Kaat bisu i Miñañ

5 Bon ba Ruben,+ mbôkgwéé nu Israel. Nyen a bé man nu bisu, ndi kiki a bi lalna linyaa li isañ,*+ tel yé i man nu mañ i bi ke yak bon ba Yôsep,+ man Israel, jon ba bi tila bé i kaat lihaa le nyen a yé man nu mañ. 2 Yuda+ a bi bana lipém iloo lôkisañ, i mbôda yé ki nyen ñane+ a bi lôl; ndi tel i man nu mañ i bi ke yak Yôsep. 3 Bon bôlôm ba Ruben, mbôkgwéé nu Israel le Hanok, Palu, Hezrôn ni Karmi.+ 4 Bon bôlôm ba Yôel bana: man wé Sémaya, man wé Gôg, man wé Siméi, 5 man wé Mika, man wé Réaya, man wé Baal, 6 man wé Béera, nu kiñe Asiria le Tilgat-Pilnéser+ a bi kena i minkôm; a bé ñane wada i litén li Ruben. 7 Lôkisañ yé ini ni mahaa map kiki i yé ntilga ikété kaat lihaa: ñane le Yéel, ni Sakaria, 8 ni Béla man Azaz, man Séma, man Yôel, nu a bé yééne i nkoñ u mbôdôl i Arôer+ letee ni i Nébô ni i Baal-Méôn.+ 9 Ba bi ke ba yén i pes likôl bebee ni bibôdle bi ñoñ u lom Ufraté,+ inyule bilém gwap bi bi bôl i loñ Giléad.+ 10 I ngéda Saulô a bé ane, ba bi jôs Lôk Hagar gwét, ba yémbél bo, ba kadal nkoñ wap wonsôna u u yé i pes likôl i Giléad, ba bôdôl yééne i mandap map ma mabadô.

11 Mbôda Gad i bé yééne ipañ yap, i nkoñ u Basan letee ni i Saléka.+ 12 I nkoñ u Basan, Yôel nyen a bé ane, Safam a bé ba nyônôs iba; yak Yanai ni Safat ba bééna bitel nyoo. 13 Ba bé ndap bikôkôa yada lôñni lôkisañ yap ini: Mikael, Mésulam, Séba, Yôrai, Yakan, Zia, ni Éber, bôt basaambok. 14 Bon bôlôm ba Abihail ba, nyemede a bé man Huri, man Yarôa, man Giléad, man Mikael, man Yésisai, man Yadô, man Buz. 15 Ahi man Abdiel, man Guni nyen a bé éga ndap bikôkôa yap. 16 Ba bé yééne i Giléad,+ i Basan,+ ni i minkoñ nwé,* yak ni mu minkoñ nwominsôna mi Saron, letee ni minwaa nwap. 17 I dilo di kiñe Yuda le Yôtam+ ni i dilo di kiñe Israel le Yérôbôam,*+ môl map ma bé ntilga ikété kaat lihaa.

18 Litén li Ruben ni li Gad, ni pes litén i Manasé ba bééna ntôñ gwét u 44 760 mimpémba mi bôt ba gwét, ba ba bééna biben ni paminsoñ, ba leñek mimpihlôñgô,* ba bé ki nkôôbaga inyu gwét. 19 Ba bi jôs Lôk Hagar+ gwét, ba jôs yak mbôda Yétur, i Nafis+ ni i Nôdab. 20 Nyambe a bi hôla bo, ba yémbél Lôk Hagar ni bôt bap bobasôna. Ba bi lôndôl Nyambe le a hôla bo i gwét, a emble masoohe map inyule ba bi bôdôl nye ñem.+ 21 Ba yoñ bilém gwap: 50 000 ma kamél, 250 000 mintômba ni 2 000 di magas. Ba gwel ki 100 000 di bôt.* 22 Ba bi nol ngandak bôt, inyule bañga Nyambe+ a bi hôla bo i jo gwét. Ba yééne ki minkoñ nwap letee ni i ngéda loñ i bi ke i minkôm.+

23 Bon ba pes litén i Manasé+ ba bé yééne i nkoñ u mbôdôl i Basan letee ni i Baal-Hermôn, i Sénir ni i hikôa Hermôn.+ Ba bé ngandak. 24 Baéga ba mandap ma bikôkôa map le Éfer, Isi, Éliel, Azriel, Yérémia, Hôdavia ni Yadiel; ba bé mimpémba mi bôt ba gwét, ba bé yiba ngandak, ba bak baéga ba mandap map ma bikôkôa. 25 Ndi ba bi ndogbene Nyambe nu basôgôlsôgôl bap, ba ke i bégés banyambe ba bôt ba biloñ+ Nyambe a bi tjé i bisu gwap. 26 Ha nyen Nyambe a bi tinde kiñe Asiria+ le Pul (hala wee Tilgat-Pilnéser,+ kiñe Asiria) le a kena litén li Ruben ni li Gad ni pes litén i Manasé i minkôm, a bi kena bo i Hala, i Habôr, i Hara ni i lom Gôzan,+ ba ngi yii nyoo letee ni len.