Hiôb
39 “Baa u nyi imbe ngéda miñin mi kembee mi dikôa mi ngwal?+
Baa u ma tehe miñin mi ngôlôñ mi ngwal bon bap?+
2 Baa u nla soñgol sôñ yañen i binuga bi, bi mbegee bon bap?
Baa u nyi imbe ngéda bi ngwélél?
3 Bi nyondop inyu gwal bon bap,
ha nyen njôghe yap nkôôga i mal.
4 Bon bap ba nyik bana ngui, ba nañ i ñemkété bikai;
ba nke ke yosôna, ba ntémb ha bé i boni.
5 Njee a bi nwas jagas li bikai le li ba kunde,+
njee a nhohol ki minkôô mi jagas li bikai?
6 Me bi boñ le tegep mbok i ñoñ i ba ndap yé,
me boñ ki le hisi hi hi gwé bas hi ba liyééne jé.
7 Jagas li bikai li nyén haa ni* liyôgbe li tison;
li nok bé nyayak u mut a nkena binuga.
8 Li nkiiña mu dikôa, li toñok bijek;
li nyéñ homa li nla léba to imbe kai yômi.
9 Baa nlôm nyaga bikai* a ga ba bebee i sélél we?+
Baa a ga tégbaha u i homa bilém gwoñ bi njél?*
10 Baa u yé le u kañ nlôm nyaga bikai ni nkôô le ndi a bôñôl we dikuu,
tole a ga noñ we i mbus inyu tém ’isi* nyoo i nsôsôgô?
11 Baa u ga bôdôl ngui yé ikeñi ñem,
u bemek le nyen a sélél we bibôlô gwoñ bi ngui?
12 Baa u ga bem le nyen a témbna we libumbul joñ,*
a kot ki jo i litidil joñ?
13 Ñin njok hinuni u mbép bipapai gwé ni maséé;
ndi bipapai gwé ni biléé gwé, baa u nla hégha gwo ni bi nyodol lom?+
14 Ngo ñin njok hinuni u ntjôô matjee mé ’isi,
u hak mo ikété biték le ndi ma nok lék.
15 Ndi u nhôya le kôô mut u nla bol mo,
tole nuga bikai i nla tidbe mo.
16 U ntjome bon bé wengoñle ba ta bé bon bé;+
u nkon bé woñi le bôlô yé i ba yañga.
17 Inyule Nyambe a bi nim wo* pék,
a ti bé to wo yi.
18 Ndi i ngéda u ntelep, u mbép bipapai gwé,
u nol hosi hiol, yak ni nkilhosi.
19 Baa wen u nti hosi ngui?+
Baa wen u ñeñg joo jé ni mahuu mbebi i ndéñgés?
20 Baa u nla boñ le hosi i pind kiki tandi?
Nhimnga wé u nkônhana woñi.+
22 I nol woñi hiol, i nsehla bé to i bisu bi yom yo ki yo.+
I nke bé pansoñ ngwéé.
23 Mu nyuu yé nyen liyôgbe li bot i i gwé makoñ li nôga,
soso likoñ ni man likoñ ba mbai.*
24 Mu kiki hosi i nyamnda ni ngôñ i ke, i nke ndik ni bisu,*
i ngéda ba nhem hioñ, i yé mbén telep homa wada.*
25 I ngéda ba nhem hioñ, i nkal le: ‘Hi hi!’
I nok njiñ lijo haa,
i nogok ki minlondok mi baane mintôñ mi gwét, ni nlondok u gwét.+
26 Baa wen u bi ti kukumba yi le a puue,
a samblak bipapai gwé inyu ke i pes nwelmbok?
27 Baa wen u nti nyôgôl oda le u bet i ngii,+
u ôñôl ki jumbul jé nyoo i bahoma ba nyôgi,+
28 le u tégbaha u mu ngii liaa,
le u yén ikété lisolbene jé mu libabat li hikôa?*
29 Nyoo nyen nyôgôl u nyiñil bijek+ gwé;
mis mé ma ntehe haa.
30 Bon bé ba nyo matjél;
to hee homa mim mi niñne, yak nyôgôl u yé ha.”+