Yésaya
27 I kel i, Yéhôva a ga gwélél pansoñ yé ikeñi i i nhoo, i kônhaga woñi,+
inyu kogse Léviatan,* nyoo i i ñôdba,
Léviatan, nyoo i i nkiiba,
a ga nol nuga ikeñi i i yé ikété tuye.
2 I kel i, ni ga tubul nye* i hiémbi hini:
“Wom u minkôô mi wai u nti wai i i mpam lihus!+
3 Me Yéhôva, men me ntat nye.+
Me nkôp nye malép hiki ngéda.+
Me ntat nye juu ni njamuha,
mut nye ki nye a mboñ bé nye béba.+
4 Hiun hi ta bé me i ñem.+
Ndi ibale mut a mbel biloo ni bikai mu wom wem u minkôô mi wai, m’a jôs nye.
M’a tidbe gwo, me ligis gwobisôna.
5 Ibale hala bé, a loo a solop i lisolbene jem li ngui.
A kôp nsañ ni me;
ñ, a kôp yaga nsañ ni me.”
7 Baa nu a mbép nye, a nlama bép nye i nya ndôm i?
Baa a nlama nôla kiki a bi nol bôt bape?
8 U ga jôs nye lôñni nlondok, u huuha ki nye.
W’a luhul nye lôñni ngui nhébék woñ, i kel mbebi i nlôl likôl y’a hôñ.+
9 Haana nyen béba i Yakôb i ga nwéhlana,+
i mam mana mon a ga boñ i ngéda béba yé i nséha:
a ga nyugut ngok yosôna i juu li bisesema,
kiki ba nyugut pem,
10 Inyule bôt ba ga tjôô tison i i gwé mapénd ma ngui;
bahoma binuga bi njél bikai ba ga yégle hôlô kiki ñoñ.+
Nyoo nyen man nyaga a ga kehel bikai, a nañal ki,
a je ki tjai di mintjep.+
11 I ngéda mintjep nwé mi ga kôt,
bôda ba ga lo, ba tjap nwo,
ba kodna nwo hié.
Inyule i litén lini li gwé bé yi.+
Inyu hala nyen Nhek wap a ga kônôl bé bo ngoo,
Nu a bi uñgus bo a ga bôñôl bé bo loñge.+
12 I kel i, Yéhôva a ga bép matam le ma kwoo ibôdôl i Lom* letee ni i lép* Égiptô,+ ndi bé bon ba Israel,+ n’a kot i matam ma, jada ni jada. 13 I kel i, hioñ hikeñi hi ga hem,+ i bôt ba yé bebee ni nyemb i loñ Asiria+ ni i bôt ba yé ntjamak i loñ Égiptô+ ba ga lo ba ôôp i bisu bi Yéhôva, i hikôa hipubhaga i Yérusalem.+