Yôsua
13 Yôsua a bi un+ ngandak. Jon Yéhôva a bi kal nye le: “U ñun ngandak, ndi minkoñ mi mi yé ngi yôña mi ngi yii jôga. 2 I minkoñ mini nwon mi yé ngi yôña:+ minkoñ nwominsôna mi bôt ba Filistia ni minkoñ nwominsôna mi Lôk Gésur+ 3 (ibôdôl i Sihôr, nkoñ u u yé i pes likôl i* Égiptô letee ni i nwaa nkoñ u Ékrôn i pes ñombok, u u bé nkoñ+ u Lôk Kanaan), lôñni minkoñ mi baénél batan ba bôt ba Filistia,+ hala wee nkoñ u Gasa, u Asdôd,+ u Askélôn,+ u Gat+ ni u Ékrôn;+ yak ni nkoñ u Lôk Avim+ 4 i pes nwelmbok. Yak mini minkoñ mi nlama yôña: nkoñ wonsôna u Lôk Kanaan; ni Méara, won u yé nkoñ u bôt ba Sidôn+ letee ni i Afek, bebee ni nwaa nkoñ u Lôk Amôr; 5 nkoñ u bôt ba Gébal,+ ni Libañ yosôna i pes likôl, ibôdôl i Baal-Gad, nyoo isi hikôa Hermôn letee ni i Lébô-Hamat;*+ 6 mbok dikôa yosôna i i mbôdôl i Libañ+ letee ni i Misréfôt-Maim;+ ni nkoñ wonsôna u bôt ba Sidôn.+ M’a luhul i bôt ba,* me ti loñ yap bon ba Israel.+ Yom yosôna u nlama boñ i yé ndik le u kap loñ, u ti yo bon ba Israel le i ba ngababum yap, kiki me bi kal+ we. 7 Nano ni, i mbéda le u kap i loñ ini, u ti yo matén bôô ni pes litén i Manasé.”+
8 Pes yada i litén li Manasé, ni Lôk Ruben ni Lôk Gad ba bi mal yoñ ngababum yap, i Môsi a bi ti bo nyoo uu ngwañ u Yordan i pes likôl, inoñnaga ni kiki ngwélél Yéhôva le Môsi a bi kap, a ti bo:+ 9 nkoñ wap u bé bôdôl i Arôer,+ tison i i yé i nwaa nsôsôgô* u Arnôn,+ u kenek letee ni i tison i i yé i ñemkété nsôsôgô, lôñni tegep mbok yosôna i Médéba letee ni i Dibôn; 10 yak bitison gwobisôna bi kiñe Lôk Amôr le Sihôn, nu a bé énél i Hesbôn, letee ni i nwaa nkoñ u bon ba Amôn;+ 11 yak ni Giléad, ni nkoñ u Lôk Gésur, ni u Lôk Maaka,+ ni hikôa Hermôn hiosôna, ni Basan+ yosôna letee ni i Saléka;+ 12 ane yosôna i Og i i yé ikété Basan; Og a bé énél i Astarôt ni i Édréi. (A bé mut wada mu bôt ba Réfaim+ ba ba bé ba ngi yii.) Môsi a bi yémbél bôt ba bé mu minkoñ mi, a luhul+ ki bo.* 13 Ndi bon ba Israel ba bi luhul+ bé* Lôk Gésur, to Lôk Maaka; letee ni len, Lôk Gésur ni Lôk Maaka i ngi niñik ipôla bon ba Israel.
14 Ndik litén li Lôk Lévi jon Môsi a bi ti bé ngababum.+ Kiki a bi bôn+ bo, bisesema bi hié inyu Yéhôva, Nyambe nu Israel, gwon bi yé ngababum+ yap.
