Yérémia
30 Yéhôva a bi pôdôs Yérémia, a kal nye le: 2 “Haana nyen Yéhôva, Nyambe nu Israel, a mpot: ‘Tila bibañga gwobisôna me nkal we ikété kaat. 3 “Inyule dilo di ga lo,” hala nyen Yéhôva a mpot, “le me ga kot bôt ba litén jem ba ba bi ke i minkôm, Israel ni Yuda,”+ hala nyen Yéhôva a nkal, “me ga témbna bo i loñ me bi ti basôgôlsôgôl bap, ba témb ba bôdôl yééne mu.”’”+
4 I bibañga bini gwon Yéhôva a bi kal inyu Israel ni Yuda.
5 Haana nyen Yéhôva a mpot:
“Di bi nok minlondok mi bôt ba nsehla;
woñi u yé, ndi nsañ u ta bé.
6 Soho, ni bat too munlôm a nla gwal.
Inyuki masu ma njum bôt bobasôna?
7 Wééi! I hilo hi, hi yé ndutu.*+
Hilo hipe hi ta bé kiki hio,
hala a ga ba ngéda njiiha inyu Yakôb.
Ndi a ga tohlana mu.”
8 Yéhôva nu mintôñ mi gwét a nkal le: “I hilo hi, me ga bôk kop nson i yé we i joo, me kit ki minkôô nwé; bakén ba bôt ba ga yilha ha bé bo* minkol nwap. 9 Ba ga bégés Yéhôva Nyambe wap, ba gwélél ki David, kiñe me ga téé inyu yap.”+
10 “Ndi we, a ngwélél wem Yakôb, u kon bañ woñi,” hala nyen Yéhôva a mpot,
“U sehla bañ a Israel.+
Me ga sôñ we nyoo i homa u bi ke haa,
me sôñ ki mbôda yoñ nyoo i loñ u bi ke i minkôm.+
Yakôb a ga témb i homa wé, a ga niñ ikété nsañ, a bak nwee,
ibabé le mut nye ki nye a kônha nye woñi.”+
11 “Inyule me yé lôñni we inyu tohol we,” hala nyen Yéhôva a mpot.
12 Inyule haana nyen Yéhôva a nkal:
“Kon woñ u gwé bé matibla.+
Mbabaa yoñ i mal bé.
13 Mut nu a nit we mu hop woñ a ta bé,
matibla ma ta bé inyu poo yoñ.
Bee bi ta bé inyu yoñ.
14 Mimbok nwoñ nwominsôna mi bi hôya we.+
Mi nyéñ ha bé we.
Me bi bép we disôô wengoñle mut nu a ñoo we,+
me bi kogse we kiki mut nu a gwé ñem mbe a nkogse bôt,
inyu béba yoñ ikeñi ni ngandak yoñ mam mabe.+
15 Inyuki kon woñ u mboñ le u lond?
Njôghe yoñ i mal bé!
Me bi boñ we i mam mana,
inyu béba yoñ ikeñi ni ngandak yoñ mam mabe.+
16 Inyu hala nyen i bôt bobasôna ba yé i tjé we, ba ga tjiba,+
yak baoo boñ bobasôna ba ga ke i minkôm.+
I bôt ba yé i nibil we, yak bôt ba ga nibil bo,
me ga boñ le i bôt ba yé i kadal nkus woñ, yak bôt ba kadal nkus wap.”+
17 “M’a mbuubaha we, me mélés ki mambabaa moñ,”+ hala nyen Yéhôva a mpot,
“to hala kiki ba ntehe le u yé muda le bôt ba ntjôô, ba séblak we le:
‘Siôn, muda nu mut nye ki nye a nyéñ ha bé.’”+
18 Haana nyen Yéhôva a nkal:
“Me ga témb i mandap ma mabadô ma Yakôb,+ me kot i bôt ba bi ke i minkôm,
me ga kônôl bilap gwé ngoo.
Tison i ga tiimba ôña i ngii hikôa hié,+
yak nkum ndap u ga tiimba telep i nlômbi wé homa.
19 Ba ga tôp tjémbi inyu ti mayéga, ba nolok ki hiol.+
20 Bon ba Yakôb ba ga ba kiki i ngéda kôba,
likoda jé li ga bana ngui i bisu gwem.+
M’a kogse i bôt bobasôna ba ntééñga nye.+
21 Ntôô mut u ga lôl ikété litén jé,
ñane a ga pémél ikété mbôda yé.
M’a boñ le a tiige me bebee, yak nye a ga lo me bebee.”
“Ibale hala bé, njee a nla ban ñem i* tiige me bebee?” Hala nyen Yéhôva a mpot.
22 “N’a ba litén jem,+ yak me m’a ba Nyambe nan.”+
23 Nuna-ki! Hiun hi Yéhôva hi ga lo kiki mbuk mbebi;+
kiki mbuk mbebi, hi ga kwél i ngii miño mi bibéba bi bôt.
24 Hiun hi Yéhôva hi ga sôs bé,
letee a boñ, a yônôs ki mam ma yé nye i ñem.+
I dilo di nsôk, n’a nok i jam li.+