Kaat bisu i Miñañ
17 Kiki David a mal oñ ndap* yé, a jôp mu, a kal mpôdôl Natan+ le: “Béñge ki, me yiine ikété ndap i bikék bi sidar,+ ndi nkuu Malômbla u Yéhôva u yéne i ndap libadô.”+ 2 Natan a timbhe David le: “Boñ kiki ñem woñ u ntinde we i boñ, inyule bañga Nyambe a yé ni we.”
3 Ndi i u u, Nyambe a kal Natan le: 4 “Ke kal ngwélél wem David le: ‘Haana nyen Yéhôva a nkal: “We bé nyen w’a ôñôl me ndap me nlama yééne.+ 5 Inyule me bi yééne bé ikété ndap ibôdôl nu me bi nyodna Israel i Égiptô letee ni i len ini, ndi me bi yééne ndigi i mandap ma mabadô ni mandap ma mabadô, me bé me nyodi ini lap, me tagbe ii.*+ 6 Mu ngéda yosôna me bé kiha ni litén li Israel jolisôna, baa me bi tjeelene nkéés wada ikété bakéés me bi téé le ba éga litén, le: ‘Inyuki u ñôñôl bé me ndap i bikék bi sidar?’”’
7 “Nano ni, kal ngwélél wem David le: ‘Haana nyen Yéhôva nu mintôñ mi gwét a mpot: “Me bi yôñôl we nyoo i nwom, i het u bé téédana mintômba, inyu yilha we ñane litén jem Israel.+ 8 M’a ba ni we to hee homa u nke,+ m’a tjé ki baoo+ boñ bobasôna. M’a yilha jôl joñ kiki môl ma bôt bakeñi ba nkoñ ’isi.+ 9 Men m’a pohol homa inyu litén jem Israel, me yis ki jo mu. Ba ga yén mu ibabé le yom yo ki yo i tééñga bo; to bibéba bi bôt bi ga tét* ha bé bo kiki bi bé boñ bo kôba,+ 10 kiki ba bé boñ ibôdôl i ngéda me bé téé bakéés ba litén jem Israel.+ M’a tohol we i moo ma baoo+ boñ bobasôna. Me nkal ki we le: ‘Yéhôva a’ boñ le ane i nyodi bañ i lihaa joñ.’*
11 “‘“I ngéda dilo tjoñ di niñ di ga kola, u nwo,* ha nyen m’a yik boñ le man woñ munlôm wada ikété mbôda* yoñ,+ a ane, m’a lédés ki ane+ yé. 12 Nyen a ga ôñôl me ndap,+ m’a lédés ki ane yé i boga ni boga.+ 13 M’a ba isañ, nye ki a’ ba man+ wem. M’a waa bé unda nye gwéha*+ kiki me bi waa unda yo nu a bi bôk a ba kiñe.+ 14 M’a téé nye le a éga ndap yem, me yilha ki nye kiñe i boga ni boga,+ yééne yé ane y’a nom mba ni mba.”’”+
15 Natan a bi kal David i mam ma momasôna ni i yiinda ini yosôna.
16 Ha nyen Kiñe David a bi ke, a yén i bisu bi Yéhôva, a kal le: “A Yéhôva Nyambe, me yé njee? Yak bôt bem ba lihaa ba yé bonjee inyu kôhna i mam mana momasôna u mbôñôl me letee ni nano?+ 17 A Nyambe, u mpot kii bo le i mam u bi bôñôl me ma yé ndék. U mbôn ki me le lihaa jem li ga nom i ntandaa ngéda,+ u ntehe me kiki mut nu a kôli ni lipém likeñi,* a Yéhôva Nyambe. 18 Kii me nla ki kal, me ngwélél woñ David, inyu lipém lini u nti me? Inyule wemede u nyi me loñge loñge.+ 19 A Yéhôva, inyu loñge i ngwélél woñ ni inyule hala a bé sômbôl yoñ, u bi boñ i mam makeñi mana momasôna, u yelel ki bikeñi+ gwoñ.* 20 A Yéhôva,+ numpe a ta bé kiki we; handugi we,+ Nyambe numpe a ta bé. I mam momasôna di bi nok ma ñunda toi hala. 21 Limbe litén lipe li yé hana ’isi kiki litén joñ Israel?+ We a bañga Nyambe, u bi ke, u kobol jo le li ba litén+ joñ. Bihélha gwoñ bi mam ni mam moñ makeñi+ ma bi boñ le jôl joñ li yiba, u luhul ki biloñ bipe i bisu bi litén+ joñ u bi kobol i Égiptô. 22 U bi boñ le bon ba Israel ba ba litén joñ i boga ni boga.+ Yak we, a Yéhôva, u yila Nyambe+ wap. 23 Nano ni, a Yéhôva, boñ le mbônga u bi bôn ngwélél woñ ni lihaa jé u yon i boga ni boga. Soho, yônôs yaga mbônga+ woñ. 24 Jôl joñ li yiba, li kôhna ki lipém+ i boga ni boga, inyu boñ le bôt ba kal le: ‘Yéhôva nu mintôñ mi gwét, Nyambe nu Israel, a yé toi Nyambe inyu Israel!’ Boñ le lihaa li ngwélél woñ David li telep siñ i bisu gwoñ.+ 25 Inyule we, a Nyambe wem, u bi yeelene ngwélél woñ le ane y’a nyodi bé i lihaa jé.* Inyu hala nyen ngwélél woñ a nsoohe we ni botñem. 26 Nano ni, a Yéhôva, wen u yé bañga Nyambe, u mbôn ki ngwélél woñ i mam malam mana. 27 Jon soho, sayap lihaa li ngwélél woñ, li nom ki i boga ni boga i bisu gwoñ, inyule we a Yéhôva, i jam u nsayap li yé nsaibak i boga ni boga.”