Bakéés

6 Ndi bon ba Israel ba bi témb ba boñ mam mabe i mis ma Yéhôva,+ inyu hala nyen Yéhôva a bi sem bo i moo ma Lôk Madian nwii minsaambok.+ 2 Lôk Madian i bi tét Israel.+ Lôk Madian i bi tinde bon ba Israel i oñ masolbene* i dikôa, i bihôk bi maaa ni i bahoma ba yé ndutu i ke.+ 3 Hiki ngéda bon ba Israel ba bé sal nwom, Lôk Madian, Lôk Amalek+ ni bôt ba Likôl+ ba nlo i jôs bo. 4 Ba bé jôp i nkoñ u Israel, ba ôbhak bijek gwobisôna letee ni i Gasa. Ba bé yigle bé Israel yom i je yo ki yo, to ntômba, to nyaga, to jagas.+ 5 Ba bé ba lo ngandak kiki bitandi,+ ba bak ni bilém gwap lôñni mandap map ma mabadô, mut a bé la bé soñgol bo, to kamél+ yap; ba bé ba jôp ikété loñ inyu tjé yo. 6 Lôk Madian i bi boñ le bon ba Israel ba yila liyep ngandak; inyu hala nyen bon ba Israel ba bi bôdôl sébél Yéhôva le a hôla+ bo.

7 I ngéda bon ba Israel ba bi sébél Yéhôva le a hôla bo inyu mam Lôk Madian+ i bé boñ bo, 8 Yéhôva a ômle bon ba Israel mpôdôl nu a bi kal bo le: “Yéhôva Nyambe nu Israel a nkal le: ‘Me bi nyodna bé i loñ Égiptô, i homa ni bé minkol.+ 9 Me kobol bé i moo ma bôt ba Égiptô, ni i moo ma bôt bobasôna ba bé tééñga bé, me luhul bo i bisu binan, me ti ki bé loñ+ yap. 10 Me kal ki bé le: “Men me yé Yéhôva Nyambe+ nan, ni nlama bé kon banyambe ba Lôk Amôr woñi, nyoo i loñ ni nke i yééne.”+ Ndi ni bi nôgôl bé me.’”*+

11 I mbus ngéda, añgel i Yéhôva i lo+ i yén isi e ikeñi i i bé i Ôfra; Yôas man Lôk Abiézer, nyen a bééna e i.+ Lok yé Gidéôn+ i bé bép blé i waa wai inyu boñ le Lôk Madian ba tehe bañ yo. 12 Añgel i Yéhôva i pémél nye, i kal nye le: “Yéhôva a yé lôñni we,+ a mpémba njogwét.” 13 Ha nyen Gidéôn a bi timbhe nye le: “A nwet wem, nwéhél me, ibale Yéhôva a bak toi ni bés, inyuki i mam mana momasôna ma nkwél bés?+ I bihélha gwé bi mam gwobisôna batata ba bi añle bés+ bi yé hee, ba kalak le: ‘Baa Yéhôva bé nyen a bi nyodna bés i Égiptô?’+ Nano, Yéhôva a ntjôô+ bés, a nti bés i moo ma Lôk Madian.” 14 Yéhôva a telep nye i bisu, a kal le: “Kenek, gwélél ngui yoñ inyu tohol Israel i moo ma Lôk Madian.+ Baa me bé nyen me ñom we?” 15 Gidéôn a timbhe nye le: “A Yéhôva, nwéhél me. Lelaa me yé le me kobol Israel? Nun-ki! Lôk* yem i nlôôha ba ntitigi ikété litén li Manasé, yak ikété lihaa li tata, men me nlôôha ba nuntitigi.” 16 Ndi Yéhôva a kal nye le: “Inyule m’a ba ni we,+ jon w’a bép Lôk Madian ndik wee ba bak mut wada.”

17 Ha nyen Gidéôn a kal nye le: “Nano, ibale me nene loñge i mis moñ, unda me ngim yimbne i i nkwés me nkaa le, we toi nyen u yé i pot ni me. 18 Soho, u nyodi bañ hana letee me témb me lo ni likébla jem, me bii jo i bisu gwoñ.”+ A timbhe le: “Me ga yégle hana letee u témb u lo.” 19 Gidéôn a jôp i ndap yé, a yoñ man kembee, a lamb nye, a yoñ yak jam kiki bo 11 kilô* i flawa,+ a boñ bret bi ngi-séñha. A ha nuga ikété sel, a ha mpele ikété hibee; i mbus, a lona gwo añgel nyono i mbégdé, a kébél nye gwo isi e ikeñi.

20 Añgel i bañga Nyambe i kal nye le: “Yoñ nuga ni bret bi ngi-séñha, u bii gwo i ngii soso liaa nu a yé hana, u kôp ki mpele mu ngii.” A boñ hala. 21 I mbus, añgel i Yéhôva i sambal woo, lisuk li ntoñgo wé li tihba nuga ni bret bi ngi-séñha,+ hié hi pémél i liaa, hi ligis nuga ni bret bi ngi-séñha. Ndi añgel i Yéhôva i nyoi. 22 Ha nyen Gidéôn a bi sôk nok le añgel i Yéhôva+ i.

