Yôsua

10 I ngéda kiñe Yérusalem le Adônizédek a bi nok le Yôsua a mal yoñ tison i Ai, a tjé ki yo, ni le a mboñ Ai ni kiñe+ yé kiki a bi boñ Yérikô ni kiñe+ yé; i ngéda a bi nok ki le bôt ba Gibéôn ba nkôp nsañ ni bon ba Israel,+ ni le ba bé niñ ipôla yap, 2 hala a yumus nye,+ inyule Gibéôn a bé tison ikeñi, a bé kiki tison le kiñe i ñéga. I tison ini i bé ikeñi iloo Ai,+ yak bôlôm bé bobasôna ba bé bôt ba gwét. 3 Jon kiñe Yérusalem le Adônizédek a bi ep nwin yak kiñe Hébrôn+ le Hôham, ni kiñe Yarmut le Piram, ni kiñe Lakis le Yafia, ni kiñe Églôn+ le Débir, a kal bo le: 4 “Ni loo i hôla me le di jôs Gibéôn gwét, inyule a nkôp nsañ ni Yôsua lôñni bon ba Israel.”+ 5 Ha nyen bikiñe gwo bitan bi Lôk Amôr,+ hala wee kiñe Yérusalem, kiñe Hébrôn, kiñe Yarmut, kiñe Lakis ni kiñe Églôn, bi bi kodba ni mintôñ nwap mi gwét, bi ke bi kéña tison Gibéôn inyu jôs yo gwét.

6 Jon bôt ba Gibéôn ba bi ep nwin yak Yôsua, i homa ba bé yééne i Gilgal,+ ba kal nye le: “U tjôô bañ* minkol+ nwoñ. Loo ngwéé ni ngwéé! Lo tohol bés, lo hôla ki bés! Bikiñe gwobisôna bi Lôk Amôr, bi bi nyééne i mbok dikôa, bi nkodba inyu jôs bés gwét.” 7 Ha nyen Yôsua a bi nyodi i Gilgal, a ke, nye ni bisônda gwé gwobisôna, lôñni mimpémba nwé mi bôt ba gwét.+

8 I mbus, Yéhôva a kal Yôsua le: “U kon bañ bo woñi,+ inyule me mal ti we bo.+ To wada wap a ta bé le a yémbél we.”+ 9 I mbus ha, Yôsua a nyodi i Gilgal, a ke u wonsôna, a leñ bo gwét i ngéda ba bé bem bé. 10 Yéhôva a boñ bo le ba yubda. Bon ba Israel+ ba kahal nol bo bañga linolok i Gilgal, ba noñ yak bo mu njel i nsôs i Bét-Hôron, ba nol ki bo letee ni i Azéka ni i Makéda. 11 I ngéda ba bé ke bon ba Israel ngwéé mu njel i nsôs i Bét-Hôron, Yéhôva a leñ bo matan-ga makeñi ma ma bé lôl i ngii letee ni i Azéka, ba wo. Ni maliga, i bôt matan-ga ma bi nol ba bé ngandak iloo bôt bon ba Israel ba bi nol ni pansoñ.

12 I kel i nyen Yéhôva a bi sem Lôk Amôr i moo ma bon ba Israel, bomede ba tehge. Ha nyen Yôsua a bi kal Yéhôva i bisu bi bon ba Israel le:

13 Ha nyen hiañgaa hi bi telep, to sôñ i nyiñgha bé letee bon ba Israel ba pun bomede inyu jam baoo bap ba bi boñ bo. I jam lini li yé ntilga i kaat i Yasar.+ Hiañgaa hi telep nyoo i ngii, hi hoo bé nañal bebee le ngim kel. 14 Kel ipe i bé ngi ba kiki i, to i bisu bi ngéda, to i mbus ngéda, le Yéhôva a nôgôl kiñ i mut binam+ hala, inyule Yéhôva a bé jo inyu Israel.+

15 I mbus mam mana, Yôsua lôñni bon ba Israel bobasôna ba témb i Gilgal,+ i homa ba bé yééne.

16 Ha ngéda i, bikiñe gwo bitan bi bi so, bi solop ikété hôk liaa i Makéda.+ 17 I mbus, ba kal Yôsua le: “Ba nléba bikiñe gwo bitan, bi sôli ikété hôk liaa i Makéda.”+ 18 Ndi Yôsua a kal le: “Ni biiñgaha basoso ba ngok inyu yip lijubul li hôk, ni téé ki bôt bahogi ha inyu tat bo. 19 Ndi bé bana bape, ni telep bañ. Noña baoo banan, ni nol bo mu kiki ba nke ngwéé.+ Ni nwas bañ le ba jôp i bitison gwap, inyule Yéhôva Nyambe nan a mal ti bo i moo manan.”

