Ñañal
6 Me bi tehe jam libe lipe li li mbéna pémél bôt ba binam hana ’isi: 2 bañga Nyambe a nti mut lingwañ, bigwel moo ni lipém, kayéle a nhañ bé yom yo ki yo i nkon nye ngôñ. Ndi bañga Nyambe a nwas bé nye le a nok lingoñoo li gwom bi, ndi nkén mut nyen a nok lingoñoo li gwom bi. I jam lini li yé yañga, li nsôghana ki i ñem. 3 Ibale mut a ngwal mbôgôl bon, a nom ngandak nwii, a un, ndi a nok bé lingoñoo li gwom gwé bilam ilole a njôp i soñ, me nla kal le yak i man nu a nwél libum a yé loñge iloo nye.+ 4 Inyule i man nunu a mpam i libum yañga, a tagbe ki ikété jiibe, ba ño bé to nye jôl.* 5 To ibale a bi tehe bé hiañgaa, a yi bé to jam jo ki jo; a yé loñge iloo* i mut nu.+ 6 Umbe nseñ u yé i niñ dikôô di nwii diba, ndi u ba bé maséé? Baa bobasôna ba nke bé i nlélém homa?+
7 Ndumbba i mut yosôna i yé ndigi inyu yônôs libum jé;+ ndi to hala a nuu bé. 8 Inyule mut pék a nloo jôñ mut ni kii,+ tole umbe nseñ hiyeyeba hi mut hi gwé inyule hi nyi joba inyu niñ?* 9 I yé nseñ le mut a kon maséé ni mam mis mé ma ntehe iloole a kahal yéñ mam a nla bé bana. Yak hala a yé yañga ni linoñ mbebi.
10 Hiki yom i yé, i bi bôk i kôhna jôl, yak libak li mut binam li nyiba; a nla bé to telep i minkaa ni mut nu a nloo nye ngui. 11 Kiki bibuk* bi mbôl, hala nyen yak gwañga bi mam bi mbôl; bi gwééne mut binam umbe nseñ? 12 Njee a nyi kii i yé loñge le mut binam a boñ ikété dilo di niñ yé i i yé yañga, i tagbege kiki yiye?+ Inyule njee a nla kal mut binam kii i ga tagbe hana ’isi i ngéda a mba ha bé?