Yérémia
9 Wee! Ibale ño wem u bak to lingen li malép,
mis mem ma bak pombe i gwiiha!+
Ki me ñee juu ni njamuha,
inyu bôt ba litén jem ba ba nôla.
2 Wee! Ibale me ban-ga to ndap bakén i ñoñ!
Ki me nyék bôt ba litén jem, me ke bo ngwéé,
inyule bobasôna ba yé bôt ba ndéñg,+
ntôñ u bôt ba nliba.
3 Hilémb hiap hi yé kiki mpihlôñgô le mut a nimbil, bitembee bi mpam bo i nyo kiki makoñ ma mpihlôñgô;
loñ i yôni ni malôga, maliga ma ta ha bé.+
“Ba mboñ ndigi béba ni béba,
ba gwé bé ngéda yem,”+ hala nyen Yéhôva a mpot.
4 “Hiki mut a yoñ yihe ni mut wé libôk,
mut a bôdlene bañ to maasañ ñem.
5 Hiki mut a mpôs mut wé libôk,
mut to wada a mpot bé maliga.
Ba bi niiga dilémb tjap i pot bitembee.+
Ba ntumbba i boñ mam mabe.
6 Ba niñil i homa bitembee bi yéne.
Malôga map ma nkéñ bo njel i yi me,” hala nyen Yéhôva a mpot.
7 Inyu hala nyen Yéhôva nu mintôñ mi gwét a nkal le:
“Me ga nyimbi bo, me wan ki bo,+
inyule kii ipe me yé le me boñ inyu ngond litén jem?
8 Hilémb hiap hi yé kiki likoñ li li nola, hi pémhak bitembee.
Ni nyo wé, mut a mpôdôs mut wé libôk ni nsañ,
ndi ki a ñamb nye ikété ñem wé.”
9 “Baa me nlama bé kéés bo inyu mam mana?” Hala nyen Yéhôva a mpot.
“Baa me nlama bé pun memede inyu mam i loñ ini i mboñ me?+
10 Me ga kohol maéya, me tjelel ki inyu dikôa,
me ga tôp hiémbi hi maéya inyu bahoma ba bikai i het ba yé ngi sal nwom,
inyule bobasôna ba nlék, kayéle mut to wada a ntagbe bé nyoo.
Ba nok ha bé to liyôgbe li bilém.
Yak dinuni di ngii ni binuga bi bikai bi nke ngwéé; bi ta ha bé.+
11 Me ga yilha Yérusalem nwind u ngok,+ liyééne li dibaa di njéé;+
me ga boñ le bitison bi Yuda bi yégle hôlô, mut nye ki nye a ga ba ha bé mu.+
12 Njee a gwé pék inyu tibil nok i jam lini?
Ibale Yéhôva a bi pôdôs nye, a añlege bés jo.
Inyuki loñ i ntjiba?
Inyuki i nlék kiki ñoñ,
kayéle mut nye ki nye a nlôô bé mu?”
13 Yéhôva a timbhe le: “Inyule ba bi bôk mbén* me bi ti bo, ba bi noñ bé yo, ba bi nôgôl bé to me. 14 Ndi ba bi nai ndik i boñ mam miñem nwap+ mi bé tinde bo i boñ, ba béghak bisat bi Baal kiki basañ bap ba bi niiga bo.+ 15 Jon Yéhôva nu mintôñ mi gwét, Nyambe nu Israel, a nkal le: ‘Me ga boñ le litén lini li je yom i nlol, me nyus ki bo malép ma ma gwé mbôñ.+ 16 Me ga sand bo le ba kee i biloñ le bomede, to basañ bap ba bi yi bé;+ me ga boñ le pansoñ i noñ bo letee me tjé bo.’+
17 Yéhôva nu mintôñ mi gwét a nkal le:
‘Boña mam ni pék.
Séblana bôda ba ba ntôp tjémbi di maéya,+
kala bôda ba ba gwé bôlô i ee i maéya le ba lok,
18 le ba hoo lo, ba bôô maéya inyu yés,
inyu boñ le gwiiha bi kuli bés i mis,
bikôkôp gwés bi mis bi yoo malép.+
19 Inyule maéya ma nôga i Siôn:+
“Kinje tjiba ini di nkôhna!
Kinje hison hikeñi hini!
Inyule di bi nyodi i loñ, ba tjé ki mandap més.”+
20 A bôda, emblana lipôdôl li Yéhôva.
Lega maôô i emble bibañga bi nyo wé.
Niigana bingond binan maéya,
hiki mut a niiga manyañ i hiémbi hi maéya hini.+
21 Inyule nyemb i nlo, i nlôô i biwinda gwés;
i njôp i minkum nwés mi mandap
i nkena bon bés ba ba yé mu minloñ,
ni boñge ba wanda ba ba yé mu mbégdé.’+
22 Kal le: ‘Haana nyen Yéhôva a mpot:
“Mim mi bôt mi mba mi niñi ’isi kiki binan i nwom,
kiki mis ma blé ma nkwo i mbus mut nu a mbumbul,
ibabé le mut a begee nwo.”’”+
23 Yéhôva a nkal le:
“Mut pék a kadba bañ le a gwé pék;+
mut nu a gwé ngui a kadba bañ le a gwé ngui;
ngwañ mut u kadba bañ ni lingwañ jé.”+
24 “Ndi i mut a ngwés kadba, a kadba inyu jam lini le:
a nyi wan mam, a nyi me,+
a nyi ki le me yé Yéhôva, Nu a gwé loñgeñem,* mbagi i téé sép ni telepsép hana ’isi,+
inyule i mam mana mon ma nlémél me,”+ hala nyen Yéhôva a mpot.
25 Yéhôva a nkal le: “Nuna-ki! Ngéda y’a lo le m’a kéés i bôt bobasôna ba yé nkweebaga, ndi ni maliga ba ta bé nkweebaga;+ 26 hala wee Égiptô,+ Yuda,+ Édôm,+ Lôk Amôn,+ Môab,+ yak ni bôt bobasôna ba nkit tjôñ i mapañ ma ño, ba yéénege i ñoñ;+ inyule biloñ gwobisôna bi yé ngi kweeba, yak miñem mi bôt ba litén li Israel nwominsôna mi ta bé nkweebaga.”+