Ézékiel
32 I nwii mi nyônôs 12, i hilo hi bisu hi sôñ i nyônôs 12, Yéhôva a pôdôs ki me, a kal le: 2 “A man mut, tôp hiémbi hi maéya inyu Faraô, kiñe Égiptô, u kal nye le:
‘U bé mpémba man mbondo njéé* ikété biloñ,
ndi ba bi yip we nyo.
3 Lana nyen Nwet Bayemlikok le Yéhôva a nkal:
‘M’a kot ngandak biloñ, me gwélél ki gwo inyu leñ mbunja yem i ngii yoñ,
bo ki bon b’a pémés we i malép, u bak mu mbunja yem.
4 M’a lep we i bikai,
me tjôô ki we i nkoñngii.
M’a boñ le dinuni tjodisôna di bedep i ngii yoñ,
me ti ki we binuga bi bikai bi hisi hiosôna le bi je we, bi nuu.+
5 M’a lep minsôn nwoñ i dikôa,
me yônôs ki minsôsôgô ni gwom bi nyégle mu nyuu yoñ.+
6 M’a yôôs ki loñ ni matjél moñ letee ni i ngii dikôa;
ñ, matjél moñ m’a yon mu balom.’*
7 ‘I ngéda u ga tjiba, m’a hô ngii, me boñ le i tjôdôt di yé mu di kôp jiibe.
M’a boñ le ond i hô hiañgaa,
to sôñ i ga béyés bé mapubi mé.+
8 Inyu yoñ nyen m’a boñ le i gwom gwobisôna bi mbéyés mapubi i ngii bi kôp jiibe,
me boñ ki le jiibe li hô loñ
yoñ,’ hala nyen Nwet Bayemlikok le Yéhôva a mpot.
9 ‘M’a boñ le ngandak matén i nok njôghe i ñem i ngéda m’a kena bôt ba yé i minkôm i weeni i biloñ bipe,
i biloñ u bi yi bé.+
10 M’a boñ le ngandak matén i kon woñi kiyaga,
yak bikiñe gwap bi ga sehla ngandak inyu yoñ i ngéda m’a pa pansoñ yem i bisu gwap.
Ba ga waa bé sehla, inyule bobasôna ba ga kon woñi i nimis biniñ gwap
i kel u ga beha ’isi.’
11 Inyule lana nyen Nwet Bayemlikok le Yéhôva a nkal:
‘Pansoñ i kiñe Babilôn i ga kwél we.+
12 M’a boñ le mamut ma nôla ni paminsoñ i mimpémba mi bôt ba gwét,
bobasôna ba ga ba bôt ba nlôôha béba ikété biloñ.+
Ba ga suhus ngôk u Égiptô, yak mamut mé momasôna ma ga tjiba.+
13 M’a tjé bilém gwé gwobisôna bi bi yé bebee ni ngandak malép,+
to kôô u mut binam, to pal i lém i ga tuñgul ha bé mo kekikel.’+
14 ‘Ha ngéda i, m’a pubus malép map,
me boñ ki le balom bap ba kuli kiki môô,’ hala nyen Nwet Bayemlikok le Yéhôva a mpot.
15 ‘I ngéda m’a yilha Égiptô ñoñ, loñ i het ba bi yoñ gwom gwobisôna bi bé mu,+
i ngéda m’a tjé i bôt bobasôna ba nyééne mu,
ha nyen b’a yi le men me yé Yéhôva.+
16 Hiémbi hi maéya hini, hion bôt ba ga tôp;
bingond bi biloñ bi ga tôp hio.
Bi ga tôp hio inyu bigda Égiptô ni mamut mé momasôna,’ hala nyen Nwet Bayemlikok le Yéhôva a mpot.”
17 Ndi i nwii mi nyônôs 12, i hilo 15 hi sôñ, Yéhôva a pôdôs me, a kal le: 18 “A man mut, bégél inyu mamut ma Égiptô, u suhus bo nyoo ikété ’isi, nye ni bingond bi mimpémba mi biloñ, lôñni ba ba nsôs ikété bee.*
19 “‘U yé nlam iloo njee? Sôs, u nañal lôñni bongikweeba!’
