Yôsua

22 Ha nyen Yôsua a bi sébél Lôk Ruben, Lôk Gad ni pes litén i Manasé, 2 a kal bo le: “Ni bi boñ mam momasôna ngwélél Yéhôva le Môsi a bi kal bé,+ ni nôgôl ki me ikété mam momasôna me bi kal bé.+ 3 Mu ngéda i yosôna letee ni len;+ ni bi tjôô bé lôkisoñ nan, ni nôgôl ki mbén Yéhôva Nyambe+ nan. 4 Nano, Yéhôva Nyambe nan a nti lôkisoñ nan noi kiki a bi bôn+ bo. Jon ni nla témb i bééni, i nkoñ ngwélél Yéhôva le Môsi a bi ti bé, nyoo uu ngwañ* Yordan.+ 5 Ni yoñ ndik yihe le ni tibil tééda litiñ ni mbén ngwélél Yéhôva le Môsi a bi ti bé,+ le ni gwés Yéhôva Nyambe+ nan, le ni boñ mam momasôna a nkal bé,+ ni nôgôl mambén mé,+ ni bak ni tiñi ni nye,+ ni gwéélak ki nye+ ni ñem nan wonsôna, yak ni niñ*+ nan yosôna.”

6 I mbus, Yôsua a sayap bo, a huuha bo; ha nyen ba bi témb i boni.* 7 Môsi a bi ti pes litén i Manasé ngababum nyoo i Basan;+ yak ini pes litén ipe, Yôsua a ti bo nkoñ u u yé nyoo i pes hiôñg i Yordan,+ ipôla lôkisañ yap. Handugi hala, i ngéda Yôsua a bi huuha bo i boni, a sayap bo, 8 a kal bo le: “Ni huuna ngandak lingwañ, ni ngandak bilém kiyaga, ni silba, ni gôl, ni mamuna, ni kei,* ni ngandak mambot kiyaga.+ Yoña nkus+ u baoo banan, ni kabna wo lôñni lôkisoñ nan.”

9 I mbus hala, Lôk Ruben, Lôk Gad ni pes litén i Manasé ba bi bagla ni bana bon ba Israel bape. Ba nyodi i Silô, i loñ Kanaan, ba témb i nkoñ u Giléad,+ nkoñ ba bi ti bo kiki ngababum, i het ba bi yééne, kiki Yéhôva a bi kal Môsi.+ 10 I ngéda ba bi pam nyoo i minkoñ mi Kanaan mi mi yé bebee ni Yordan, Lôk Ruben, Lôk Gad ni pes litén i Manasé ba oñ juu li bisesema li li yé likeñi kiyaga. 11 I mbus, kiki bana bon ba Israel bape ba nok+ hala, ba kal le: “Lôk Ruben, Lôk Gad ni pes litén i Manasé ba ñoñ juu li bisesema i nwaa nkoñ u Kanaan, nyoo i minkoñ mi mi yé mu pes ba bi ti bés, bebee ni Yordan.” 12 I ngéda bon ba Israel ba bi nok hala, ntôñ wonsôna u bon ba Israel u kodba i Silô,+ inyu jôs bo gwét.

13 Ha nyen bon ba Israel ba bi om Finéhas,+ man prisi le Éléazar le a kee yak Lôk Ruben, Lôk Gad ni pes litén i Manasé i nkoñ u Giléad, 14 ba bi om nye ni 10 li baane, ñane wada inyu hiki litén li Israel; bobasôna ba bé baéga ba mandap ma bikôkôa, ni baane ba dikôô di bon ba* Israel.+ 15 I ngéda ba bi pam yak Lôk Ruben, ni Lôk Gad ni pes litén i Manasé, nyoo i nkoñ u Giléad, ba kal bo le:

16 “Lana nyen litén li* Yéhôva jolisôna li nkal: ‘Inyuki ni mboñ i béba jam ini inyu kolba Nyambe nu Israel?+ Ngo ni nkôm Yéhôva mbus i len ini, mu kiki ni ñoñ juu li bisesema, ni ndogbene ki Yéhôva.+ 17 Baa di ntehe le hihôha di bi boñ i Péôr hi bé bé hi kôli? Letee ni len, di yé ngi pubhana inyu hihôha hi, to hala kiki himala hi bi kwél litén li* Yéhôva.+ 18 Ndi bé, ni nsômbôl kôm Yéhôva mbus! Ibale ni ndogbene Yéhôva i len ini, wee ntôñ u Israel+ wonsôna won a ga unbene yani. 19 Nano ni, ibale loñ nan yon i yé nyega, wee lona nyono i loñ Yéhôva,+ i homa lap i Yéhôva i yéne,+ ni yén ki nyono ni bés. Ndi ni oñ bañ juu li bisesema lipe handugi juu li bisesema li Yéhôva Nyambe+ wés, tiga le ni kolba Yéhôva, ni boñ ki le yak bés di kolba nye. 20 I ngéda Akan+ man Zéra, a bi boñ jam libe, a nip i yom i bé lama tjiba, baa Nyambe a bi unbene bé litén li Israel jolisôna?+ Akan nyetama bé nyen a bi wo inyu liboñok jé libe.’”+

