Bakéés

20 I mbus ngéda, bon ba Israel bobasôna, ibôdôl i Dan+ letee ni i Béer-Séba, ipam i loñ Giléad,+ hala wee litén jolisôna li kodba ngem yada* i bisu bi Yéhôva i Mizpa.+ 2 Baane ba litén lôñni bôt ba matén momasôna ma Israel ba bé ha ngéda litén li Nyambe li bi kodba; 400 000 bisônda bi bi nkil ’isi bi bé ha, bi ban-ga paminsoñ.+

3 Lôk Benyamin i bi nok le bon ba Israel ba mbet i Mizpa.

I mbus, bon ba Israel, ba kal le: “Kala bés lelaa i jam li bilim lini li mbôña?”+ 4 Ha nyen man Lôk Lévi,+ nlôm muda ba bi nol, a bi kal le: “Me bi ke i Gibéa+ nu Lôk Benyamin, me ni linyaa jem le di tégbaha u. 5 Ndi bôt* ba Gibéa ba bi telep ni juu, ba kéña ndap. Ba bé sômbôl nol me; sôk i nsôk, ba bi lalna linyaa jem ni ngui, a wo.+ 6 Me bi yoñ mim u linyaa jem, me kit wo bikét bikét, me om i bikét bi i nkoñ u Israel wonsôna,+ inyule i bôt bana ba bi boñ jam li wonyuu ni jam li mbolo i Israel. 7 Nano, a bôt ba Israel, tina mahoñol+ manan ni yoñ ki makidik hana.”

8 Ha nyen bôt bobasôna ba litén ba bi telep ngem yada,* ba kal le: “To wada wés a ga ke bé i ndap yé libadô, to témb i nyeni. 9 I jam lini jon di ga boñ: di nleñ mbam+ inyu yi bonjee ba ga ke i jôs Gibéa gwét. 10 Ikété loñ i Israel yosôna, d’a pohol 10 li bôt ikété 100, 100 bôt ikété 1 000, 1 000 hi bôt ikété 10 000, le ba kot bijek inyu ntôñ gwét; kayéle bajogwét ba kee i jôs Gibéa nu Lôk Benyamin inyu jam li mbolo ba bi boñ i Israel.” 11 Ha nyen bôt ba Israel ba bi kodba wengoñle mut wada inyu ke i jôs i tison i gwét.

12 I mbus, matén ma Israel ma om bôt inyu kal bôt bobasôna ba litén li Benyamin le: “Limbe jam li bilim di nok le li mbôña i bééni? 13 Tina bés bibéba bi bôt bi Gibéa+ le di nol bo, di héya jam libe i Israel.”+ Ndi bôt ba Lôk Benyamin ba bi tjél nôgôl bon ba Israel, lôkisañ yap.

14 Yak bon ba Lôk Benyamin ba nyodi bitison gwap, ba kodba i Gibéa inyu jôs bon ba Israel gwét. 15 I kel i, bon ba Lôk Benyamin ba bi sébél mu bitison gwap 26 000 bôt ba ba bééna paminsoñ, handugi i 700 bôt ba bi bôk ba pohol i Gibéa. 16 Mu ntôñ u, 700 bôt i bé limoña. Hiki wada wap a bé leñ ndamb, a bé les bé to ndék.

17 U héya Lôk Benyamin, bon ba Israel ba bééna 400 000 bôt ba ba bééna paminsoñ,+ hiki wada wap a bak njogwét nunkeñi. 18 Ba bi ke i Bétel inyu yi sômbôl i Nyambe.+ Bon ba Israel ba bat le: “Njee ikété yés a ga bôk ke inyu jôs Lôk Benyamin?” Yéhôva a timbhe le: “Yuda nyen a’ bôk ke.”

19 I mbus hala, bon ba Israel ba telep kegla, ba ke ba téé mintôñ nwap mi gwét bebee ni Gibéa.

20 Bon ba Israel ba bi kôôba le ba nleñ Lôk Benyamin gwét; ba téé mintôñ nwap mi gwét le mi ba bebee i jôs Gibéa gwét. 21 Ha nyen bon ba Lôk Benyamin ba bi nyodi i Gibéa ba nol 22 000 bon ba Israel i kel i. 22 Ndi ntôñ gwét u bon ba Israel u bi bana ñem ngui, ba témb ba téé mintôñ nwap mi gwét i nlélém homa, kiki hilo hi bisu. 23 Bon ba Israel ba bi bet i Bétel ba ee i bisu bi Yéhôva letee ni kôkôa, ba bat Yéhôva le: “Baa di nlama témb i jôs bilôk bikéé gwés Lôk Benyamin+ gwét?” Yéhôva a timbhe le: “Kena, ni leñ bo gwét.”

24 Ha nyen bon ba Israel ba bi kôôge bebee ni Lôk Benyamin i hilo hi nyônôs iba. 25 Lôk Benyamin i témb i nyodi i Gibéa inyu jôs bo hilo hi nyônôs iba, i nol 18 000 bon ba Israel+ bape, bobasôna ba bééba paminsoñ. 26 I mbus ha, bon ba Israel ba témb ba bet i Bétel. Ba ee i bisu bi Yéhôva,+ ba yén nyoo, ba sôga je*+ i kel i letee ni kôkôa; ba ti Yéhôva bisesema bi ntul i hié+ ni bisesema inyu kôp nsañ.+ 27 I mbus ha, bon ba Israel ba yéñ yi sômbôl i Yéhôva,+ inyule nkuu Malômbla u bañga Nyambe u bé nyoo ha ngéda i. 28 Finéhas+ man Éléazar, man Arôn nyen a bé gwel nson* i bisu bi nkuu Malômbla ha ngéda i. Ba bat le: “Baa di nlama témb i jôs bilôk bikéé gwés Lôk Benyamin gwét tole di ke ha bañ?”+ Yéhôva a timbhe le: “Kena, inyule yani m’a sem bo i moo manan.” 29 Bon ba Israel ba om ngim bôt le i solop+ mu mapañ ma Gibéa momasôna.

