Sakaria
13 “I kel i, ba ga tém bee malép inyu mbôda* David ni bôt ba Yérusalem, inyu pubus bo ni béba yap lôñni nyega yap.+
2 Lana nyen Yéhôva nu mintôñ mi gwét a mpot: “M’a sas môl ma bisat gwobisôna mu loñ,+ mut to wada a ga hoñol ha bé ki mo. M’a héya bapôdôl mu loñ,+ me héya ki mahoñol ma nyega.* 3 Ndi ibale mut a ntémb a pot mbañ bitembee, isañ bo nyañ ba ba bi gwal nye, ba ga kal nye le: ‘U ga niñ bé, inyule u mpot bitembee i jôl li Yéhôva.’ Isañ bo nyañ ba ba bi gwal nye, ba ga ôm nye pansoñ inyule a mpot mbañ bitembee.+
4 “I kel i, bapôdôl bobasôna ba ga wo nyuu inyu yiinda yap i ngéda ba ga pot mbañ; ba ga haba ha bé mbot yap mpôdôl*+ inyu lôk bôt. 5 Ha nyen ba ga kal le: ‘Me ta bé me mpôdôl. Me yé nsalnwom, inyule ngim mut i bi somb me i ngéda me bé mañge wanda.’ 6 Ndi ibale mut a mbat bo le: ‘I mambabaa mana ma yé we ipôla bituu* ma nlôl hee?’ Ba ga timbhe le: ‘Me bi kôhna i mambabaa mana i ndap mawanda mem.’”*
7 “A pansoñ, tôde! Ôm ntééda bémba wem,+
ôm ki solôñ wem,” hala nyen Yéhôva nu mintôñ mi gwét a mpot.
8 “Ñ, ikété loñ yosôna,” hala nyen Yéhôva a mpot,
“môga ima ma bôt ikété môga maa ma ga tjiba, ma wo ki;
yak jôga jada li bôt ikété môga maa li ga yégle mukété.
9 Ndi m’a tégbaha jôga jada li bôt ikété môga maa i hié;
m’a pubus bo kiki ba mpubus silba,
me wan ki bo kiki ba nwan gôl.+
Ba ga lôndôl jôl jem,
yak me m’a timbhe bo.
M’a kal le: ‘Ba yé litén jem,’+
yak bo b’a kal le: ‘Yéhôva a yé Nyambe wés.’”