Kaat Korintô iba

2 Jon me bi yoñ makidik le m’a lo ha bé i bééni i ti bé ndutu ñem. 2 Inyule ibale me nti bé ndutu ñem, njee a ga ba ha inyu kônha me maséé handugi i mut me nti ndutu ñem? 3 Me bi tilna bé hala inyu boñ le i ngéda me nlo, me bana bañ ndutu ñem inyu bôt me lamga kônôl maséé, inyule me yé nkwoog nkaa le i jam li nkônha me maséé li nkônha yak bébobasôna nlélém maséé. 4 Inyule inyu ngandak njiiha ni njôhge ñem nyen me bi tilna bé lôñni ngandak gwiiha, ha inyu ti bé ndutu ñem bé,+ ndi inyu unda bé njôôñ gwéha me gwé inyu nan.

5 Ndi ibale mut a bi ti bôt ndutu ñem,+ me bé nyen a bi ti ndutu ñem, ndi i ngim likala, bébobasôna bon a bi ti ndutu ñem; to hala kiki me gwé bé ngôñ i babaa bé ni bibuk gwem. 6 Ini kogse libim li bôt ikété nan li nti i mut nunu i kôli; 7 ndi nano ni nlama nwéhél nye,+ ni ti ki nye hogbe inyu boñ le a bana bañ ndutu ñem iloo hihéga.*+ 8 Jon me nsoohe bé le ni unda toi nye gwéha nan.+ 9 Inyule inyu hala ki nyen me bi tilna bé: inyu yi too n’a unda le ni yé manôgla ikété mam momasôna. 10 Ibale ni nwéhél mut to limbe jam, yak me me nwéhél nye jo. Ni maliga, mam momasôna me bi nwéhél (ibale me bi nwéhél mut jam), me bi nwéhél mo inyu loñge nan i bisu bi Kristô, 11 kayéle Satan a lôk* bañ bés,+ inyule di nek bé sômbôl yé.*+

12 Ndi i ngéda me bi pam i Trôas+ inyu añal ñañ nlam u Kristô, yak nwemel u yiblana me ikété nson u Nwet, 13 me bééna bé ñem nwee inyule me bi koba bé me mankéé wem Titô.+ Jon me bi tjôla bo, me yoñ njel i Makédônia.+

14 Ndi Nyambe a kôhna mayéga, nyen a ñéga bés ngéda yosôna ikété maséé ma bôt ba nyémbél gwét lôñ yada ni Kristô, a mboñ ki ni njel yés le bôt ba nok njiñ i yi yé* homa nyensôna! 15 Inyule i ngéda di ñañal inyu Kristô, di yéne Nyambe loñge njiñ ipôla bôt ba yé i kôhna tohi, ni ipôla bôt ba yé i tjiba; 16 inyu bôt ba ntjiba, di yé njiñ* nyemb i i nkena i nyemb;+ ndi inyu bôt ba nkôhna tohi, di yé njiñ niñ i i nkena i niñ. Ndi njee a kôli toi gwel nson unu? 17 Bés; inyule di ta bé banuñul* bañga i Nyambe+ kiki ngandak bôt ipe, ndi di mpot yaga ni ñem maliga wonsôna kiki bôt le Nyambe a ñep, ñ, di mpot kiki banigil ba Kristô i bisu bi Nyambe.