Kaat bisu i Miñañ

26 Mintôñ mi batat manwemel+ mini: ikété Lôk Kôra, Mésélémia+ man Kôré, nu a bé i mbôda Asaf. 2 Mésélémia a bi bana bon bôlôm: mbôkgwéé le Sakaria, nu yônôs iba le Yédael, nu yônôs aa le Zébadia, nu yônôs ina le Yatniel, 3 nu yônôs itan le Élam, nu yônôs isamal le Yéhôhanan, nu yônôs isaambok le Éliô-Énai. 4 Ôbed-Édôm a bi bana bon bôlôm: mbôkgwéé le Sémaya, nu yônôs iba le Yéhôsabad, nu yônôs aa le Yôa, nu yônôs ina le Sakar, nu yônôs itan le Nétanel, 5 nu yônôs isamal le Amiel, nu yônôs isaambok le Isakar, nu yônôs juem le Pélétai; inyule Nyambe a bi sayap Ôbed-Édôm.

6 Yak man wé Sémaya a bi bana bon bôlôm ba ba bé baéga ba ndap yap bikôkôa, inyule ba bééna ngui, ba ban-ga ki ngap i sal bôlô. 7 Bon ba Sémaya le: Ôtni, Réfael, Ôbed ni Elzabad; yak ni lôkisañ yé Élihu ni Sémakia, yak bo ba bééna ngap i sal bôlô. 8 Bobasôna ba bé mbôda Ôbed-Édôm; bo ni bon bap ni lôkisañ ba bééna ngap i sal bôlô, ba salak ki bôlô ilam; mbôda Ôbed-Édôm i bééna 62 bôt. 9 Bon ba Mésélémia+ ni lôkisañ ba bé 18. 10 Yak Hôsa nu a bé lôl i mbôda Mérari, a bi bana bon bôlôm. Simri nyen a bé ñéga, to hala kiki a bé bé man nu mañ, isañ a bi téé nye ñane, 11 nu yônôs iba le Hilkia, nu yônôs aa le Tébalia, nu yônôs ina le Sakaria. Bon ba Hôsa bobasôna ni lôkisañ ba bé 13.

12 Ikété mintôñ mi batat manwemel mini, baane ba bé gwel nson kiki lôkisañ yap i ndap Yéhôva. 13 Ba bi leñ mbam+ inyu pohol njee ikété mandap ma bikôkôa a ntat umbe nwemel, ba bi boñ hala inyu ndap bikôkôa ititigi ni ikeñi. 14 Mbam i kwo le pes likôl i yé inyu Sélémia. I mbus, ba leñ mbam inyu man wé Sakaria, a bé nti maéba nu a gwé pék, mbam i kwo le a nke i pes ñombok. 15 Mbam i bi kwo inyu Ôbed-Édôm i pes nwelmbok, ba om bon+ bé i mandugi. 16 Mbam i bi kwo le Supim ni Hôsa+ ba nke i pes hiôñg, bebee ni nwemel u Saléket, ipañ nloñ nkeñi u nke i mabeda; ntôñ wada u batat manwemel u bé ipañ ntôñ umpe. 17 Bon ba Lôk Lévi ba bé basamal i pes likôl; ba-na i pes ñombok hiki kel; ba-na i pes nwelmbok hiki kel; ndi i mandugi,+ ba bé iba iba. 18 Inyu libebe li yé i pes hiôñg, bôt ba-na ba bé i nloñ nkeñi,+ iba ba bak i libebe. 19 Mintôñ mi batat manwemel mi Lôk Kôra ni mi Lôk Mérari mi.

20 Ikété Lôk Lévi, Ahiya nyen a bééna nson i tééda matéédana* ma nkus ma ndap i bañga Nyambe, ni bahoma ba bé téédana gwom bipubhaga.*+ 21 Bon ba Ladan, hala wee bon ba man Lôk Gersôn, nu a bé i mbôda Ladan, baéga ba mandap ma bikôkôa ba Ladan, man Lôk Gersôn, bana: Yéhieli+ 22 ni bon ba Yéhieli, Zétam ni manyañ le Yôel. Ba bééna nson i tééda matéédana* ma nkus ma ndap Yéhôva.+ 23 Ikété Lôk Amram, Lôk Izhar, Lôk Hébrôn ni Lôk Uziel,+ 24 Sébuel man Gersôm, man Môsi nyen a bé ane bôt ba nsal i mandugi. 25 Lôkisañ i i yé mbôda Éliézer+ i bé le: Réhabia,+ Yésaya, Yôram, Zikri ni Selômôt. 26 I Selômôt nunu ni lôkisañ bon ba bé gwel nson i bahoma bobasôna ba ntéédana gwom bipubhaga.+ I gwom bipubhaga bi, Kiñe David+ ni baéga ba mandap ma bikôkôa,+ ni baane ba dikôô di bôt, ni baane ba mbôgôl bôt, ni baane ba mintôñ mi gwét bon ba bi téé gwo bipubhaga. 27 Ikété gwom ba bi kadal+ i gwét,+ ba bi téé ngim gwom bipubhaga inyu tibil ndap Yéhôva; 28 yak ni gwom gwobisôna ntehemam+ le Samuel, Saulô man Kis, Abner+ man Ner, ni Yôab+ man Séruya+ ba bi téé bipubhaga. Hiki yom mut a bé le a téé ipubhaga, Sélômit* ni lôkisañ bon ba bé tééda yo.

29 Ikété Lôk Izhar,+ Kenania ni bon bé ba bé sal bé ikété ndap Nyambe, ba bé gwel ngim minson mi ngomin, ba bé bôt ba ngomin ni bakéés+ i Israel.

30 Ikété Lôk Hébrôn,+ Hasabia ni lôkisañ, 1 700 bôt ba ba bééna ngap i sal bôlô, ba bé bôt ba ngomin i Israel, i pes hiôñg i Yordan; bon ba bé éga nson wonsôna u Yéhôva ni nson u kiñe. 31 Yériya+ nyen a bé ñéga nu bon ba Lôk Hébrôn kiki bikaat bi mahaa bi ndap yap bikôkôa bi ñunda. I nwii mi nyônôs 40 mi ane i David+ nyen ba bi yéñ ikété bon ba Lôk Hébrôn, ba léba bôt i Yazer+ nu a yé i Giléad, mimpémba mi bôt ni bôt ba ba bééna ngap i sal bôlô. 32 Lôkisañ yap i bé 2 700 i bôt ba ba bééna ngap i sal bôlô, ba bak baéga ba mandap ma bikôkôa. Kiñe David a bi téé bo le ba ane litén li Ruben, litén li Gad ni pes litén i Manasé inyu hiki jam li mbéñge bañga Nyambe ni hiki jam li mbéñge kiñe.