30 Bon ba Israel ba bi kôôba i ke jôs Lôk Benyamin i hilo hi nyônôs aa, ba témb ba téé mintôñ nwap mi gwét i bisu bi Gibéa i nlélém homa kiki ba bi bôk ba boñ.+ 31 I ngéda Lôk Benyamin i bi pam inyu jo gwét, ba kena bo haa ni tison+ yap. I mbus, kiki masañ ma bisu, Lôk Benyamin i bôdôl jôs ngim bisônda gwét mu minloñ, i nolok bo; nloñ wada mu u bé bet i Bétel, unu umpe u kenek i Gibéa. Ba bi nol jam kiki bo 30 ma bon ba Israel mu nwom.+ 32 Lôk Benyamin i kal le: “Di yé i yémbél bo kiki masañ ma bisu.”+ Ndi bon ba Israel ba kal le: “Di témb ni mbus, di ôt bo haa ni tison le ba pam i minloñ.” 33 Bon ba Israel bobasôna ba bi nyodi i homa wap, ba ke ba telep i Baal-Tamar; i nlélém ngéda, i bon ba Israel ba bé ba sôli bebee ni Gibéa ba tihil. 34 Hala nyen 10 000 di mimpohlak mi bôt ikété Israel yosôna mi bi tihil i bisu bi Gibéa, gwét bi bééna ngui ngandak. Ndi Lôk Benyamin i bé yi bé le ndutu i yé bo i nyuu.

35 Yéhôva a bi boñ le Israel a yémbél Lôk Benyamin;+ i kel i, bon ba Israel ba bi nol 25 100 bon ba Lôk Benyamin, bobasôna ba bééna paminsoñ.+

36 I ngéda Lôk Benyamin+ i bi tehe le bon ba Israel ba nke bo ngwéé, ba hoñol le ba ga yémbél gwét; ndi ba bi yi bé le bon ba Israel ba bi ke bo ngwéé inyule ba bé bôdôl i bôt ba bi solop bebee ni Gibéa+ ñem. 37 I bôt ba bé ba sôli ba bi pala boñ, ba leñ tison gwét. I mbus, ba tjama ikété tison, ba nol bôt ba tison ni pansoñ.

38 Bon ba Israel ba bi yegna ni bôt ba bi solop bebee ni tison le, i ngéda ba ga tehe hiida hi mbet i tison wee ba mal yémbél yo.

39 I ngéda bon ba Israel ba bi ôt ngwéé, bon ba Lôk Benyamin ba bôdôl leñ bo gwét, ba nol 30 ma bon ba Israel,+ ba kal le: “Ibabé pééna, di yé i yémbél bo gwét+ kiki ngéda bisu.” 40 Ndi hiida hi bi bôdôl bet i tison, kiki ba ntehe hala, ba yi le yimbne yap i. I ngéda bon ba Lôk Benyamin ba bi hielba, ba tehe le tison yosôna i yé i lék, hiida hi bedek i ngii. 41 Ha nyen bon ba Israel ba bi hielba, ba bôdôl jôs Lôk Benyamin gwét; miñem mi bôô Lôk Benyamin matjél inyule ba bi tehe le ndutu i nkwél bo. 42 Ba bôdôl ke bon ba Israel ngwéé, ba jôp i ñoñ; ndi bon ba Israel ba bi noñ bo; yak i bon ba Israel ba bi yémbél tison ba lo ba jôp mu gwét. 43 Ba bi kéña bon ba Lôk Benyamin, ba noñ bo ibabé waa. Ba tjé bo ibôdôl i bisu bi Gibéa, ba kenek i pes likôl. 44 Sôk i nsôk, 18 000 bon ba Lôk Benyamin ba wo, bobasôna ba bé bajogwét+ bakeñi.

45 Bon ba Lôk Benyamin ba bi ke ngwéé i ñoñ, ba solop i liaa li Rimôn,+ bon ba Israel ba bi nol* 5 000 di bon ba Lôk Benyamin mu minloñ, ba noñ ki bo letee ni Gidôm; ba nol ki 2 000 di bôt dipe. 46 Nsoñgi u bon ba Lôk Benyamin ba ba bi wo yokel u bé 25 000 bôt ba ba bééna paminsoñ;+ bobasôna bajogwét bakeñi. 47 Ndi 600 i bon ba Lôk Benyamin i bi ke ngwéé i ñoñ i liaa li Rimôn, ba yén nyoo liaa li Rimôn sôñ ina.

48 Bon ba Israel ba bi hielba, ba leñ bon ba Lôk Benyamin ba ba yé bitison gwét, ba nol bo lôñni pansoñ, bôt ba binam ni bilém, i bôt bobasôna ba bi yégle. Ba ligis ki bitison gwobisôna ba bé koba mu njel yap.