Masoola Yôhanes a bi kôhna
9 Añgel i nyônôs itan i hem sép yé.+ Ha nyen me tehe hiôdôt hi nyodi i ngii, hi kwo hana ’isi; ba ti ki hiôdôt* hiliba hi lijubul* li soñkum.+ 2 Hi yibil lijubul* li soñkum, hiida hi pémél mukété lijubul* kiki hiida hi soso hié, hiañgaa lôñni mbebi bi kôp jiibe+ inyu hiida hi lijubul.* 3 Bitandi bi bi pémél mu hiida, bi kôba hana ’isi;+ ba ti ki gwo ngui, nlélém ngui diéé di mala di nkoñ ’isi di gwé. 4 I kéla bitandi le bi boñ bañ bikai bi hisi béba, to bebela yo ki yo, to bie gwo ki gwo, ndik i bôt ba gwé bé béndél i Nyambe i mbom yap.+
5 Ndi ba bi ti bé bitandi kunde le bi nol bo, ndik le bi nôgha bo njôghe sôñ itan, njôghe yap i bé kiki njôghe i hiéé jala+ i ngéda hi nsulul mut. 6 Mu dilo di nyen bôt ba ga yéñ nyemb, ndi ba ga tehe bé yo; ba ga bana yaga ngôñ i wo, ndi nyemb y’a ke bo ngwéé.
7 Ndi bitandi bi bé pôna bihosi bi bi yé nkôôbaga inyu gwét,+ bi ban-ga gwom i ngii miño bi bi bé pôna mintut mi gôl, yak masu map ma bé kiki masu ma bôt ba binam, 8 ndi bi bééna tjôñ kiki tjôñ di bôda. Yak masoñ map ma bé kiki masoñ ma mbondo njéé,+ 9 bi bééna biben bi tôl wengoñle biben bi tôl bi kei.* Liyôgbe li bipaipai gwap li bé kiki liyôgbe li bikak le bihosi bi ñôt inyu gwét.+ 10 Bi gwé ki nwel ni bisulene kiki diéé di mala, mu nwel nwap nyen bi gwééne ngui i boñ bôt béba sôñ itan.+ 11 Bi gwé kiñe i ñane gwo: añgel i soñkum.+ Ni hop Lôk Héber jôl jé le Abadôn,* ndi ni hop Grikia jôl jé le Apôliôn.*
12 Ndutu bisu i mal tagbe. Nun-ki! Mandutu+ ima ma nlo i mbus mam mana.
13 Añgel+ i nyônôs isamal i hem sép yé.+ Ha nyen me bi nok kiñ yada i nlôl i bitoñ bi juu li gôl+ li li yé i bisu bi Nyambe, 14 i kal añgel i nyônôs isamal i i bééna sép le: “Hohol biañgel bina bi bi yé nkañak bebee ni lom nkeñi le Ufraté.”+ 15 Ha nyen i bi hohol biañgel bina bi bi bé nkôôbaga inyu ngeñ, ni kel, ni sôñ, ni nwii, le bi nol jôga jada ikété môga maa ma bôt ba binam.
16 Nsoñgi u mintôñ mi gwét mi bakilhosi u bé didun di didun diba;* me bi nok nsoñgi wap. 17 Haana nyen me bi tehe bihosi ikété yiinda, yak i bôt ba bé ba yii mu ngii: Ba bééna biben bi tôl bi bi nkôyôp kiki hié, bi bak mangoñ mangoñ,* bi bak ki maô maô kiki solfa; yak miño mi bihosi mi bé kiki miño mi mbondo njéé,+ hié ni hiida lôñni solfa bi bé pémél mu manyo map. 18 I dimala dini tjo daa tjon di bi nol jôga jada ikété môga maa ma bôt: hié, hiida, ni solfa, bi bé pémél mu manyo map. 19 Inyule ngui i bihosi i yéne mu manyo map, ni mu nwel nwap. Inyule nwel nwap mi yé kiki nyoo, mi ban-ga miño; ni nwo nyen bi mbôñôl bôt béba.
20 Ndi i bôt ba bi yégle, ba dimala di bi nol bé, ba bi tam bé minson mi moo map; ba bi waa bé to bégés mimbuu mimbe, to bisat bi gôl, to bi silba, to bi mamuna, to bi ngok, to bi kék, bi bi nla bé tehna, to noga, to ke.+ 21 Ba bi tam bé to manola map, to maada map ni mimbuu mimbe, to malal map ma nyega,* to ngandak yap wip.