yap i Silô, i bisu bi Yéhôva.+ Ha homa nu nyen Yôsua a bi kébha bon ba Israel loñ, hiki litén ni yé ngaba.+

11 I ngéda ba bi leñ mbam, bon ba* Benyamin bon ba bi kôhna ngaba i bisu; mahaa map mon ma bi kabna yo. I nkoñ ba bi kôhna, u bé ipôla nkoñ u Yuda+ ni nkoñ u bon ba Yôsep.+ 12 Nwaa nkoñ wap i pes ñombok u bé bôdôl i Yordan, u bedek nyoo isi hikôa Yérikô+ i pes ñombok, u bedek ki letee ni i hikôa i pes hiôñg, u kenek letee ni nyoo i ñoñ u Bét-Aven.+ 13 Nwaa nkoñ wap u bé ke ki nyoo i Luz, isi hikôa i pes nwelmbok, hala wee Bétel,+ u sôhôk nyoo i Atarôt-Adar,+ i hikôa hi hi yé i nwelmbok i Bét-Hôron+ nu a yé i makuli. 14 Nwaa nkoñ u bé ke ki i pes hiôñg, u hielbaga inyu ke nyoo i pes nwelmbok, ibôdôl i hikôa hi hi yé i mbombom Bét-Hôron, i pes nwelmbok; u malak i Kiriat-Baal, hala wee Kiriat-Yéarim,+ tison yada i Yuda. Hala a bé nwaa nkoñ i pes hiôñg.

15 I pes nwelmbok, nwaa nkoñ u bé bôdôl i lisuk li Kiriat-Yéarim, u kenek i pes hiôñg, u kenek letee ni i lingen li malép ma Neftôa.+ 16 Nwaa nkoñ u bé sôs letee ni i lisuk li hikôa hi hi yé i mbombom nsôsôgô u Man Hinom,+ hi bak i nsôsôgô* i Lôk Réfaim,+ i pes ñombok. U sôhôk ki i nsôsôgô u Hinom, nyoo isi hikôa hi Lôk Yébus+ i pes nwelmbok, u sôhôk yak letee ni i En-Rôgel.+ 17 U bé nyodne i pes ñombok, u kenek letee ni i En-Sémes, u pamak i Gélilôt, tison i i yé i mbombom mabeda ma Adumim,+ u sôhôk ki letee ni i ngok+ Bôhan,+ man Ruben. 18 U bé kenek ki i pes ñombok i mbombom Araba, u sôhôk letee ni i Araba. 19 Nwaa nkoñ u bé ke ki letee ni isi hikôa i pes ñombok i Bét-Hôgla,+ u malak i libôñ li li yé i pes ñombok i tuye Bas,*+ i homa Yordan a nsul tuye i pes nwelmbok. Hala a bé nwaa nkoñ i pes nwelmbok. 20 Yordan nyen a bé nwaa nkoñ i pes likôl. Hala a bé minwaa nwominsôna mi nkoñ ba bi ti bon ba* Benyamin le u ba ngababum yap; mahaa map mon ma bi kabna i nkoñ u.

21 I bitison bini gwon mahaa ma bon ba* Benyamin ma bi kabna: Yérikô, Bét-Hôgla, Émék-Kézis, 22 Bét-Araba,+ Zémaraim, Bétel,+ 23 Avim, Para, Ôfra, 24 Kéfar-Amôni, Ofni ni Géba;+ i bitison bini gwobisôna bi bé 12, lôñni mambai ma ma nkéña gwo.

25 Yak Gibéôn,+ Rama, Béérôt, 26 Mizpa,* Kéfira, Môza, 27 Rékem, Irpéel, Tarala, 28 Zéla,+ Ha-Élef, Yébus, hala wee Yérusalem,+ Gibéa+ ni Kiriat; i bitison bini gwobisôna bi bé 14, lôñni mambai ma ma nkéña gwo.

I nkoñ u won ba bi ti bon ba* Benyamin le u ba ngababum yap; mahaa map mon ma bi kabna yo.