Yérémia
52 Sédékia+ a bééna 21 nwii i ngéda a bi yila kiñe, a ane 11 nwii i Yérusalem. Jôl li nyañ li bé le Hamutal;+ a bé ngond Yérémia, nu a bé lôl i Libna. 2 Sédékia a bé boñ mam mabe i mis ma Yéhôva, kiki Yéhôyakim a bi boñ.+ 3 I mam mana ma bi bôña i Yérusalem ni i Yuda, inyule Yéhôva a bé ñunbak. Jon a bi héya bo i bisu gwé.+ Sédékia a bi bédél kiñe Babilôn.+ 4 I nwii mi nyônôs 9 mi ane i Sédékia, i hilo hi nyônôs 10 hi sôñ i nyônôs 10 nyen Nébukadnézar,* kiñe Babilôn, a bi leñ Yérusalem gwét. Nye ni ntôñ wé gwét ba yén bebee ni tison Yérusalem, ba kéña yo, ba oñ ki lipénd li biték mu mapañ ma tison momasôna.+ 5 Ba bi kéña tison letee ni i nwii mi nyônôs 11 mi ane i Kiñe Sédékia.
6 I hilo hi nyônôs bôô hi sôñ i nyônôs ina,+ njal i bé nnayak mu tison, to bôt ba loñ+ ba bééna ha bé bijek. 7 Sôk i nsôk, bôt ba Kaldéa ba bôk homa wada mu lipénd li tison. Kiki ba nkahal tjama ni tison yosôna, bisônda bi tison gwobisôna bi so, bi nyodi tison juu ni juu, bi lôô i njel wom mbônji u kiñe, bi tagbene i nwemel u yé ipôla mapénd mo ima, bi yoñ njel i nke i Araba.+ 8 Ndi ntôñ gwét u bôt ba Kaldéa u noñ Kiñe Sédékia,+ u gwel nye i ñoñ u u nkéña Yérikô, bôt bé ba gwét bobasôna ba ke ngwéé, ba yék nye. 9 Hala nyen ba bi gwel Kiñe Sédékia, ba kena nye yak kiñe Babilôn i Ribla, i nkoñ u Hamat, a pémhene nye mbagi nôgôs. 10 Kiñe Babilôn i nol bon ba Sédékia i bisu gwé, i nol yak baane ba loñ Yuda bobasôna ha i Ribla. 11 I mbus, kiñe Babilôn i tôp Sédékia mis,+ i kañ nye ni minsañ mi mamuna, i kena nye i Babilôn, i ha nye i mok letee ni kel nyemb yé.
12 I hilo hi nyônôs 10 hi sôñ i nyônôs itan, hala a yé i nwii mi nyônôs 19 mi ane i kiñe Babilôn le Nébukadnézar,* nyen Nébusaradan nu a bé ñane batat kiñe, ni ngwélél kiñe Babilôn, a bi lo i Yérusalem.+ 13 A ligis ndap Yéhôva,+ ni ndap* kiñe, ni mandap ma Yérusalem momasôna; a ligis yak mandap makeñi momasôna. 14 Yak ntôñ gwét u bôt ba Kaldéa wonsôna u u bé lôñni ñane batat kiñe u bôk mapénd ma ma bé kéña Yérusalem.+
15 Nébusaradan, ñane batat kiñe, a yoñ ngim diyeyeba di bôt, ni bôt bobasôna ba bi yégle mu tison, a kena bo i minkôm. A bi kena yak i bôt ba bi so inyu ke i pes i kiñe Babilôn, lôñni bôt ba gwé likeñge i gwel minson.+ 16 Ndi Nébusaradan, ñane batat kiñe, a bi yék ndék diyeyeba di bôt mu loñ, le ba sal nwom mi minkôô mi wai, a nyégsa ki bo i sal bibôlô bi wom bipe.+
17 Bôt ba Kaldéa ba nyagat ki mél ma mamuna+ ma ndap Yéhôva, ni bikak bi mamuna,+ ni soso pan i mamuna ba bé sébél le Tuye,+ i i bé mu ndap Yéhôva; ba kena mamuna momasôna i Babilôn.+ 18 Ba yoñ ki minlôñga, bisoble, bilimil bi hié, biséya,+ mabôndô,+ ni bisélél bi mamuna gwobisôna ba bé gwélél inyu nson u témpel. 19 Ñane batat kiñe a yoñ ki bibômbôô bi bipan,+ bibeglene bi hié, biséya, minlôñga, bitééne bi bilambe,+ mabôndô; a yoñ yak biséya bi bi bé ni bañga gôl, lôñni biséya bi bi bé ni bañga silba.+ 20 I gwom Kiñe Salômô a bi boñ inyu ndap Yéhôva, hala wee mél mo ima, soso pan ba bé sébél le Tuye, ni 12 nyaga i mamuna+ i i bé isi Tuye, lôñni bikak, mut a bé bé le a hek mamuna ma gwom bini gwobisôna i kilô.
