Kaat Matéô

14 Ha ngéda i, kiki ñane nkoñ* le Hérôdé a bi nok mam Yésu a bé boñ,+ 2 a kal bagwélél bé le: “Yôhanes Nsôble nu. A ntuge, inyu hala nyen a mboñ bini bihélha bi mam.”+ 3 Hérôdé* a bi gwel Yôhanes, a kañ nye, a ha nye i mok inyu Hérôdia, nwaa maasañ le Filipô.+ 4 Inyule Yôhanes a bé kal nye le: “I ta bé we kunde i bana muda nu.”+ 5 Ndi to hala kiki a bé yéñ nol nye, a bé kon limut woñi inyule li bé yoñ Yôhanes kiki mpôdôl.+ 6 Ndi i ngéda ngand ligwéé li Hérôdé+ i bé tagbe, ngond Hérôdia i sak i bisu bi bakén, hala a lémél Hérôdé ngandak+ 7 kayéle a bôn, a kum soñ le a nti nye kii yosôna a mbat. 8 Ha nyen nyañ a bi tinde nye i kal le: “Ti me ño u Yôhanes Nsôble hana i nleha pan.”+ 9 Hala a bi tééñga kiñe. Ndi to hala, a bat le ba ti nye wo inyule a bi kum soñ i bisu bi bakén ba bé je* ni nye. 10 Jon a bi om le ba kit Yôhanes ño i ndap mok. 11 Ba lona ño wé i nleha pan, ba ti wo hingonda, hi kena wo yak nyañ. 12 I mbus ngéda, banigil bé ba lo, ba yoñ mim wé, ba jô wo; i mbus, ba ke ba añle Yésu hala. 13 Kiki a nok hala, Yésu a jôp i môñgô, a nyodi ha, a ke i homa a yé nwee inyu ba nyetama. Ndi kiki mamut ma nok hala, ma noñ nye ni makôô, ma lôlak i bitison.+

14 I ngéda a bi pam i ngwañ, a tehe limut li bôt likeñi, a kônôl bo ngoo,+ a mélés ki makon ma bakokon bap.+ 15 Ndi i ngéda kôkôa i bi kwo, banigil bé ba lo nye ipañ, ba kal le: “I homa nunu a yé ñoñ, yak kel i yé nkenek; huuha mamut inyu boñ le ma kee i mambai, bomede ba somb bijek gwap.”+ 16 Ndi Yésu a kal bo le: “Ba nlama bé ke; tina bo bijek bébomede.” 17 Ba kal nye le: “Di gwé bé to yom hana, handugi bret bitan ni tjobi diba.” 18 A kal le: “Ni lona me gwo hana.” 19 A bat ki mamut le ma yén i ngii bikai. Ha nyen a yoñ bret bitan ni tjobi diba, a pa mis i ngii, a sayap gwo;+ i mbus, a bek bret, a ti gwo banigil bé, yak banigil bé ba ti gwo mamut. 20 Hala nyen bôt bobasôna ba bi je, ba nuu, ba yoñ yak bikét bi bi yégle, bi yon ikété 12 bisel.+ 21 Ndi i bet ba bi je ba bé jam kiki bo 5 000 di bôlôm, handugi bôda ni boñge batitigi.+ 22 Kunda yada i mbus ha, Yésu a kal banigil bé le ba jôp i môñgô, ba bôk nye bisu nyoo uu ngwañ, ndi nye a yégle inyu huuha mamut.+

23 Kiki a bi mal huuha mamut, a bet hikôa nyetama inyu soohe.+ I ngéda kôkôa i bi kwo, a bé a ngi yii nyoo nyetama. 24 Môñgô u bé u ma ke mbôgôl ni mbôgôl méta* haa ni ngwañ tuye, mangudga ma bé ndéñgés wo inyule mbebi i bé lôl bo bisu. 25 Ndi bebee ni maye ma kel,* a lo i koba bo, a kenek ni makôô i ngii tuye. 26 Kiki ba ntehe nye a nkil i ngii tuye, banigil bé ba kon woñi, ba kal le: “Yiinda i!” Ba lond ni ngui inyu ngandak woñi. 27 Ndi kunda yada, Yésu a kal bo le: “Ni bana makénd! Me nu! Ni kon bañ woñi.”+ 28 Pétrô a timbhe nye le: “A Nwet, ibale we nu, ti oda le yak me me kil i ngii malép, me loo me koba we.” 29 A kal le: “Lok!” Ha nyen Pétrô a bi nyodi i môñgô, a ke ni makôô i ngii malép inyu boma Yésu. 30 Ndi i ngéda a bi béñge mbuk mbebi, a kon woñi. Kiki a mbôdôl yin, a lond makeñi le: “A Nwet, tohol me!” 31 I nlélém ngéda, Yésu a sambal woo, a gwel nye, a kal nye le: “A mut hémle ititigi, inyuki u nwas le pééna i je we ñem?”+ 32 Kiki ba njôp i môñgô, mbuk mbebi a mal. 33 Ha nyen i bet ba bé ikété môñgô ba ti nye lipém,* ba kal le: “U yé toi Man Nyambe.” 34 I mbus, ba yap tuye, ba pam i ngwañ tuye, i Génésarét.+

35 Kiki bôt ba homa nu ba nyi nye, ba ep nwin mu nkoñ u wonsôna, ha nyen ba bi lona nye bôt bobasôna ba bé kon. 36 Ba yemhe ki nye le ba tihba ndigi to linjek li mbot yé ngii;+ ba bobasôna ba bé tihba jo, makon map ma bé mal, mal yosôna.