Minson mi baôma

5 Mut wada ba nsébél le Anania bona nwaa Safira ba nuñul hisi. 2 Ndi i mbus ni mbus, a tééda pes yada i moni, nwaa a yik hala, a lona ndigi jôga jada li moni, a bii jo isi makôô ma banigil.+ 3 Ndi Pétrô a kal le: “A Anania, inyuki u nwas le Satan a ti we makénd kayéle u nyéñ teembene+ mbuu mpubi+ i tééda jôga jada li moni mi hisi? 4 Ilole u nuñul hisi hi, baa hi bak bé hioñ? To i ngéda u bi mal nuñul hio, baa moni mi bak bé i moo moñ? Inyuki u nhoñol i nya jam ini mukété ñem woñ? U nteembene bé bôt ba binam, ndi Nyambe.” 5 I ngéda a bi nok bibañga bini, Anania a kwo ’isi, a wo. Ha nyen woñi nkeñi u kwél i bôt bobasôna ba bi nok i jam li. 6 I mbus ha, boñge ba wanda ba telep, ba lép* nye mabadô, ba kena nye, ba jô nye.

7 Ndi i mbus jam kiki bo ngeñ aa, nwaa a jôp, a yik bé i jam li ntagbe. 8 Pétrô a kal nye le: “Kal le me, baa bé bo iba ni nuñul hisi inyu ndamba ini?” A kal le: “Ñ, nyaa ndamba i.” 9 Jon Pétrô a bi kal nye le: “Inyuki bé bo iba ni nôgla inyu noode mbuu u Yéhôva?* Nun-ki, makôô ma bôt ba njô nlô woñ ma téé i nwemel, b’a kena yak we.” 10 I nlélém ngéda, a kwo i makôô ma Pétrô, a wo. I ngéda boñge ba wanda ba bi jôp, ba koba nye a nwo, ba kena yak nye, ba jô nye ipañ nlôm. 11 Jon woñi nkeñi u bi kwél likoda jolisôna lôñni i bôt bobasôna ba bi nok i mam mana.

12 Handugi hala, ngandak biyimbne ni mam ma hélha* bi bé bôña ikété litén ni njel moo ma baôma;+ bobasôna ba bé kodba i libebe li Salômô li li bééna ngandak mél.+ 13 Ni maliga, to hala kiki mut to wada ikété bana bape a bééna bé makénd i jôp i lôñ yap, litén li bé pot bo loñge. 14 Jam lipe ki, ngandak bahémle Nwet i bé kôndba, bôlôm ni bôda.+ 15 Ba bé lona yak bakokon i minloñ minkeñi, ba biak bo ha i bon ba binañi lôñni bibuñga inyu boñ le i ngéda Pétrô a mba a ntagbe, to yiye yé i tihba bahogi ikété yap.+ 16 Yak mamut ma bé waa bé lôl bitison bi nkéña Yérusalem, ma lon-ga bakokon lôñni bôt mimbuu mimbe mi bé tééñga; bobasôna ba bé témbna mbôô wap.

17 Ndi prisi keñi i telep, yak bôt bobasôna ba bé lôñni nye ba telep, ba bé banoñ ntôñ u Sadukai, bobasôna ba yon ni njôñ. 18 I mbus, ba gwel* baôma, ba ha bo i ndap mok i tison.+ 19 Ndi ni juu, añgel i Yéhôva* i yibil makôga ma ndap mok,+ i pémés bo, i kal le: 20 “Kena, telbana i témpel, ni waa bañ to añle bôt bibañga bi niñ gwobisôna.” 21 Kiki ba nok hala, ba jôp i témpel ni maye ma kel, ba bôdôl niiga.

