Kaat bisu i Miñañ
13 David a bi sébél baane ba dikôô ni baane ba mbôgôl ni baéga+ bobasôna, ba kwel. 2 I mbus, David a kal litén li Israel jolisôna le: “Ibale hala a nene loñge i mis manan, ibale hala a nlémél ki Yéhôva Nyambe wés, di ômle bilôk bikéé gwés nwin, bi bi nyégle i minkoñ mi Israel nwominsôna, yak ni biprisi ni Lôk Lévi i i yé i bitison+ gwap ni i minkoñ nwap,* le ba loo, ba koba bés. 3 Di kee di yoñ nkuu Malômbla+ u Nyambe wés.” A bi pot hala inyule bon ba Israel ba bi yoñ bé ngéda ni wo i dilo di Saulô.+ 4 Litén jolisôna li bi neebe i boñ hala, inyule i jam li, li bi lémél bôt bobasôna. 5 David a bi kot litén li Israel jolisôna, ibôdôl i lom* Égiptô nu a yé i Lébô-Hamat,*+ le ba begee nkuu Malômbla u bañga Nyambe u u yé i Kiriat-Yéarim.+
6 David ni bon ba Israel ba ke i Baala,+ hala wee Kiriat-Yéarim nu a yé i Yuda, le ba begee nkuu Malômbla u bañga Nyambe le Yéhôva, nu a yii i yééne yé ane i ngii* bikérubim;+ i bisu bi Nkuu nyen bôt ba nsoohe Nyambe.* 7 Ba ke i ndap Abinadab. Ndi ba yoñ Nkuu u bañga Nyambe, ba bédi wo i ngii kak+ i mondo; Uza bo Ahiô bon ba bé kena kak.+ 8 David ni bon ba Israel bobasôna ba bé séé i bisu bi bañga Nyambe ni ngui yap yosôna, ba tôbôk tjémbi, ba kôdôk diluñ ni bikôkôda bi manganda bipe, dingoma,+ bibende bi mamuna+ ni sép.+ 9 Ndi kiki ba mpam bebee ni litidil li Kidon, Uza a leñ woo, a gwel nkuu Malômbla inyule nyaga i bé sômbôl kwés wo ’isi. 10 Ha nyen Yéhôva a bi unbene Uza ngandak, a nol nye inyule a bi leñ woo, a tihba nkuu Malômbla.+ Uza a bi wo ha, i bisu bi Nyambe.+ 11 Ndi ñem u bi hénd* David inyule Yéhôva a bi unbene Uza; inyu hala nyen ba nsébél i homa nu le Péres-Uza* letee ni i len ini.
12 David a bi kon bañga Nyambe woñi i kel i, a kal le: “Lelaa ni me nla boñ inyu lona Nkuu u bañga Nyambe i meeni?”+ 13 David a bi kena ha bé nkuu Malômbla i Nkoñ u David, i homa a bé yééne, ndi a bi boñ le ba kena wo i ndap Ôbed-Édôm mut Gat. 14 Nkuu Malômbla u bañga Nyambe u bi ke i lihaa li Ôbed-Édôm, u yén nyoo i ndap yé sôñ aa; Yéhôva a bé sayap lihaa li Ôbed-Édôm, yak ni gwom gwobisôna a bé a gwé.+