Bakéés

18 Ha ngéda i, kiñe i bé bé i loñ Israel.+ Mu dilo di, litén li Dan+ li bé yéñ homa liyééne, inyule li bé ngi kôhna ngababum kiki mana matén ma Israel+ mape.

2 Lôk Dan i bi pohol bôt batan ikété litén jap, ba bé yééne i Zôra ni i Éstaôl,+ ba om bo i hes loñ ni i wan yo. Lôk Dan i kal bo le: “Kena, ni wan loñ.” I ngéda i bôt batan bana ba bi pam i mbok dikôa i Éfraim, ba telep i ndap Mika,+ ba lal ha. 3 I ngéda ba bé bebee ni ndap Mika, ba yi kiñ i mañge wanda nu a bé man Lôk Lévi, ba kôôge nye bebee, ba bat nye le: “Njee a bi lona we hana? Kii u mboñ hana? Kii i nyégsa we i yén hana?” 4 A timbhe bo le: “Mika a bi bôñôl me jam hisém ni jam hikaa, a nsaa me le me gwélél nye nson u prisi.”+ 5 I mbus, ba kal nye le: “Soho, bat Nyambe too liké jés li ga tagbe loñge.” 6 Prisi i timbhe bo le: “Kena ni nsañ. Yéhôva a’ ba ni bé mu liké linan.”

7 I bôt batan bana ba bi nyodi ha, ba ke i Lais.+ Ba tehe le bôt ba tison i ba niñ botama kiki bôt ba Sidôn, ibabé le yom i héñél bo. Ba niñ ikété nsañ, ba nhégda bé le yom ibe i nla pémél bo,+ to ñane nu a ntét bo, a ta bé mu loñ inyu tééñga bo. Ba bé haa ni bôt ba Sidôn, ba bééna bé to maada ni matén mape.

8 I ngéda ba bi témb yak lôkisañ yap i Zôra ni Éstaôl,+ lôkisañ yap i bat bo le: “Mam ma ntagbe lelaa?” 9 Ba timbhe le: “Di kenek, di jôs bo, inyule di ntehe le nkoñ wap u yé loñge. Ni kon bañ woñi. Ni tiñha bañ i ke yoñ i nkoñ u. 10 I ngéda n’a pam nyoo, n’a koba bôt ba ba nhégda bé le yom ibe i nla pémél bo,+ yak nkoñ u yé nkeñi. Nyambe a mal ti bé wo, i homa nu a nhañ bé yom yo ki yo.”+

11 Ha nyen bon ba Dan ba bi nyodi i Zôra ni i Éstaôl+ inyu jo gwét, ba bé 600 bôt. 12 Ba bi bet i Kiriat-Yéarim+ i Yuda, ba yén ha. Inyu hala nyen ba nsébél i homa nu le Mahané-Dan*+ letee ni len, nyen a yé i pes hiôñg i Kiriat-Yéarim. 13 I mbus, ba ke i mbok dikôa i Éfraim, ba pam i ndap Mika.+

14 I bôt batan ba bi bôk ba hes nkoñ u Lais,+ ba kal lôkisañ yap le: “Baa ni nyi le éfôd ni bitérafim,* ni ntjok ôñgba ni ñôôk ôñgba*+ bi yé munu mandap mana? Ni nyi i jam ni nlama boñ.” 15 Ba bi telep ha, ba ke i ndap Mika i homa mañge wanda nu a yé man Lôk Lévi+ a bé yééne, ba bat nye too a yé mbôô. 16 Ha ngéda i, ini 600 bon ba Dan+ i i bé ke i jo gwét, i bi telep i lijubul li lipénd. 17 I bôt batan ba bi bôk ba hes nkoñ,+ ba bi jôp i ndap inyu yoñ ntjok ôñgba, éfôd,*+ bitérafim*+ ni ñôôk ôñgba.*+ (Prisi+ i bé i téé i lijubul li lipénd lôñni 600 bôt i i bé ke i jo gwét.) 18 Ba bi jôp i ndap Mika, ba yoñ ntjok ôñgba, éfôd,* bitérafim* ni ñôôk ôñgba.* Prisi i bat bo le: “Kii ni yé i boñ?” 19 Ndi ba kal nye le: “Mom nwee. Yip nyo, loo ni bés inyu boñ le u ba ntipék* wés ni prisi yés. Baa u ntehe loñge le u ba prisi i ndap mut+ wada tole u ba prisi inyu ngim litén tole ngandak mahaa i Israel?”+ 20 Prisi i kon maséé, i yoñ éfôd,* ni bitérafim,* ni ntjok ôñgba,+ i ke lôñni bo.

21 Ba jôp i njel. Ba bugus boñge, bilém ni nkus i bisu. 22 Kiki ba nke jôga li liké ni ndap Mika, i bôt ba bé yééne i mandap ma bé bebee ni ndap Mika, ba kodba, ba noñ bon ba Dan, ba koba bo. 23 I ngéda ba bi sébél bon ba Dan, bon ba Dan ba hielba, ba bat Mika le: “Kii i nke bé? Inyuki u noñ bés ni ngandak bôt?” 24 A kal bo le: “Ni nyoñ banyambe bem, ni kena yak prisi yem. Me nyégla bé to yom. Lelaa ni mbat me le: ‘Kii i nke bé?’” 25 Bon ba Dan ba timbhe le: “U bédés bañ kiñ i ngéda u mpôdôs bés; tiga le bôt ba nyai* ba kwél bé, ba nol bé ni mahaa manan.” 26 Bon ba Dan ba bi témb ba jôp i njel; kiki Mika a ntehe le ba nloo nye ngui, a hielba, a huu i mbai yé.

27 Kiki ba mal yoñ gwom bi Mika ni prisi yé, ba ke i Lais,+ i homa bôt ba bé niñ ikété nsañ, ba hégdaga bé le yom ibe i nla pémél bo.+ Ba nol i bôt ba lôñni pansoñ, ba ligis tison yap. 28 Mut nye ki nye a bé bé inyu sôñ tison i, inyule i bé haa ni Sidôn, ba bééna bé to maada ni matén mape, i bé ki i nsôsôgô* i Bét-Réhôb.+ Bon ba Dan ba tiimba oñ i tison i, ba yén mu. 29 Ba o ki tison le Dan,+ jôl li isañ wap le Dan, nu Israel+ a bi gwal. Ndi jôl li bisu li tison i li bé le Lais.+ 30 I mbus ngéda, bon ba Dan ba bi ôô ntjok ôñgba+ ha homa nu; Yônatan,+ man Gersôm,+ man Môsi nye ni bon bé bôlôm ba bi ba prisi inyu litén li Dan letee ni i ngéda loñ i bi ke i minkôm. 31 Ba bi téé ntjok ôñgba u Mika le bôt ba bégés wo, u bi yégle ki ha ntel wonsôna ndap i bañga Nyambe i bé i Silô.+