Kaat Tésalônika bisu

3 Jon i ngéda di bi la ha bé nihbe i jam li, di bi tehe loñge i yégle i Atén bésbotama;+ 2 ndi di ep Timôtéô,+ mankéé wés ni ngwelnson nu Nyambe* ikété miñañ minlam inyu Kristô, le ndi a lédés bé,* a ti ki bé hogbe ikété hémle nan, 3 inyu boñ le mut nye ki nye a sehla* bañ inyu njiiha ini. Inyule bébomede ni nyi le di nla bé keñgle mandutu mana.*+ 4 Inyule i ngéda di bé lôñni bé, di bé béna kal bé, njiiha ngi lo, le d’a kôhna njiiha; kiki ni nyi, hala ki nyen mam ma bi tagbe.+ 5 Inyu hala nyen i ngéda me bi la ha bé nihbe i jam li, me om nye le a lona manwin ma ndéñbe nan,+ tiga le Nnoode bôt+ a noode bé, ni le nson wés u yila yañga.

6 Ndi nano Timôtéô a ntip lôl nyoo i bééni,+ a nlona bés nwin nlam inyu ndéñbe nan ni gwéha nan, ni le ni nhoñol bés ngéda yosôna ni maséé, ni ban-ga ngôñ ikeñi i tehe bés, ndik kiki yak bés di gwé ngôñ i tehe bé. 7 Inyu hala nyen, a lôk kéé, ni njel nan lôñni ndéñbe ni bi unda nyen di bi kôhna hogbe ikété ndééñga yés ni njiiha yés yosôna.+ 8 Inyule hala a nkônde ti bés makénd* i ngéda ni téé siñ i Nwet. 9 Inyule lelaa di nla unda le di nti Nyambe mayéga inyu nan, inyu ngandak maséé di nôgda inyu nan i bisu bi Nyambe wés? 10 Juu ni njamuha, di nyemhe ni ñem wonsôna inyu tehe bé i mbombom,* ni ti bé mam ma nhañ mu hémle nan.+

11 Nano, di nsoohe le Nyambe wés ni Tata wés nyemede lôñni Nwet wés Yésu ba néhne bés njel i lo i bééni. 12 Handugi hala, Nwet wés a hôlôs gwéha ni gwé bé ni bé,+ a hôlôs ki gwéha ni gwé inyu bôt bobasôna; ñ, i keñep yaga ndik kiki yak bés di ngwés bé, 13 kayéle a lédés miñem minan le ndi ni ba ngi nsohi lôñni libak lipubhaga i bisu bi Nyambe+ ni Tata wés i ngéda Nwet wés Yésu+ a mba ha ni bapubhaga bé bobasôna.