Yérémia
23 “Ngoo ni batééda mintômba ba ba ntjé mintômba mi bémba yem, ba sandak nwo!” Hala nyen Yéhôva+ a mpot.
2 Jon haana nyen Yéhôva Nyambe nu Israel a mpot inyu batééda mintômba ba litén jem: “Ni bi sand mintômba nwem; ni luhul nwo, ni yoñ bé to ngéda ni nwo.”+
“Jon m’a yoñ ngéda i kogse bé inyu maboñok manan mabe,” hala nyen Yéhôva a mpot.
3 “I mbus, m’a kot mintômba nwem mi mi nyégle, me héya nwo ikété biloñ gwobisôna me bi sand nwo,+ me témbna nwo i hisi hiap,+ mi ga gwal ngandak, mi bôl ki.+ 4 Me ga pohol batééda mintômba ba ba ga tééda toi mintômba nwem.+ Mi ga kon ha bé woñi, mi ga sehla ha bé, to wada u ga hañ bé,” hala nyen Yéhôva a mpot.
5 “Nuna-ki! Dilo di ga lo,” hala nyen Yéhôva a mpot, “le me ga pémhene David nkôdôlbum*+ nu a téé sép. Kiñe i ga ane,+ i ga boñ mam ni pék, i ga lona ki mbagi sép ni telepsép i loñ.+ 6 I dilo tjé, Yuda a ga kôhna tohi,+ Israel a ga yén ikété nsañ.+ Ba ga sébél nye ni jôl lini le: Yéhôva a yé Telepsép yés.”+
7 “Ndi dilo di ga lo,” hala nyen Yéhôva a mpot, “ba ga kal ha bé le: ‘Me nkum soñ ni niñ i Yéhôva nu a bi héya litén li Israel i loñ Égiptô!’+ 8 Ndi ba ga kal le: ‘Me nkum soñ ni niñ i Yéhôva nu a bi héya mbôda Israel i loñ ñombok ni i biloñ gwobisôna a bi sand bo, a témbna bo i loñ yap,’ ba ga yééne ki mu loñ yap.”+
9 Inyu bapôdôl:
ñem u mbôô me matjél.
Bihés gwem gwobisôna bi nyeñg.
Me yé kiki mut nu a nhiôô,
kiki mut nu wai i ngwel,
inyu Yéhôva ni inyu bibañga gwé bipubi.
10 Inyule loñ i yôni ni bôt ba ndéñg;+
loñ i yé ikété maéya inyule i yé ntiihege,+
bikai bi bi yé i ñoñ bi nkôt.+
Ba gwé bilem bibe, ba ntét ki i bôt ba yé isi énél yap.
11 “Mpôdôl ni prisi ba yé nyega.*+
Me ntehe bibéba gwap bi mam letee ni ikété ndap yem,”+ hala nyen Yéhôva a mpot.
12 “Inyu hala nyen njel yap i mba i nsendi, i ban-ga jiibe;+
ba ga nyuge bo, ba kwoo.
Me ga boñ le bikuu bi kwél bo,
i nwii me ga kogse bo,” hala nyen Yéhôva a mpot.
13 “Me ntehe mam ma nsuñgaha ñem yak bapôdôl ba Samaria.+
Ba mpot i jôl li Baal,
ba yumhak litén jem Israel.
14 Me ntehe mam ma nyega yak bapôdôl ba Yérusalem.
Ba nke i ndéñg,+ ba kilak ikété bitembee;+
ba mbégés* bôt ba mboñ mam mabe,
ba nkôm bé to bibéba gwap bi mam mbus.
15 Inyu hala nyen Yéhôva nu mintôñ mi gwét a mpot inyu bapôdôl le:
“M’a jés bo yom i nlol,
me nyus bo malép ma gwé mbôñ.+
Inyule bapôdôl ba Yérusalem ba ntjañgbene maliga, ba ntjam ki i jam li ni loñ yosôna.”
16 Haana nyen Yéhôva nu mintôñ mi gwét a mpot:
“Ni emble bañ mam bapôdôl ba nkal bé.+
Ba yé i lugha bé.*
17 I bôt ba nyan me, ba nkal bo, ba tiimbaga le:
‘Yéhôva a nkal le: “N’a bana nsañ.”’+
I bôt ba nai le ba mboñ ndigi i mam miñem nwap mi ntinde bo i boñ, ba nkal bo le:
‘Bikuu bi ga kwél bé bés.’+
18 Inyule njee yap a yé ikété mawanda ma ñem nyuu ma Yéhôva,
le a tehe, a nok ki bañga yé?
Njee yap a bi sédi ôô inyu emble bañga yé?
