Kaat Korintô iba

10 Me Paul, memede yaga nyen me yé i soohe bé ni njel ñemlima ni loñgeñem i Kristô,+ to hala kiki me nene yañga mut i ngéda me yé i bisu binan,+ ndi me nyôñôl bé bitelbene bi ngui i ngéda me ta bé ha.+ 2 Me nsoohe le to i ngéda me yé ha, me bana bañ makénd i yôñôl bôt bahogi ikété nan bitelbene bi ngui me sômblak yoñ, bôt ba ba ntehe bés wengoñle di yé bôt ba nhiôm inoñnaga ni minsôn. 3 Inyule to hala kiki di niñ ikété minsôn,* di njo bé gwét inoñnaga ni minsôn. 4 Inyule bijôl gwés bi gwét bi ta bé bi minsôn,+ ndi Nyambe nyen a nti gwo ngui+ inyu bôk minkum mi mandap.* 5 Inyule di nhielel bipék ni hiki jam li ntelep ikolba yi i Nyambe,+ di nkena mahoñol momasôna i minkôm inyu boñ le ma nôgôl Kristô; 6 di yé ki nkôôbaga i kogse ngimanôgla yosôna+ i ngéda ni mal unda le bébomede ni yé manôgla i nya i yôni.

7 Ni nkéés mam i bitéé bi mis. Ibale mut nyemede a yé nkwoog nkaa le a yé nu Kristô, a tiimba hek pék munu jam lini le: kiki a yé nu Kristô, hala nyen yak bés di yé ba Kristô. 8 Inyule to ibale me nlama kadba ndék jôga inyu kunde Nwet a bi ti bés inyu lédés bé, ha inyu tômbôs bé bé,+ ki m’a wo bé nyuu. 9 Inyule me gwé bé ngôñ le i nene wengoñle me nsômbôl kônha bé woñi ni bikaat gwem. 10 Inyule bôt bahogi ba nkal le: “Bikaat gwé bi nyét, bi gwé ki ngui, ndi i ngéda nyemede a yé ha, a nyét bé,* yak bibañga gwé bi nhoi.” 11 I bôt ba mpot hala ba yi le i jam di nkal* ikété bikaat gwés i ngéda di ta bé ha, jon d’a boñ* i ngéda di mba ha.+ 12 Inyule di noode bé bii bésbomede i nlélém likala ni bôt bahogi ba ba mbégés bomede,+ to hégha bésbomede ni bo. Ndi i ngéda ba nhegna mintel bo ni bo, ba héghaga ki bo ni bo, ba gwé bé yi.+

13 Ndi bés d’a kadba bé inyu nkoñ u yé i mbus minwaa Nyambe a bi hégél bés,* ndi ndik inyu nson di ngwel ikété minwaa mi nkoñ Nyambe a nti bés, mu nkoñ u nyen ni nyééne.+ 14 Ni maliga, di ta bé lel minwaa mi nkoñ wés wengoñle u mpam bé nyoo bééni, inyule di bé bôt ba bisu i pamna ñañ nlam inyu Kristô letee ni nyoo bééni.+ 15 To, di ta bé i kadba inyu nson u mut numpe, jon di nlel bé minwaa mi nkoñ wés, ndi di gwé botñem le kiki hémle nan i nkônde hol, yak nson wés w’a kônde hol ikété minwaa mi nkoñ wés. Ha nyen nkoñ u nson wés w’a kônde keñep,* 16 kayéle di añal ñañ nlam i biloñ bi yé nyoo i mbus nan, le ndi di kadba bañ inyu nson u u mal bôña ikété nkoñ u mut numpe. 17 “Ndi i mut a nkadba, a kadba inyu Yéhôva.”*+ 18 Inyule i mut a mbôgôl nyemede mbôgi ilam,+ ha nye bé nyen a nlémél Nyambe, ndik nu Yéhôva* a mbôgôl mbôgi ilam.+