Sakaria
11 “A Libañ, yibil manwemel moñ,
le ndi hié hi ligis bie gwoñ bi sidar.
2 A e junipa* lond makeñi, inyule e sidar i nkwo!
Bie bikeñi bi ntjiba!
A basimngañ ba Basan, ni lond makeñi,
inyule lipan li li bééna ngandak bie li ntjiba!
3 Emble kiki batééda mintômba ba nlond makeñi,
inyule lipém jap li ta ha bé.
Emble kiki bon ba mbondo njéé* ba nkônd,
inyule bahoma ba bikai ba ba bé bebee ni Yordan ba ta ha bé.
4 “Lana nyen Yéhôva Nyambe wem a nkal: ‘Tééda mintômba nwem mi mi nlama nôla,+ 5 i bet ba nsomb nwo, ba nol nwo,+ ndi ba nkôhna bé kogse. I bôt ba nuñul nwo+ ba nkal le: “Yéhôva a kôli ni bibégés inyule me ga yila ngwañ.” Yak batééda bap ba nkônôl bé nwo ngoo.’*+
6 “‘Inyule me ga kônôl ha bé bôt ba loñ ngoo,’ hala nyen Yéhôva a mpot. ‘Inyu hala nyen me ga boñ le hiki mut a kwoo i moo ma mut wé libôk ni i moo ma kiñe yé; ba ga nyugut loñ, me ga kobol bé bo i moo map.’”
7 A bé mintômba mi mi nok njôghe, inyu nan nyen me bi bôdôl tééda bémba i i nlama nôla.+ Jon me bi yoñ mintoñgo ima, wada me sébél wo le Bilama, unu umpe, me sébél wo le Adna,+ me bôdôl ki tééda mintômba. 8 Me bi luhul batééda mintômba baa sôñ yada, inyule me bi waa hônba bo, yak bo ba oo me. 9 Me kal ki le: “Me ga tééda ha bé me bé. I ntômba u yé bebee ni wo, u wok; u u yé bebee ni tjiba, u tjibga. Ndi mi mi nyégle, mi jena minsôn nwo ni nwo.” 10 Jon me bi yoñ ntoñgo wem le Bilama,+ me bôk ki wo ngéñ ngéñ, hala nyen me bi mélés malômbla me bi boñ ni litén jem jolisôna. 11 I malômbla ma, ma bi mal i kel i; ha nyen i mintômba mi bé nok njôghe, mi béñgege me, mi bi yi le bañga i Yéhôva i.
12 I mbus, me kal bo le: “Ibale hala a nene loñge i mis manan, ni saa me; ndi ibale hala bé, ni téédaga wo.” Ha nyen ba bi saa me 30 ma batjañtjañ ba silba.+
13 Yéhôva a kal me le: “Baa ba ntehe le i moni mi nwon mi kôli ni me?+ Ke leñ i ngandak moni i, i nkuu makébla.” Ha nyen me bi yoñ 30 ma batjañtjañ ba silba, me leñ bo i nkuu makébla u ndap Yéhôva.+
14 I mbus, yak ntoñgo wem u nyônôs iba le Adna,+ me bôk wo ngéñ ngéñ, hala nyen me bi boñ le Yuda ni Israel ba nôgla* ha bañ.+
15 Yéhôva a kal ki me le: “Nano yoñ bisélél bi ntééda mintômba nu a nyi bé boñ bôlô yé.+ 16 Me ga nwas le ntééda mintômba a telep mu loñ. A ga tééda bé mintômba mi mi yé bebee i wo;+ a ga yéñ bé to bon ba mintômba, to tibil mi mi mbabaa,+ to jés mi mi nla telep. Ndi a ga mil minsôn mi mintômba mi mi gwé mahoñ,+ a nup ki bipal gwap.+
17 Ngoo ni ntééda mintômba wem nu a nsal bé loñge,+ nu a ntjôô bémba!+
Pansoñ i ga bép woo wé ni jis jé li walôm.
Woo wé wonsôna u ga wo,
yak jis jé li walôm li ga tehna ha bé hies.”*