15 I mbus ha, Môsi a bi ti bon ba* Ruben ngababum; mahaa map mon ma bi kabna yo, 16 nkoñ wap u bé bôdôl i Arôer, tison i i yé i nwaa u nsôsôgô* u Arnôn, u kenek letee ni i tison i i yé i ñemkété nsôsôgô, lôñni tegep mbok yosôna i Médéba; 17 Hesbôn ni bitison+ gwé gwobisôna bi bi yé mu tegep mbok, gwo bini: Dibôn, Bamôt-Baal, Bét-Baal-Méôn,+ 18 Yahaz,+ Kédémôt,+ Méfaat,+ 19 Kiriataim, Sibma,+ Zéret-Sahar nyoo i hikôa hi hi yé i nsôsôgô,* 20 Bét-Péôr, nyoo isi dikôa di Pisga,+ Bét-Yésimôt,+ 21 bitison gwobisôna bi tegep mbok, ni ane yosôna i kiñe Lôk Amôr le Sihôn, nu a bé énél i Hesbôn.+ Môsi a bi yémbél+ Kiñe Sihôn; a yémbél ki Évi, Rékem, Zur, Hur ni Réba,+ ba ba bé baane ba Madian, ba bak ki bikiñe bi bi bé isi énél i Sihôn, ba yéénege mu loñ. 22 Balam+ man Béor, nu a bé mpot bindéé,+ a bé wada mukété bôt bon ba Israel ba bi nol ni pansoñ. 23 Yordan nyen a bé nwaa nkoñ u bon ba Ruben. I nkoñ u won ba bi ti bon ba Ruben le u ba ngababum yap; mahaa map mon ma bi kabna yo. I bitison bi gwon bi bé bitison gwap, lôñni mambai ma ma nkéña gwo.
24 Handugi hala, Môsi a bi ti yak bon ba* Gad ngababum yap; mahaa map mon ma bi kabna yo; 25 nkoñ wap u bé ke letee ni i Yazer,+ ni bitison gwobisôna bi Giléad, ni pes nkoñ u bon ba Amôn+ letee ni i Arôer, tison i i yé i mbombom Raba;+ 26 nkoñ wap u bé kenek ki i Hesbôn+ letee ni i Ramat-Mizpé lôñni Bétônim, i Mahanaim+ letee ni i nwaa nkoñ u Débir; 27 yak mu nsôsôgô* u bé ke i Bét-Haram, i Bét-Nimra,+ i Sukôt+ ni i Zafôn, ane i kiñe Hesbôn+ le Sihôn i i nyégle. Nwaa nkoñ wap u bé i pes likôl i Yordan, u kenek letee ni i lisuk li tuye Kinéret.*+ 28 I nkoñ u won ba bi ti bon ba Gad le u ba ngababum yap; mahaa map mon ma bi kabna yo. I bitison bi gwon bi bé bitison gwap, lôñni mambai ma ma nkéña gwo.
29 Sôk i nsôk, Môsi a bi ti pes litén i Manasé ngababum yap, hala wee pes yada i litén li bon ba Manasé; mahaa+ map mon ma bi kabna yo. 30 Nkoñ wap u bé bôdôl i Mahanaim,+ u kenek i Basan yosôna, ane yosôna i kiñe Basan le Og, ni mambai momasôna ma Yair,+ ma ma yé ikété Basan. Nkoñ wap u bééna 60 ma bitison. 31 Ba bi yoñ pes yada i Giléad, Astarôt, ni Édréi,+ bitison bi ane i Og ikété Basan, ba ti gwo bon ba Makir,+ man Manasé, hala wee pes i bon ba Makir; mahaa map mon ma bi kabna i nkoñ u.
32 I ngababum i yon Môsi a bi ti bo nyoo i ñoñ u Môab, i i yé i pes likôl i Yérikô,+ nyoo uu ngwañ u Yordan.
33 Ndi Môsi a bi ti bé litén li Lôk Lévi ngababum.+ Yéhôva, Nyambe nu Israel, nyen a yé ngababum yap, kiki a bi bôn+ bo.