21 Ha nyen Lôk Ruben, Lôk Gad ni pes litén i Manasé ba bi timbhe baane ba dikôô di bon ba* Israel+ le: 22 “A Yéhôva, Nyambe nu banyambe!* A Yéhôva,+ Nyambe nu banyambe! Wen* u nyi, yak Israel a’ yi; ibale di bi kolba we a Yéhôva, di ndogbene ki we, wee u tohol bañ bés i len ini. 23 Ibale di bi oñ juu li bisesema inyu kôm Yéhôva mbus, ni inyu ti bisesema bi ntul i hié mu ngii, to makébla ma bijek, to bisesema inyu kôp nsañ, wee Yéhôva a kogse bés.+ 24 Ndi di mboñ hala inyu njom ipe, inyule di bi hoñol le i dilo di nlo, bon banan ba nla kal bon bés le: ‘Njee a nti bé kunde i bégés Yéhôva, Nyambe nu Israel lôñni bés?* 25 A bé Lôk Ruben, ni Lôk Gad, Yéhôva a bi bii Yordan le a ba nwaa nkoñ ipôla bés ni bé. Ni gwé bé kunde i bégés Yéhôva.’ Hala nyen bon banan ba nla sôña bon bés i bégés Yéhôva.”*

26 “Jon di bi kal le: ‘Di nlama ndik boñ jam. Di oñ juu li bisesema, he bé inyu ti bisesema bi ntul i hié, to inyu ti bini bisesema bipe, 27 ndi le i juu li bisesema li, li ba mbôgi ipôla bé ni bés+ lôñni bon* bés i mbus yés; le di ga ti Yéhôva bisesema bi ntul i hié, yak ni bini bisesema bipe, lôñni bisesema inyu kôp nsañ+ inyu bégés nye. Di bi boñ hala, le ndi bon banan ba kal bañ bon bés i dilo di nlo le: “Ni gwé bé kunde i bégés Yéhôva.”’ 28 Jon di bi kal le: ‘Ibale ba nkal bés ni bon* bés hala i dilo di nlo, ha nyen di ga timbhe le: “Ni béñge i juu lini, li mpôna juu li bisesema li Yéhôva, basôgôlsôgôl bés bon ba bi oñ jo, he bé inyu ti bisesema bi ntul i hié, to inyu ti bini bisesema bipe, ndi le li ba mbôgi ipôla bés ni bé.”’ 29 Bés di ta bé to le di hoñol i kolba Yéhôva,+ to kôm Yéhôva mbus len, le di oñ juu li bisesema lipe inyu ti bisesema bi ntul i hié mu ngii, to makébla ma bijek, to bisesema bipe, handugi juu li bisesema li Yéhôva Nyambe wés li li yé i bisu bi lap+ yé!”

30 I ngéda prisi le Finéhas, baane ba litén ni baane ba dikôô di bon ba* Israel ba ba bé lôñni nye ba bi nok i jam Lôk Ruben, Lôk Gad ni Lôk Manasé ba bi kal, hala a lémél+ bo. 31 Ha nyen Finéhas, man prisi le Éléazar, a bi kal Lôk Ruben, Lôk Gad ni Lôk Manasé le: “I len ini, di nyi le Yéhôva a yé ipôla yés, inyule ni mboñ bé béba jam inyu kolba Yéhôva. Nano, ni mboñ le bon ba Israel ba pei kogse i* Yéhôva.”

32 Ha nyen Finéhas, man prisi le Éléazar ni baane ba bi nyodi yak Lôk Ruben ni yak Lôk Gad, i nkoñ u Giléad, ba huu i Kanaan, ba añle bana bon ba Israel bape mam momasôna ma bi tagbe. 33 I ñañ unu u bi lémél bon ba Israel. Ha nyen bon ba Israel ba bi bégés Nyambe; ba kit le ba nke ha bé i jôs Lôk Ruben ni Lôk Gad gwét, to i tjé loñ i het Lôk Ruben ni Lôk Gad ba bé yééne.

34 Inyu hala nyen Lôk Ruben ni Lôk Gad ba bi ti i juu li bisesema lini jôl,* inyule ba bé kal le, “li yé mbôgi ipôla yés le Yéhôva nyen a yé bañga Nyambe.”