19 Nuna-ki! Hiun hi Yéhôva hi ga lo kiki mbuk mbebi;
kiki mbuk mbebi, hi ga kwél i ngii miño mi bibéba bi bôt.+
20 Hiun hi Yéhôva hi ga sôs bé,
letee a boñ, a yônôs ki mam ma yé nye i ñem.
I dilo di nsôk, n’a tibil nok i jam li.
21 Me bi om bé me bapôdôl bana, ndi ba bi pala ke.
Me bi pôdôs bé bo, ndi ba bi añal.+
22 Ndi ibale ba bak mawanda mem ma ñem nyuu,
ki ba ñañle litén jem bibañga gwem,
ba hôla ki bo i tjôô bilem gwap bibe ni maboñok map mabe.”+
23 Yéhôva a nkal le: “Baa me yé ndik Nyambe i ngéda me yé bebee ni bé, baa me nla bé ba Nyambe i ngéda me yé haa?”
24 “Baa mut a nla solop ngim homa, me tehe bé nye?”+ Hala nyen Yéhôva a mpot.
“Baa me ntehe bé mam momasôna i ngii ni hisi?”+ Hala nyen Yéhôva a mpot.
25 “Me nok kiki bapôdôl ba mpot bitembee i jôl jem, ba kalak le: ‘Me bi emel bieem! Me bi emel bieem!’+ 26 Letee ni ngéda mbe bapôdôl ba ga kônde pot bitembee? Bipôdôl gwap bi yé ndik mam le ba mbot ikété miñem nwap.+ 27 Ni bieem gwap ba ñañlana bo ni bo, ba gwé ngôñ i boñ le litén jem li hôya jôl jem, kiki basañ bap ba bi hôya jôl jem inyule ba bé bégés Baal.+ 28 Mpôdôl nu a ñemel eem, a añal eem yé; ndi nu a gwé lipôdôl jem, a añal jo ni maliga.”
“Baa ba nla hégha bikôgôô ni jis li blé?” Hala nyen Yéhôva a mpot.
29 Yéhôva a nkal le: “Baa lipôdôl jem li ta bé kiki hié,+ kiki hama i i mbol liaa?”+
30 “Jon m’a kogse bapôdôl ba ba nkôde bipôdôl gwem inyu boñ le ba añle bôt i yom ba ngwés.”+ Hala nyen Yéhôva a mpot.
31 Yéhôva a nkal le: “M’a kogse bapôdôl ba ba ngwélél hilémb hiap inyu kal le: ‘A mpot le!’”+
32 Yéhôva a nkal le: “M’a kogse bapôdôl ba ba ñemel bieem bi bitembee, ba añlak gwo, ba yumhak litén jem ni bitembee gwap, ni bikadba gwap.”+
“Ndi me bi ep bé bo, me bi ti bé to bo oda le ba pot. Jon ba gwééne bé bôt ba litén jem nseñ wo ki wo,”+ hala nyen Yéhôva a mpot.
33 “Ibale litén lini, mpôdôl, tole prisi ba mbat we le: ‘Mbegee* i Yéhôva i yé le kii?’ U nlama timbhe bo le: ‘“Bé bon ni yé mbegee! M’a leñ ki bé haa ni me,”+ hala nyen Yéhôva a mpot.’ 34 Ndi ibale mpôdôl, tole prisi, tole mut litén a nkal le: ‘Mbegee* i Yéhôva ini!’ M’a kogse i mut nu ni lihaa jé. 35 Haana nyen hiki wada nan a nlama kal mut wé libôk tole manyañ: ‘Yéhôva a ntimbhe lelaa? Kii Yéhôva a nkal?’ 36 Ndi ni sima ha bañ mbegee* i Yéhôva, inyule bipôdôl binan gwon bi yé mbegee;* ni nhéñha bibañga bi Nyambe nu a niñ, Yéhôva nu mintôñ mi gwét, Nyambe wés.
37 “Haana nyen u nlama bat mpôdôl: ‘Lelaa Yéhôva a ntimbhe we? Kii Yéhôva a nkal? 38 Ndi ibale u nkônde pot le: “Mbegee* i Yéhôva!” Haana nyen Yéhôva a nkal: “Kiki u nkônde pot le: ‘Bibañga bini bi yé mbegee* i Yéhôva,’ ndi ki le me bi kal we le: ‘U nlama ha bé pot le: “Mbegee* i Yéhôva!”’ 39 Yi ni le me ga begee we, me leñ we haa ni me, we lôñni i tison me bi ti we ni basôgôlsôgôl boñ. 40 Me ga wéha we nyuu i boga ni boga, me kônha ki we hison i mba ni mba, kayéle mut a ga hôya bé i jam li.”’”+