Hiôb
32 Ha nyen i bôt bana bo baa ba bi timbhe ha bé Hiôb, inyule a bé nkwoog nkaa le a téé sép.*+ 2 Ndi Élihu a bé ñunbak ngandak, a bé man Barakel nu a bé man Lôk Buz,+ a lôlak mu lihaa li Ram. A bi bep unbene Hiôb inyule a bé yéñ unda le nyen a téé sép, ndi ha Nyambe+ bé. 3 A bi unbene ki mawanda ma Hiôb mo maa inyule ma bi la bé timbhe Hiôb, ndi ma bé ôm ndigi Nyambe nsohi.+ 4 Kiki ba bé loo nye bimañ, jon Élihu a bé bem le Hiôb a mal pot inyu timbhe nye.+ 5 I ngéda Élihu a bi tehe le i bôt bana bo baa ba bééna ha bé yom i kal inyu timbhe Hiôb, a unup kiyaga. 6 Ha nyen Élihu, man Barakel, nu a bé man Lôk Buz, a bi yoñ hop; a kal le:
Inyu hala nyen me bak me yén nwee inyu ti bé lipém,+
me mbana bé to makénd i kal bé i yom me nyi.
7 Me bé hoñol le: ‘I bôt ba gwé ngandak nwii* bon ba nlama pot,
yak i bôt ba gwé ngandak dilo bon ba kôli niiga pék.’
8 Ndi i mbuu Nyambe a nti bôt ba binam,
nhébék u Nu ngui yosôna, won u nti bo pék.+
10 Jon me nkal le: ‘Emble me,
yak me m’a kal we i yom me nyi.’
11 Ngo me bak me mbem le ni mal pot,
me ntibil ki emble mahoñol+ manan,
i ngéda ni yéñék i yom n’a kal.+
13 Jon ni kal bañ le: ‘Bés bon di gwé pék;
Nyambe nyen a nkodol nye, ha mut binam bé.’
14 Me bé nyen Hiôb a pôdhak,
jon m’a timbhe bé nye kiki bé ni ntimbhe nye.
15 I bôt bana* ba yé nhelek, ba nyi ha bé lelaa ba timbhe we;
ba gwé ha bé yom i pot.
16 Me bemek, ndi ba nyoñ ha bé hop;
ba téé ndik ha, ba nla ha bé timbhe yom yo ki yo.
17 Ngéda ini le yak me me pot;
yak me m’a kal we i yom me nyi,
18 inyule me gwé ngandak mam i kal;
mbuu Nyambe won u nyégsa me i boñ hala.
19 Kété yem i yé kiki wai i i yé ikété hél ba ntibil yip,
kiki dibôi di wai di mondo di di nsômbôl bôô.+
20 Nwaha le me pot, le ndi me kôs hogbe!
M’a yibil nyo wem* inyu timbhe.