Hiôb
8 I mbus, Bildad,+ man Lôk Sua,+ a timbhe, a kal le:
2 “Letee ni ngéda mbe u ga pot hala?+
Bibañga bi nyo woñ bi yé ndik mbuk mbebi!
3 Baa Nyambe a ga kôde mbagi sép,
tole Nu ngui yosôna a ga kôde telepsép?
4 Ibale bon boñ ba mboñ Nyambe béba,
yak nye a nwas le ba kôhna kogse inyu ndok yap;*
5 ndi ibale wemede u bak le u yéñ Nyambe,+
u yemhe ki Nu ngui yosôna,
6 ibale u pôbôk yaga, u bak ki u téé sép,+
ki a ntat we,*
a timbis ki we i homa u kôli ba.
7 To ibale i bibôdle, u bé yañga mut,
i lisuk, w’a ba bañga mut.+
8 Soho, bat le i hiai hi mal tagbe,
u yéñ ki yi i mam basañ bap ba bi léba.+
9 Inyule bés di bi gwéé ndik yani, di nyi bé to yom,
inyule dilo tjés hana ’isi di yé nhubuk.*
10 Bat hiai hi mal tagbe, baa hi ga niiga bé we,
to kal we i mam hi nyi?*
11 Baa loloo* i ga o i homa jambô* li ta bé?
Baa likai li ga nañ ngi malép?
12 I ngéda li ngi yii yômi, bo ngi nup jo,
li ga hoo kôt iloo bini bebela bipe.
13 Hala nyen yak lisuk li* bôt bobasôna ba nhôya Nyambe li yé,
inyule i yom béba mut* i mbem i ga bôña bé,
14 i yom a gwééne mapida i yé yañga,
yak i yom a mbôdôl ñem i yé kiki ndes libôbôl.*
15 A’ nigbene ndap yé, ndi i ga yégle bé i téé;
a’ noode gwelba mu, ndi i ga nom bé.
16 A yé kiki bebela ba nkôp malép i ngéda hiañgaa,
i ngéda i ño, i ñandal mu wom u mbônji.+
17 Minkañ nwé mi nliibana ikété nwind u ngok;
a nyéñ ndap ipôla ngok.*
18 Ndi i ngéda ba nup* nye i homa wé,
homa wé nyemede a’ tañba nye, a kalak le: ‘Me maa bé tehe we.’+
19 Ñ, hala nyen a’ ba ha bé;+
bibebela bipe bi ga o i homa wé.
20 Ibabé pééna, Nyambe a’ tjôô bé i mut a yé ngi nsohi,
to nit, a ga nit bé* bibéba bi bôt,
21 inyule a ga témb a yônôs nyo woñ ni hiol,
yak bibép gwoñ ni diléla.
22 I bôt ba ñoo we ba ga haba wonyuu,
to ndap libadô i bibéba bi bôt i ga ba ha bé.”