Bakéés

8 Ha nyen bôt ba Éfraim ba bi kal nye le: “Inyuki u mboñ bés hala? Inyuki u nsébél bé bés i ngéda u kenek i jôs bôt ba Madian?”+ Jon ba bi nôôma nye béba ngandak.+ 2 Ndi Gidéôn a kal bo le: “Baa i jam me mboñ li nloo li ni bi boñ? Baa minyégla mi matam ma Éfraim+ mi nloo bé libumbul li Abiézer?+ 3 Baa i moo manan bé nyen Nyambe a bi sem baane ba Madian le Ôreb ni Zéeb,+ baa i jam me mboñ li nloo li ni bi boñ?” Kiki a mpot hala,* hiun hiap hi sôs.*

4 I mbus, Gidéôn a yap Yordan. Nye ni 300 bôt i bé ni nye, ba bé nwaak, ndi to hala ba bi kônde noñ baoo bap. 5 Ha nyen a bi kal bôt ba Sukôt le: “Soho, tina i bôt ba yé lôñni me bret, inyule ba yé nwaak, me yé i noñ Zéba bo Zalmuna, bikiñe bi Madian.” 6 Ndi baane ba Sukôt ba kal nye le: “Inyuki di nlama ti ntôñ woñ gwét bret? Baa u ma gwel ndugi Zéba bo Zalmuna?” 7 Ha nyen Gidéôn a bi timbhe bo le: “I ngéda Yéhôva a ga sem Zéba bo Zalmuna i moo mem, me ga yoñ nkôô biloo ni bikai bi ñoñ+ inyu bép bé.” 8 I mbus, a nyodi ha, a ke i Pénuel, a bat bôt ba Pénuel nlélém jam, ndi bôt ba Pénuel ba timbhe nye nlélém kiki bôt ba Sukôt. 9 A kal yak bôt ba Pénuel le: “Ibale me ntémb ni nsañ, m’a bôk nkum ndap+ unu.”

10 Zéba bo Zalmuna ba bé i Karkôr ni mintôñ nwap mi gwét, jam kiki bo 15 000 bôt. Botama bon ba bé ba ngi yii ikété ntôñ gwét wonsôna u bôt ba Likôl,+ inyule 120 000 bôt ba gwét ba ba bééna pansoñ ba bi wo. 11 Gidéôn a bi nôñôl i njel bôt ba nyééne i mandap ma mabadô ba nkil, i pes likôl i Nôba ni i Yogbeha,+ a leñ ntôñ bisônda gwét, nyoo i het ba bé ba sôlne. 12 Zéba bo Zalmuna, bikiñe bi Madian gwo biba bi bi ke ngwéé, Gidéôn a noñ bo, a gwel bo. Baoo bap bobasôna ba kahal sehla.

13 Gidéôn man Yôas, a kahal huu i gwét, a lôô i njel i nke i Héres. 14 Mu njel, a gwel mañge wanda nu a bé lôl i Sukôt, a kahal bat nye mambadga. I mañge wanda nu a tilna nye môl ma baane ni ma mimañ mi Sukôt, ba bé 77 bôt. 15 I mbus, Gidéôn a ke, a tehe bôt ba Sukôt, a kal bo le: “Zéba bo Zalmuna bana! Inyu yap bé nyen ni bé nyumblana me, ni kalak le: ‘Baa u ma gwel ndugi Zéba bo Zalmuna, inyu boñ le di ti bôt boñ bret inyule ba yé nwaak?’”+ 16 A gwel baane ni mimañ mi tison i Sukôt, a bép bo ni nkôô biloo ni bikai bi ñoñ.+ 17 I mbus, a bôk nkum ndap u Pénuel,+ a nol bôt ba tison.

18 Gidéôn a bat Zéba bo Zalmuna le: “Mimbe mintén mi bôt ni bi nol i hikôa Tabor?” Ba timbhe nye le: “Ba bé kiki we, hiki wada wap a bé pôna man kiñe.” 19 Ha nyen a bi kal bo le: “Ba bé lôk kéé yem, bon bôlôm ba mama yem. Ndi me nkum soñ ni niñ i Yéhôva le, ibale ni nwas bo le ba niñ, ki to me me ta bé nyégsaga i nol bé.” 20 I mbus, a kal Yéter, man wé nu bisu le: “Telep, nol bo.” Ndi mañge wanda a bi la bé bada pansoñ yé inyule a bé kon woñi, a bé a ngi yii mañge wanda. 21 Zéba bo Zalmuna ba kal le: “Telep, wemede u nol bés, inyule ba nyil bañga munlôm i ngui yé.”* Jon Gidéôn a bi telep, a nol Zéba bo Zalmuna,+ a yoñ bieñg bi bi bééna maôñg ma sôñ, bi bi bé kamél yap i joo.

22 I mbus ngéda, bon ba Israel ba kal Gidéôn le: “Yila ñane wés, we ni lok yoñ lôñni nlal woñ inyule u mpéyés bés i moo ma bôt ba Madian.”+ 23 Gidéôn a kal bo le: “To me, to man wem, di ga ane bé bé. Yéhôva nyen a ga ba ñane nan.”+ 24 Gidéôn a kônde le: “Nwaha, me bat bé ngim jam: hiki mut a ti me hilonde hi jôl mu nkus a nkadal.” (Inyule Lôk Ismael+ i bé i gwé dilonde di gôl di ba nhaba i môl.) 25 Ba timbhe le: “Di ga ti we i gwom u mbat.” Ba tek mbot ’isi, hiki wada a leñ hilonde a bi yoñ mukété gwom a bi kadal. 26 Dilonde di gôl le ba nhaba i môl Gidéôn a bi bat, di bé yét 1 700 sékel i gôl,* handugi bieñg bi bi bééna maôñg ma sôñ, dimbuñga,* mambot ma wedewede* bikiñe bi Madian bi nhaba, ni minsañ mi joo inyu kamél.+

27 Gidéôn a bi boñ éfôd*+ lôñni i gwom bi, a bii yo i tison yé le Ôfra;+ bon ba Israel bobasôna ba kahal bégés yo kiki nyambe,*+ i yilna Gidéôn ni lihaa jé hiandi.+

28 Hala nyen bon ba Israel ba bi yémbél Lôk Madian,+ Lôk Madian i bi noode ha bé ki jôs bo.* I dilo di Gidéôn,+ loñ i bi yén ikété nsañ* 40 ma nwii.

29 Yérub-Baal+ man Yôas a bi témb i mbai yé, a yén ki nyoo.

30 Gidéôn a bi bana 70 ma bon bôlôm* inyule a bééna ngandak baa. 31 Yak linyaa jé li li bé i Sikem li bi gwélél nye man munlôm, Gidéôn a o nye jôl le Abimélek.+ 32 Gidéôn man Yôas a bi wo, a ma un, ba jô nye i soñ isañ le Yôas, i Ôfra nu Lôk Abiézer.+

33 Kiki Gidéôn a nwo ndigi, bon ba Israel ba témb ba bôdôl bégés* Baal,+ ba yilha Baal-Bérit nyambe+ wap. 34 Bon ba Israel ba bi bigda ha bé Yéhôva Nyambe+ wap, nu a bi sôñ bo i moo ma baoo bap bobasôna ba bé bo ipañ;+ 35 ba bi unda bé to lihaa li Yérub-Baal, hala wee Gidéôn, loñgeñem* inyu mam malam momasôna a bi bôñôl Israel.+