I ngéda prisi keñi lôñni bôt ba bé ni nye ba bi lo, ba kot Ntôñ bakéés bakeñi* ni ntôñ wonsôna u mimañ mi bon ba Israel; i mbus, ba ep bagwélél i ndap mok le ba lona bo baôma. 22 Ndi i ngéda bagwélél ba bi pam nyoo, ba koba bé bo ikété ndap mok. Ba témb, ba añal i jam li bi tagbe, 23 ba kal le: “Di nkoba le ndap mok i yé nkwéhék loñge loñge, yak batat ba téé i makôga, ndi kiki di nyibil yo, di nkoba bé to mut mukété.” 24 I ngéda ñane batat témpel lôñni ñéga biprisi ba bi nok bibañga bi, ba hel ngandak, ba badbaga lelaa mam ma ga sôk. 25 Ndi mut wada a lo, a añle bo le: “Nuna-ki, i bôt ni nha mok, ba téé i témpel, ba niigaga limut.” 26 Ha nyen ñane batat témpel a ke i témpel lôñni bagwélél bé, a lona baôma, ndi ba bi gwélél bé ngui inyule ba bé kon woñi le limut li tiga ôm bo ngok.+

27 Jon ba bi lona bo, ba téé bo i bisu bi Ntôñ bakéés bakeñi. I mbus, prisi keñi i kahal bat bo mambadga, 28 i kal le: “Di bi ti yaga bé oda le ni niiga ha bañ i jôl lini,+ ndi nuna-ki, ni nyônôs Yérusalem ni biniigana binan, ni yé ki nnayak i kéhi matjél ma mut nu i ngii yés.”+ 29 Pétrô lôñni bana baôma bape ba timbhe, ba kal le: “Di nlama nôgôl* Nyambe iloo bôt.+ 30 Nyambe nu basôgôlsôgôl bés a bi tugul Yésu, nu ni bi péni i kék,* ni nol ki nye.+ 31 Nyambe a bi bédés nye, a bii nye i woo wé walôm, le a ba Mbôgna+ ni Ntohol+ inyu ti Israel hielñem+ lôñni nwéhél i bibéba.+ 32 Di yé ki mbôgi i mam mana,+ nlélém kiki mbuu mpubi,+ u Nyambe a bi ti i bôt ba nôgôl* nye.”

33 I ngéda ba bi nok hala, ba unup iloo hihéga,* ba yéñ le ba nol bo. 34 Ndi Farisai yada ba nsébél le Gamaliel,+ a telep ikété Ntôñ bakéés bakeñi;* a bé niiga mbén Môsi, a bak mut nu bôt ba bé diihe ngandak, a ti oda le ba pémés ndugi bo i mbégdé inyu ndék ngéda. 35 I mbus, a kal bo le: “A bôt ba Israel, yoña yihe ni i jam ni nyéñ boñ i bôt bana. 36 Kiki hihéga, i dilo di bi tagbe, Téuda a bi telep, a kadba le a yé bañga mut, yak ngandak bôlôm, jam kiki bo 400, i jôp mu ntôñ wé. Ndi ba bi nol nye, yak i bôt bobasôna ba bé noñ nye, ba sanda, ba lém. 37 I mbus yé, mut Galiléa le Yuda a telep i dilo di ñañga bôt, a ôt bôt i mbus yé. Ndi i mut nu a bi wo, yak i bôt bobasôna ba bé noñ nye ba tjama. 38 Jon, kiki mam ma yé hala, me nkal bé le, ni bana bañ jam jo ki jo lôñni i bôt bana, ndi nwaha bo nwee. Inyule ibale i jam lini tole nson unu u nlôl ni bôt ba binam, w’a tjiba; 39 ndi ibale u nlôl ni Nyambe, n’a la bé tjé bo.+ Yoña yihe inyule i nla ba le Nyambe nyemede nyen ni yé i jôs.”+ 40 Ha nyen ba bi emble maéba mé, ba sébél baôma, ba bép bo,*+ ba ti bo oda le ba pot ha bañ i jôl li Yésu; i mbus, ba nwas bo le ba kenek.

41 Ndi baôma ba bi nyodi i bisu bi Ntôñ bakéés bakeñi, ba konok maséé+ inyule ba bi éña kiki bôt ba kôli kôhna wonyuu inyu jôl jé. 42 Hiki kel, i témpel lôñni i mandap ni mandap,+ ibabé waa, ba bi kônde niiga ni añal ñañ nlam inyu Kristô le Yésu.+