Minson mi baôma

14 Ndi i Ikônium, i ngéda ba bi jôp ikété ndap bibégés i Lôk Yuda, ba pot i nya i yé le limut likeñi li Lôk Yuda ni li bôt ba Grikia li yila bahémle. 2 Ndi Lôk Yuda i i bé hémle bé, i tinde bôt* ba matén i oo lôk kéé ni i kolba yo.+ 3 Jon Paul bo Barnabas ba bi tégbaha ngandak ngéda nyoo, ba podok ni makénd ni ngui Yéhôva,* nu a bé gwélél biyimbne ni bihélha bi mam* bi bi bé bôña ni njel yap i bok mbôgi inyu bañga i konangoo yé i mbuma ñañ.+ 4 Ndi mbagla i kwo ikété bôt ba tison, bahogi ba bé i pes Lôk Yuda, ndi bape ba bé i pes baôma. 5 Bôt ba matén lôñni Lôk Yuda ni baéga bap ba base ba noode tééñga bo ni ôm bo ngok,+ 6 kiki ba nyis bo hala, ba ke ngwéé i bitison bi Likaônia, le Listra, ni Derbé, ni i mambai ma bé mu ipañ.+ 7 Nyoo nyen ba bi ke ni bisu i añal ñañ nlam.

8 Ndi mut wada a bé i Listra, a bé a yii ha, a bak bôk i makôô. A bi gwéé bôk, a ma ke bé kekikel. 9 I mut nunu a bé emble Paul a mpot. I ngéda Paul a bi nun nye siim, a tehe le a gwé hémle le a nla mal,+ 10 a kal ni kiñ ikeñi le: “Telep!” Ha nyen mut a bi ubla, a bôdôl ke.+ 11 l ngéda mamut ma bi tehe i jam Paul a bi boñ, ma lond makeñi ni hop Likaônia le: “Banyambe ba nyila kiki bôt ba binam, ba sôs i béhni!”+ 12 Ha nyen ba bi bôdôl sébél Barnabas le Zeus, ba séblak Paul le Hermes, inyule nyen a bé bôgna hop. 13 Yak prisi i Zeus, nu témpel yé i bééne i majubul ma tison, i lona balôm ba nyaga ni ntut mbônji* i manwemel; nye ni mamut ba yéñ ti bisesema.

14 Ndi i ngéda ñôma Barnabas bo ñôma Paul ba bi nok hala, ba pat mambot map, ba jôp ikété limut, ba lond le: 15 “A bôt, inyuki ni mboñ i mam mana? Yak bés di yé bôt ba binam ba ba gwé minlélém mi mandutu kiki bé.+ Ndi di ñañle bé ñañ nlam le ni kôm i gwañga bi mam bini mbus, ni hielba yak Nyambe nu a niñ, nu a bi hek ngii ni ’isi lôñni tuye ni gwom gwobisôna bi yé mukété.+ 16 I ngéda kôba, a bi nwas le biloñ gwobisôna bi noñ manjel ma nlémél bo,+ 17 ndi a bi bok yaga mbôgi+ inyu yé nyemede ni njel mam malam a mboñ, a tinak bé banop ba nlôl i ngii lôñni mangéda ma libumbul,+ a nuuhak bé ni bijek, a yônhak miñem minan ni maséé.”+ 18 To hala kiki ba bi pot i mam mana, hala a bé bé jam li ntomb i sôña mamut le ma sémél bo bisesema.

19 Ndi Lôk Yuda i lôl i Antiôkia ni i Ikônium, i tinde mamut,+ ba ôm Paul ngok, ba ôt nye, ba pémés nye i tison, ba hoñlak le a nwo.+ 20 Ndi i ngéda banigil ba bi kéña nye, a telep, a jôp i tison. I kel i bé noñ, a ke lôñni Barnabas i Derbé.+ 21 Kiki ba mal añal ñañ nlam nyoo tison i, ba yilha ki jôga li bôt banigil, ba témb i Listra, i Ikônium, ni i Antiôkia. 22 Ba lédés banigil*+ nyoo, ba ti bo makénd le ba téñbe ni hémle, ba kalak le: “Di nlama tagbene ikété ngandak mandutu inyu jôp i Ane Nyambe.”+ 23 Handugi hala, ba bi téé mimañ ikété hiki likoda,+ ba soohe, ba sôga je;*+ hala nyen Paul lôñni Barnabas ba bi ti bo i moo ma Yéhôva,* nu ba bi hémle.

24 I mbus, ba tagbene i Pisidia, ba pam i Pamfilia,+ 25 I ngéda ba bi mal añal bañga i Nyambe i Pergé, ba sôs i Atalia. 26 Nyoo nyen ba bi yoñ sitima inyu ke i Antiôkia, i homa lôk kéé i bi soohe Nyambe le a unda Paul bo Barnabas konangoo yé i mbuma ñañ, le ndi ba pam i gwel nson ba bi tip yônôs.+

27 I ngéda ba bi pam nyoo, ba kot likoda jolisôna, ba añal ngandak mam Nyambe a bi boñ ni njel yap, ni kiki a bi yible bôt ba matén njel hémle.+ 28 I mbus, ba tégbaha jôga li ngéda lôñni banigil.