20 Yôsua ni bon ba Israel ba bi nol baoo bap bañga linolok: ba bi nol bobasôna handugi bôt bahogi ba ba bi pei, ndi ba so, ba jôp i bitison bi gwé mapénd ma ngui. 21 I mbus, bôt ba gwét bobasôna ba témb ni nsañ yak Yôsua, i homa ba bé yééne i Makéda. Mut to wada a bi bana ha bé makénd* i pot bon ba Israel béba. 22 Ha nyen Yôsua a bi kal le: “Ni yibil lijubul li hôk, ni pémés i bikiñe bi gwo bitan, ni lona me bo hana.” 23 Jon ba bi pémés i bikiñe bini gwo bitan mu hôk: kiñe Yérusalem, kiñe Hébrôn, kiñe Yarmut, kiñe Lakis ni kiñe Églôn;+ ba kena bo yak Yôsua. 24 I ngéda ba bi lona i bikiñe bini yak Yôsua, a sébél bôlôm bobasôna ba Israel, a kal baane ba bôt ba gwét ba ba bi kee ni nye le: “Tiigana bebee. Ni tidbe mbus joo i bikiñe bini ni makôô manan.” Jon ba bi tiige bebee, ba tidbe mbus joo+ i bikiñe bi ni makôô map. 25 Yôsua a kal bo le: “Ni kon bañ woñi, to sehla+ ni sehla bañ. Ni bana ñem ngui, ni lédés ki, inyule lana nyen Yéhôva a ga boñ baoo banan bobasôna ba ni yé i jôs gwét.”+

26 I mbus hala, Yôsua a nol bo, a yoñ bikék* bitan, a péni mim nwap mu ngii; mi yégle mu letee ni bikôkôa. 27 I ngéda hiañgaa hi bé nañal, Yôsua a ti oda le ba suhus i mim mi bé i bikék,+ ni le ba leñ nwo nyoo i hôk i het bikiñe bi bi solop. I mbus, ba bii basoso ba ngok i lijubul li hôk; i ngok ini i ngi yii ha letee ni len.

28 I yokel nu, Yôsua a yoñ tison Makéda,+ a tjé yo ni pansoñ. A nol kiñe yé ni bôt* bobasôna ba bé mu, a yék+ bé mut to wada. A boñ kiñe Makéda+ nlélém kiki a bi boñ kiñe Yérikô.

29 I mbus ha, Yôsua lôñni bon ba Israel bobasôna ba nyodi i Makéda, ba ke i tison Libna+ inyu leñ yo gwét. 30 Yak i tison ini ni kiñe+ yé, Yéhôva a ti gwo i moo ma bon ba Israel; ba tjé tison, ba nol i bôt* bobasôna ba bé mu, ba yék bé mut to wada. Ba boñ kiñe Libna kiki ba bi boñ kiñe Yérikô.+

31 Kiki ba mal, Yôsua lôñni bon ba Israel bobasôna ba nyodi i Libna, ba ke i tison Lakis,+ ba yééne ha inyu leñ yo gwét. 32 Yéhôva a bi ti Lakis i moo ma Israel, jon i hilo hi bé noñ ha, ba yoñ Lakis. Ba tjé tison, ba nol bôt* bobasôna ba bé mu ni pansoñ;+ ba boñ yo nlélém kiki ba bi boñ Libna.

33 Ha nyen kiñe Gézer+ le Hôram a bi lo i hôla Lakis, ndi Yôsua a nol nye ni bôt bé ba gwét bobasôna, a yék bé mut to wada.

34 I mbus, Yôsua ni bon ba Israel bobasôna ba nyodi i Lakis, ba ke i tison Églôn+ inyu leñ yo gwét. 35 I kel i, ba yoñ tison, ba tjé ki yo ni pansoñ. I yokel nu, ba nol bôt* bobasôna ba bé mu; ba boñ Églôn nlélém kiki ba bi boñ Lakis.+

36 I mbus, Yôsua ni bon ba Israel bobasôna ba nyodi i Églôn, ba ke i tison Hébrôn+ inyu leñ yo gwét. 37 Ba yoñ tison Hébrôn, ba tjé yo ni bitison bi bi nkéña yo, ba nol kiñe yé ni bôt bobasôna ba bé mu ni pansoñ, ba yék bé mut to wada. A bi tjé i tison ini ni bôt* bobasôna ba bé mu, nlélém kiki a bi boñ Églôn.

38 Sôk i nsôk, Yôsua ni bon ba Israel bobasôna ba yoñ njel i tison Débir,+ inyu leñ yo gwét. 39 Ba yoñ tison Débir ni bitison bi bi nkéña yo, ba nol kiñe yé ni bôt bobasôna ba bé mu ni pansoñ, ba tjé+ bôt* bobasôna ba bé mu bitison bini, ba yék+ bé mut to wada. Yôsua a bi boñ Débir ni kiñe yé nlélém kiki a bi boñ Hébrôn, ni kiki a bi boñ Libna ni kiñe yé.

40 Yôsua a yoñ nkoñ wonsôna, hala wee mbok dikôa, Négeb, Séféla,+ ni minkoñ mi mi yé nyoo isi dikôa; a yémbél ki bikiñe gwap gwobisôna, a yék bé mut to wada. A tjé+ hiki yom i nhép, kiki Yéhôva, Nyambe nu Israel a bi kal+ nye. 41 Yôsua a yoñ nkoñ u mbôdôl i Kades-Barnéa+ letee ni i Gasa,+ a yoñ yak nkoñ u Gôsen+ wonsôna letee ni i Gibéôn.+ 42 Yôsua a yémbél i bikiñe bi gwobisôna, a yoñ ki nkoñ wap i nlélém ngéda, inyule Yéhôva, Nyambe nu Israel, a bé jo inyu bon ba Israel.+ 43 I mbus, Yôsua ni bon ba Israel ba témb i homa ba bé yééne, i Gilgal.+