21 Inyu mél, hiki jél li bééna ntel u 18 dikéñéé di moo,* i bé béda nkôô u 12 dikéñéé di moo inyu hek bikeñi bi hiki jél;+ mbibi i jél i bé kiki mbibi i dinoo* dina le mut a ñat, hiki jél li bé hôlô ikété yé. 22 I dikôtô di bé i ngii mél di bé ni mamuna, di ban-ga ntel u dikéñéé di moo ditan.+ Minkébék mi minsañ mi bikei, ni matam ma grénad ma ma bé nkañak mu mapañ ma hiki hikôtô, gwobisôna bi bé ni mamuna. Mél mo ima ma bé nlélém, yak matam map ma grénad. 23 Matam ma grénad ma ma bé nene mu mapañ ma dikôtô ma bé 96; ndi matam ma grénad momasôna mu minkébék mi minsañ mi bikei+ ma bé 100.
24 Ñane batat kiñe a yoñ ki prisi keñi le Séraya,+ a yoñ yak prisi i nyônôs iba le Sôfônia,+ ni batat nwemel+ bo baa, a kena bo. 25 Mukété tison, a yoñ ki mut ngomin nu ndap kiñe nu a bé ane bôt ba gwét, a yoñ yak batipék basaambok ba kiñe lôñni mut matila nu ñane bôt ba gwét, (i mut matila nu nyen a bé yoñ bôt i ntôñ gwét) lôñni 60 ma bôlôm ba litén ba ba bé ba ngi yii mu tison. 26 Nébusaradan, ñane batat kiñe, a gwel bo, a kena bo yak kiñe Babilôn i Ribla. 27 Kiñe Babilôn i nol bo i Ribla,+ mu nkoñ u Hamat. Hala nyen ba bi héya bôt ba Yuda mu loñ yap, ba kena bo i minkôm.+
28 I bôt bana bon Nébukadnézar* a bi kena i minkôm: i nwii mi nyônôs minsaambok mi ane yé, a bi kena 3 023 bon ba Lôk Yuda.+
29 I nwii mi nyônôs 18 mi ane i Nébukadnézar,*+ 832 bôt yon i bi ke minkôm, ba lôlak i Yérusalem.
30 I nwii mi nyônôs 23 mi ane i Nébukadnézar,* Nébusaradan ñane batat kiñe a bi kena 745 bon ba Lôk Yuda i minkôm.+
I bôt bobasôna ba bi kena i minkôm ba bé 4 600.
31 I mbus ngéda, i nwii mi nyônôs 37 mi maké ma minkôm ma kiñe Yuda le Yéhôyakin,+ i hilo hi nyônôs 25 hi sôñ i nyônôs 12 nyen kiñe Babilôn le Évil-Mérôdak a bi pémés kiñe Yuda le Yéhôyakin i ndap mok;+ i nwii u nyen Évil-Mérôdak a bi yila kiñe. 32 A pôdôs Yéhôyakin loñge, a ti ki nye lipém iloo bikiñe bipe bi bi bé i minkôm ni nye i Babilôn. 33 Yéhôyakin a bi héya mambot mé ma mok. A bé je i téblé kiñe mu nwii mi nsôk mi niñ yé. 34 Niñ yé yosôna, kiñe Babilôn i bé ti nye yé ngaba bijek hiki kel letee ni i nyemb yé.