20 “‘Bôt ba Égiptô ba ga kwo ipôla ba ba nôla ni pansoñ.+ Égiptô a ntjiba ni pansoñ. Yoña nye, ni kena nye haa, nye ni mamut mé momasôna.
21 “‘Ibôdôl nyoo ikétékété Soñ,* mimpémba mi bôt ba gwét mi ga pôdôs Faraô lôñni ba ba nit nye. Ba ga nôla ni pansoñ, ba bak ba niñi mim kiki bongikweeba ba ba bi nôla ni pansoñ. 22 Nyoo nyen Asiria ni bôt bé ba gwét bobasôna ba yéne. Bisoñ gwap bi nkéña nye:* bobasôna ba bi nôla ni pansoñ.+ 23 Bisoñ gwé bi yé ikétékété bee,* yak mim mi bôt bé ba gwét mi nkéña soñ yé: bobasôna ba bi nôla ni pansoñ, inyule i ngéda ba bé ba ngi yii i niñ, ba bé kônha bôt woñi kiyaga.
24 “‘Nyoo nyen Élam+ a yéne, mim mi mamut mé momasôna ma nkéña nye: bobasôna ba bi nôla ni pansoñ. Ba bi sôs ni wonyuu nyoo ikété ’isi,* inyule i ngéda ba bé ba ngi yii i niñ, ba bé kônha bôt woñi kiyaga. Nano, ba ga wo yaga nyuu lôñni ba ba nsôs ikété bee.* 25 Ba bi tégél nye nañi ipôla ba ba bi nôla, mim mi mamut mé momasôna ma bé kéña bisoñ gwé. Bobasôna ba yé bongikweeba, ba bi nôla ni pansoñ, inyule i ngéda ba bé ba ngi yii i niñ,* ba bé kônha bôt woñi kiyaga; ba ga wo yaga nyuu lôñni ba ba nsôs ikété bee.* Ba bi niñi nye ipôla ba ba bi nôla.
26 “‘Nyoo nyen Mések bo Tubal+ ba yéne, yak mamut map* momasôna. Bisoñ gwap* bi nkéña nye. Bobasôna ba yé bongikweeba, pansoñ i mal tôp bobasôna, inyule i ngéda ba bé ba ngi yii i niñ, ba bé kônha bôt woñi kiyaga. 27 Baa ba ga nañal bé lôñni mimpémba mi bôt ba gwét, bongikweeba, mi mi bi kwo, mi sôs ki i Soñ* ni bijôl gwap bi gwét? Ba ga bii paminsoñ yap isi miño nwap,* yak kogse i bibéba gwap i ga kwél bo i ngii bihés, inyule i mimpémba mi bôt mini mi bi kônha bôt woñi kiyaga i ngéda mi bé mi ngi yii i niñ. 28 Ndi we, u ga nyugdana ipôla bongikweeba, u nañal ki ni ba bobasôna ba bi nôla ni pansoñ.
29 “‘Nyoo nyen Édôm+ a yéne, bikiñe gwé ni baane bé bobasôna ba bi nañal lôñni ba bobasôna ba bi nôla ni pansoñ to hala kiki ba bé mimpémba mi bôt; yak bo ba ga nañal ni bongikweeba+ lôñni ba ba nsôs ikété bee.*
30 “‘Nyoo nyen baane ba ñombok bobasôna ba yéne, yak bôt ba Sidôn bobasôna+ ba ba bi sôs i soñ ni wonyuu lôñni ba ba bi nôla, to hala kiki ngui yap i bé tinde bôt i kon bo woñi. Ba ga nañal, bongikweeba yaga, lôñni ba ba bi nôla ni pansoñ, ba wo ki nyuu lôñni ba ba nsôs ikété bee.*
31 “‘Faraô a ga tehe bobasôna; i mam momasôna ma nkwél mamut mé ma ga ti nye hogbe;+ Faraô ni ntôñ wé gwét wonsôna ba ga nôla ni pansoñ,’ hala nyen Nwet Bayemlikok le Yéhôva a mpot.
32 “‘Kiki Faraô ni mamut mé momasôna ba bé kônha bôt woñi i ngéda ba bé ba ngi yii i niñ, ba ga juba ni bongikweeba, lôñni ba bobasôna ba bi nôla ni pansoñ,’ hala nyen Nwet Bayemlikok le Yéhôva a mpot.”