Bakéés

19 Mu dilo di, i ngéda kiñe i bé bé i loñ Israel,+ man Lôk Lévi wada a bé yééne haa ikétékété mbok dikôa i Éfraim,+ a bi ke i Bétléhém+ i Yuda a yoñ muda nyoo le a ba linyaa jé. 2 Ndi linyaa jé li bi ke i ndéñg, li yék nye, li témb i ndap isañ i Bétléhém i Yuda. Li yén ki nyoo sôñ ina. 3 I mbus ngéda, nlôm a bi ke i soohe nye le a témb; a ke lôñni ngwélél wé ni magas ima. Muda a bi leege nye i ndap isañ. I ngéda isañ muda a bi tehe nye, a leege nye ni maséé. 4 Nkil wé, hala wee isañ mañge muda, a soohe nye le a yén i nyeni dilo daa; ba bé je, ba nyok, i mut nu a lalak ha.

5 I hilo hi nyônôs ina, i ngéda ba bi pule telep inyu ke, isañ mañge muda a kal nkil wé le: “Je ndék bijek inyu bana ngui,* i mbus, n’a jôp i njel.” 6 Ha nyen ba bi yén, bo iba ba je, ba nyo; i mbus, isañ mañge muda a kal i mut nu le: “Soho, kônde lal hana, u kon ki maséé.”* 7 I ngéda mut nu a bi telep le a nkahal ke, nkil wé a témb a soohe nye, a lal ki ha.

8 I hilo hi nyônôs itan, i ngéda a bi pule telep kegla inyu ke, isañ mañge muda a kal nye le: “Je ndék bijek inyu bana ngui.* Ba tégbaha ki ngéda letee kôkôa i kwo, bo iba ba jek ndigi. 9 I ngéda mut a bi telep ni linyaa jé ni ngwélél wé le a nkahal ke, nkil wé hala wee isañ mañge muda, a kal nye le: “Béñge ki! U u nkahal sude. Soho, lal ki hana. Kel i yé i ke. Lal hana, u kon ki maséé. Yani, n’a pule telep, ni jôp i njel, u huu i mbai* yoñ.” 10 Ndi mut nu a bééna ha bé ki ngôñ i lal ha, a telep, a ke letee ni i Yébus, hala wee i Yérusalem.+ A bé lôñni linyaa jé, ni gwélél wé ni magas mo ima ma ma bééna mambegee.

11 I ngéda ba bi pam bebee ni Yébus, u u bi bôdôl sude. Ngwélél a kal nwet wé le: “Baa di nla telep hana i tison i Lôk Yébus, di lal ha?” 12 Nwet wé a timbhe nye le: “Di telep bañ i tison i bakén ba bôt, i homa bon ba Israel ba ta bé. Di kenek letee ni i Gibéa.”+ 13 I mbus, a kal ngwélél wé le: “Di kenek, di noode pam i Gibéa tole i Rama;+ d’a lal i tison yada ikété bitison bi.” 14 Ba kônde ke ni bisu, hiañgaa i bi bôdôl nañal i ngéda ba bi pam bebee ni Gibéa nu a yé nkoñ u Benyamin.

15 Ba telep ha, ba jôp i tison Gibéa inyu tégbaha u. Kiki ba njôp, ba yén i ñem mbégdé u tison, ndi mut to wada a bi top bé yoñ bo le ba lal i nyeni.+ 16 Sôk i nsôk i kôkôa i, mañ mut wada u bé lôl i wom. Hala a bé ndék ngéda le a bé yééne i Gibéa, a bé mut mbok dikôa i Éfraim;+ ndi bôt ba tison i, ba bé bon ba Lôk Benyamin.+ 17 I ngéda mañ mut u bi tehe nkén mut a yii i ñem mbégdé u tison, a bat nye le: “U nke hee? U nlôl hee?” 18 A timbhe nye le: “Di nlôl i Bétléhém i Yuda, di nke haa ikétékété mbok dikôa i Éfraim, nyoo nyen mbai yem i yé. Me bak i Bétléhém i Yuda,+ nano me yé ke i ndap Yéhôva,* ndi mut nye ki nye a nleege bé me i ndap yé. 19 Di gwé bijek inyu magas+ més, di gwé ki bret+ ni wai inyu yem ni inyu muda ni ngwélél wés. Yom yo ki yo i nhéñél bé bés.” 20 Mañ mut u kal nye le: “Nsañ u ba ni we! Hiki jam li ga béda we, m’a ti we jo. Ndi u nañal bañ i ñem mbégdé.” 21 Mañ mut u u yoñ nye i ndap yé, u ti magas bijek. I mbus, ba jôwa makôô map, ba je, ba nyo.

22 Ba bé tégbaha loñge ngéda, ha nyen bibéba bi bôt bi tison bi bi kéña ndap, bi bôdôl kumb likôga, bi kalak i mañ mut u bé nwet ndap le: “Pémés i mut a jôp i weeni inyu boñ le di lalna nye.”+ 23 Nwet ndap a pam, a kal bo le: “To, a bilôk bikéé, ni boñ bañ béba. Soho, i mut nunu a yé nkén wem. Ni boñ bañ i jam li wonyuu lini. 24 Me gwé ngond yem i i yé konji ni linyaa li mut nunu. Ibale ni ngwés, me pémés bo, ni lalna bo*+ kiki ni nla. Ndi ni wéha bañ i mut nunu nyuu.”

25 Ndi bôt ba bi tjél emble nye, ha nyen man Lôk Lévi a bi gwel linyaa+ jé, a pémés nye. I bôt ba, ba lalna nye u wonsôna, ba tééñga ki nye letee ni maye ma kel. I maye ma kel, ba nwas nye le a kenek. 26 Kegla tutu, muda a lo, a kwo i lijubul li ndap mañ mut, i homa nlô wé a bé, a kida a niñi ha letee kel i ye. 27 I ngéda, nlôm a bi tôde kegla, a yibil likôga li ndap le a jôp njel, a koba muda, linyaa jé, a niñi i lijubul li ndap, moo mé ma ma yoomba i nwemel. 28 A kal muda le: “Telep, di kenek.” Ndi muda a bi timbhe bé. Ha nyen mut a bi begee nye, a bédi nye i ngii jagas, a kahal huu i mbai yé.

29 Kiki a pam i ndap yé, a yoñ ngwende ba nôlôl binuga, a kit linyaa jé bikét bikét, 12 bikét; a ômle hiki litén li Israel két yada. 30 I bôt bobasôna ba bi tehe i jam li, ba kal le: “I nya jam ini i bi bôk bé i bôña, to mut a yé ngi tehe i nya jam ini ibôdôl nu bon ba Israel ba bi pam i Égiptô letee ni len. Tiblana wan i jam lini,* tina mahoñol+ manan, ni kal bés i jam di nlama boñ.”