Bingéngén

 2 lipém li Nyambe li yé le a sôô ngim jam,+

yak lipém li bikiñe li yé le bi tibil wan mam.

 3 Kiki ngii i yé haa, yak hisi hi bak njôôñ,

hala nyen mut a nla bé yi i yom i yé ikété ñem u kiñe.

 4 Héya silba mahindi mé,

ndi i ga kônde bai.+

 5 Héya béba mut i bisu bikiñe,

inyu boñ le yééne yé ane i tééba ikété telepsép.+

 6 U bédés bañ wemede i bisu bi kiñe,+

u yén bañ to ni bañga bôt,+

 7 i yé nseñ le nyemede a kal we le: “Bet nyono,”

 8 U pala bañ ke i minkaa i bisu bi ngomin;

inyule w’a boñ lelaa i mbus ngéda, ibale mut woñ libôk a nwéha we nyuu?+

 9 Kwel ni mut woñ libôk,+

ndi u yelel bañ to mam mé,*+

10 tiga le mut a nok i jam li, a wéha we nyuu,

u tôô ki jam libe* ndi u la ha bé sas jo.

11 Kiki matam ma gôl ikété biséya* bi silba,

hala nyen bibañga bi bi mpôda i loñge ngéda bi yé.+

12 Kiki dimbuñga* di gôl ni bieñg bi bañga gôl bi yé inyu maôô,

hala nyen mut nu a nti maéba ni pék a yé inyu mut nu a nok maéba.+

13 Kiki maok ma ma nsune* i ngéda libumbul,

hala nyen loñge nlegelnwin a yé inyu bôt ba ñom nye,

inyule a nhôgbaha nwet wé.*+

14 I mut a nkadba ni likébla li a maa bé ti,*+

a yé kiki ond ni mbebi bi bi nlona bé nop.

15 Ni wongut nyen ba nkwés ñane nkaa,

hilémb hi nwee hi nla bôk hés.+

16 Ibale u nléba wéi, je ndigi libim li nkola we;

ibale u nje wo ngandak, u yé le u lo.+

17 Kôô woñ u béna bañ ke i ndap i mut woñ libôk,

tiga le a waa we, a kahal oo we.

18 Kiki mboñgo kék, pansoñ, ni likoñ le ba nhôl,

hala nyen i mut a ntelbene mut wé libôk mbôgi bitembee a yé.+

19 I bôdôl mut nliba ñem* i ngéda ndutu,

i yé wengoñle mut nu a nje ni buga lisoñ, tole mut nu a nke ni buga kôô.

20 Kiki mut nu a nhéya mbot i ngéda lihep,

ni kiki séñha wai le ba nkôp ikété bas,*

hala nyen mut nu a ntubul nu a nok njôghe ñem tjémbi a yé.+

21 Ibale njal i gwé ñoo woñ, kébél nye;

ibale nyus i gwé nye, ti nye malép ma nyo,+

22 inyule u yé i kot makalak ma hié i ngii ño wé,*+

Yéhôva a ga bom ki we.

23 Mbebi i nlôl i ñombok i nlona banop,

yak hilémb hi hi ntjam hilégé hi nlona hiun.+

24 I yé nseñ le u yééne i likas li nyôl,

iloole u yééne i nlélém ndap ni muda jomol.*+

25 Kiki malép ma nsune ma yé inyu mut nu a yé nwaak,

hala nyen nwin nlam u u nlôl i loñ i yé haa u yé.+

26 Kiki lingen li li ntuñgla ni bee malép i i ñôbi,

hala nyen mut a téé sép a yé i ngéda a noñ maéba ma* béba mut.

27 I ta bé loñge i je ngandak wéi,+

i ta bé to loñge le mut a yéñ lipém jé nyemede.+