I nlélém ngéda, Gidéôn a kal le: “Ngoo ni me, a Nwet Bayemlikok le Yéhôva, inyule me ntehe añgel i Yéhôva mbom ni mbom!”+ 23 Ndi Yéhôva a kal nye le: “Nsañ u ba ni we. U kon bañ woñi;+ w’a wo bé.” 24 Inyu hala nyen Gidéôn a bi oñ juu li bisesema inyu Yéhôva, ba o jo jôl le Yéhôva-Salom,*+ ba ngi séblak jo hala letee ni len. Li ngi yii i Ôfra nu Lôk Abiézer.

25 I u u, Yéhôva a kal nye le: “Yoñ man nlôm nyaga nu isoñ, man nyaga nu yônôs iba, nu a gwé nwii minsaambok. U bôk juu li bisesema li Baal li isoñ a bi oñ, u kit ki jél lipubhaga* li li yé ha ipañ.+ 26 I mbus, yoñ ngok, u kééha yo inyu ôñôl Yéhôva Nyambe woñ juu li bisesema mu ngii liaa li. U yoñ jél lipubhaga,* u bahal jo, mu nyen u ga tine man nlôm nyaga nu yônôs iba kiki sesema i ntul i hié.” 27 Gidéôn a bi yoñ jôm li bôt ikété bagwélél bé, a boñ i jam Yéhôva a bi kal nye. Kiki a bé kon lihaa li isañ ni bôt ba tison woñi ngandak, a bi boñ bé i jam li njamuha, ndi a bi boñ jo ni juu.

28 I ngéda bôt ba tison ba bi pule tôde kegla, ba tehe le ba mbôk juu li bisesema li Baal, ba koba le ba nkit yak jél lipubhaga* li li bé ha ipañ; ba koba ki le ba ñoñ juu li bisesema li mondo, ba sem man nlôm nyaga mu. 29 Ba kahal badna le: “Njee a mboñ i jam lini?” Kiki ba nwan, ba kal le: “Gidéôn nu, man Yôas nyen a mboñ i jam li.” 30 Ha nyen bôt ba tison ba bi kal Yôas le: “Pémés man woñ, di nol nye inyule a mbôk juu li bisesema li Baal, a kit ki jél lipubhaga* li li bak ha ipañ.” 31 Yôas+ a timbhe i bôt bobasôna ba bé nye i bisu le: “Baa bé bon ni nlama sôñ Baal? Baa bé bon ni nlama tohol nye? Nu ni nu a nsôñ nye a nlama nôla i kegla+ ini. Ibale a yé nyambe,+ a sôñ nyemede hala kiki ba mbôk juu jé li bisesema.” 32 I hilo hi nyen Yôas a bi sébél Gidéôn le Yérub-Baal,* a kal le: “Baal a sôñ nyemede hala kiki ba mbôk juu jé li bisesema.”

33 Lôk Madian+ yosôna, Lôk Amalek+ ni bôt ba Likôl ba kot mintôñ nwap mi gwét;+ ba yap lép, ba ke ba yééne i nsôsôgô* u Yézréel. 34 Ha nyen Gidéôn+ a bi kôhna mbuu u Yéhôva, a hem hioñ;+ Lôk Abiézer+ ba lo i nit nye. 35 A om balegelnwin ni nkoñ u Manasé wonsôna, yak bo ba lo i nit nye. A om balegelnwin bape i nkoñ u Aser, u Zébulôn ni u Naftali, yak bo ba kodba, ba lo i nit nye.

36 I mbus, Gidéôn a kal bañga Nyambe le: “Ibale u nsômbôl tohol Israel ni njel yem kiki u bi bôn+ me, 37 m’a tek koo ntômba i i gwé mahuu i litidil. Ibale me nkoba manwee ma nyôôs koo ntômba, ndi homa nyensôna a bak nnumuk; ha nyen m’a yi le w’a tohol Israel ni njel yem kiki u bi bôn me.” 38 Hala nyen i bi bôña. I ngéda a bi pule telep kegla, a nwot koo ntômba, malép ma pam mu, ma yônôs soso lidis. 39 Ndi Gidéôn a kal bañga Nyambe le: “U unbene bañ me, me nsômbôl ki bat we jam lipe. Soho, neebe le me gwélél ki koo ntômba ngélé ipe inyu yi too w’a ba lôñni me. Soho, boñ le koo ntômba yotama i ba nnumuk, ndi manwee ma yôôs homa nyensôna.” 40 Hala nyen Nyambe a bi boñ i u u; koo ntômba yotama yon i bé nnumuk, ndi manwee ma bi yôôs homa nyensôna.