Kaat Markô
8 Mu dilo di, limut li bôt likeñi li témb li kodba, ndi li bana bé yom yo ki yo i je. Ha nyen a sébél banigil, a kal bo le: 2 “Me nkon i limut lini ngoo+ inyule hala a yé dilo daa le li yé ni me, ndi li gwé bé yom yo ki yo i je.+ 3 Ibale me nhuuha jo njal* i mambai map, li ga kwo i njel inyule bahogi ipôla yap ba nlôl haa.” 4 Ndi banigil bé ba timbhe nye le: “Hee mut a’ yôñôl bret bi nkola munu ñoñ inyu boñ le i bôt bana bobasôna ba je, ba nuu?” 5 A bat bo le: “Baa ni gwé bret gwañen?” Ba timbhe le: “Bisaambok.”+ 6 I mbus, a kal limut le li yén ’isi. Ha nyen a yoñ bret bisaambok, a ti mayéga, a bek gwo, a bôdôl ti gwo banigil bé le ba kap gwo, yak banigil ba kébha gwo limut.+ 7 Ba bééna ki ndék bon ba tjobi; kiki a nsayap tjo, a kal le ba kébél yak tjo bôt. 8 Hala nyen ba bi je, ba nuu, ba bada ki bikét bi bi yégle, bi yon ikété bisel bikeñi* bisaambok.+ 9 Ndi bôlôm ba bé jam kiki bo 4 000. I mbus, a huuha bo.
10 I nlélém ngéda, a jôp i môñgô ni banigil bé inyu ke i nkoñ u Dalmanuta.+ 11 Ha nyen Farisai i lo, i bôdôl kaa ni nye; ndi inyu noode nye, i bat nye le a unda bo yimbne i nlôl i ngii.+ 12 A siida ngandak ikété ñem,* a kal le: “Inyuki hiai hini hi nyéñ yimbne?+ Me nkal bé maliga le, yimbne yo ki yo y’a tina bé i hiai hini.”+ 13 I mbus a yék bo, a témb a jôp ikété môñgô, a ke uu ngwañ umpe.
14 Ndi banigil ba bi hôya yoñ bret, ba bééna bé yom yo ki yo i je ikété môñgô, handugi bret yada.+ 15 Ha nyen a béhe bo ni bibuk bi ngui le: “Yiblana mis, ni yoñ ki yihe ni séñha i Farisai lôñni séñha i Hérôdé.”+ 16 Jon ba bôdôl nomol bo ni bo inyule ba bééna bé bret. 17 Kiki a nyi hala, a kal bo le: “Inyuki ni nomol inyule ni gwé bé bret? Baa ni yé ngi tibil yi, to tibil nok? Baa miñem minan mi ngi tiñhaga i nok? 18 ‘To hala kiki ni gwé mis, baa ni ntehna bé? To hala kiki ni gwé maôô, baa ni noga bé?’ Baa ni nhoñol ha bé? 19 I ngéda me bi bek bret bitan+ inyu 5 000 di bôlôm, baa ni bi bada bisel gwañen nyonok ni bikét bi bret?” Ba kal nye le: “Jôm ni biba.”+ 20 “I ngéda me bi bek bret bisaambok inyu 4 000 di bôlôm, baa ni bi bada bisel bikeñi* gwañen nyonok ni bret?” Ba kal nye le: “Bisaambok.”+ 21 A kal bo le: “Yak ha ni yé ngi nok?”
22 I mbus, ba pam i Bétsaida. Bôt ba lona nye mut ndim wada, ba soohe ki nye le a tihba i mut ndim nu.+ 23 Ha nyen a gwel woo u mut ndim, a nyodna nye mu mbai i. Kiki a ntjôle nye matai i mis,+ a kéhi moo i ngii yé, a bat nye le: “Baa u ntehe ngim jam?” 24 Mut a pa mis, a kal le: “Me ntehe bôt, ndi ba mpôna bie bi bi nke.” 25 A témb a kéhi moo i ngii mis ma mut nu, mut a tehna loñge. A mbôôp, a kahal tehe mam momasôna loñge loñge. 26 Ha nyen a huuha nye i ndap yé, a kal nye le: “U témb ha bañ nyoo mbai i.”
27 I mbus, Yésu ni banigil bé ba ke i mambai ma Kaisaréa Filipi; kiki ba bé mu njel, a bôdôl bat bo mbadga le: “Bôt ba nkal le me yé njee?”+ 28 Ba kal nye le: “Yôhanes Nsôble,+ ndi bape ba nkal le Éliya,+ bape ki ba nkal le wada ikété bapôdôl.” 29 I mbus, a bat bo le: “Ndi bé ni nkal le me yé njee?” Pétrô a timbhe nye le: “U yé Kristô.”+ 30 Ha nyen a tibil yaga ti bo oda le ba kal bañ mut nye ki nye njee a yé.+ 31 A bôdôl ki niiga bo le Man mut a nlama nok ngandak ndutu, mimañ mi litén ni baéga biprisi ni bayimbén b’a tjél nye, ba nol ki nye,+ ndi a ga tuge i mbus dilo daa.+ 32 Ni maliga, a bé kal hala i mbamba. Ndi Pétrô a kena nye ipañ, a bôdôl nyéyéi nye.+ 33 Ha nyen a hielba, a nun banigil bé, a nyéyéi Pétrô, a kal le: “Témb me i mbus, a Satan! Inyule u nhoñol bé mahoñol ma Nyambe, ndi ma bôt ba binam.”+
34 I mbus, a sébél limut lôñni banigil bé ipañ yé, a kal bo le: “Ibale mut a nsômbôl noñ me, a nlama ha bé niñ inyu yé nyemede,* ndi a begee kék yé njiiha,* a noñ me ibabé waa.+ 35 Inyule nu ni nu a nsômbôl tohol niñ* yé, a’ nimis yo; ndi nu ni nu a nimis niñ* yé inyu yem ni inyu ñañ nlam, a’ tohol yo.+ 36 Ni maliga, umbe nseñ mut a’ bana ibale a nkôhna nkoñ ’isi wonsôna ndi a nimis niñ* yé?+ 37 Mut a’ ti* yaga kii inyu niñ* yé?+ 38 Inyule nu ni nu a nwél me ni bibañga gwem nyuu munu hiai hibe ni hi ndéñg* hini, yak Man mut a’ wél nye nyuu+ i ngéda a’ lo ikété lipém li Isañ lôñni biañgel bipubi.”+