Bakéés

7 Yérub-Baal hala wee Gidéôn+ ni bôt bobasôna ba bé lôñni nye, ba pule telep, ba ke ba yééne i lingen li Harod, ndi bôt ba Madian ba bééne Gidéôn i pes ñombok, i hikôa Môré, i nsôsôgô.* 2 Yéhôva a kal Gidéôn le: “M’a sem bé Lôk Madian i moo+ ma bôt bana inyule ba yé ngandak. Tiga le bon ba Israel ba kahal ngôgôp, ba kalak le: ‘Ni ngui yés nyen di nyémbél.’*+ 3 Soho, kal bôt ba litén le: ‘Nu ni nu a kon woñi, a sehlaga ki, a témb i mbai+ yé.’” Ha nyen Gidéôn a bi noode bo. I mbus, 22 000 bôt ba témb i mambai map, 10 000 di bôt jon li yégle.

4 Ndi Yéhôva a kal Gidéôn le: “Bôt ba ngi yii ngandak. Kena bo i lép inyu boñ le me noode bo nyoo. I ngéda m’a kal we le: ‘Nunu a nke ni we,’ wee nyen a ga ke ni we, ndi i ngéda m’a kal we le: ‘Nunu a nke bé lôñni we,’ wee nyen a ga ke bé lôñni we.” 5 Gidéôn a sôhna bisônda gwé i lép.

Ha nyen Yéhôva a bi kal Gidéôn le: “Bagal bisônda bi nla malép ni hilémb kiki ngwo pes yada; ni bisônda bi ñôm maboñ ’isi inyu nyo malép pes ipe.” 6 Nsoñgi u bisônda bi bé yoñ malép ni woo inyu nyo u bé 300; bini bisônda bi bi yégle, bon ba bé ôm maboñ ’isi inyu nyo.

7 Yéhôva a kal Gidéôn le: “Lôñni i 300 i bôt ini i i nla malép nyen m’a tohol bé, me ga sem Lôk Madian i moo+ manan. Ndi nwas bana bôt bape ba huu i mambai map.” 8 Inyu hala nyen ba bi yoñ bijek gwap ni dioñ tjap, Gidéôn a huuha bana bon ba Israel bape, a yégla ndigi 300 bôt. Liyééne li Lôk Madian li bak i pes makuli, nyoo i nsôsôgô.*+

9 I u u, Yéhôva a kal Gidéôn le: “Telep, ke jôs Lôk Madian, inyule me nsem bo i moo+ moñ. 10 Ndi ibale u nkon woñi i jôs bo, sôs nyoo i liyééne ni ngwélél woñ le Pura. 11 Emble i jam ba nkal, i mbus u ga bana makénd* i jôs bo.” Ha nyen Gidéôn bo ngwélél wé le Pura ba bi sôs i het baoo bap ba bé ba yii.

12 Lôk Madian, Lôk Amalek ni bôt ba pes Likôl+ bobasôna ba bé ntjamak ni nsôsôgô* wonsôna kiki bitandi; kamél yap i bé ngi nsoñgi+ kiki lisege li li yé i ngwañ tuye. 13 Gidéôn a lo, a ada sônda yada i yé añle liwanda jé jada eem, a kal nye le: “I eem ini yon me ñemel. Me ntehe ngiiña bret i kôn* i i mbiiñge i liyééne li Lôk Madian. I pam bebee ni ndap libadô yada, i kumul yo, i bôk+ yo. Ñ, ndap i kwo, i nyugda yosôna.” 14 Ha nyen liwanda jé li bi kal le: “I nla ndik ba pansoñ i Gidéôn+ man Yôas, mut Israel. Nyambe a mal sem Lôk Madian ni liyééne jap i moo+ mé.”

15 Ndik kiki Gidéôn a nok ba ñañal i eem i ni ndoñi+ yé, a ôôp inyu bégés Nyambe. I mbus, a témb i liyééne li bon ba Israel, a kal le: “Telbana, inyule Yéhôva a nsem Lôk Madian i moo manan.” 16 Gidéôn a kap 300 bôt mintôñ maa, a ti bobasôna dioñ,+ basoso ba dimbôga di di bé hôlô lôñni nwai. 17 Gidéôn a kal bo le: “Béñgnana me, ni boñ nlélém kiki me. I ngéda m’a ba bebee ni liyééne li baoo bés, ni nlama boñ ndik kiki ni ntehe me me mboñ. 18 I ngéda me ni i bôt bobasôna ba yé lôñni me di ga hem dioñ, yak bé ni nlama hem dioñ, ni kiiña ni liyééne jolisôna, ni londok le: “Inyu Yéhôva ni inyu Gidéôn!’”

19 Gidéôn ni 100 bôt i i bé lôñni nye, ba lo bebee ni liyééne i ñem mau,* i ngéda batat ba ntip yoñ nson wap. Ba hem dioñ,+ ba bol basoso bap ba dimbôga ba ba bééna i moo.+ 20 Hala nyen mintôñ nwo maa mi bi hem dioñ, mi bol ki basoso ba dimbôga. Ba gwel nwai nwap ni woo waé, ni woo walôm ba gwel dioñ, ba lond le: “Pansoñ i Yéhôva ni i Gidéôn!” 21 I ngéda i yosôna, hiki mut a bé a téé i homa wé, ba kéña liyééne, bisônda bi Madian gwobisôna bi ôt ngwéé,+ bi kenek bi londok. 22 I 300 bôt i, i kônde hem dioñ, ha nyen Yéhôva a bi boñ le bisônda bi Madian bi kahal nolna ni pansoñ mukété liyééne+ jap; bisônda bi Madian gwobisôna bi ke ngwéé letee ni i Bét-Sita, bebee ni Zéréra, ikepam i nwaa nkoñ u Abel-Méhôla+ bebee ni Tabat.

23 Ha nyen ba bi sébél bon ba Israel ba ba yé i Naftali, i Aser ni bôt ba Manasé+ bobasôna, ba kahal noñ bôt ba Madian. 24 Gidéôn a ep balegelnwin i mbok dikôa yosôna i Éfraim, a kal le: “Sôha inyu jôs bôt ba Madian, ni kéñ ki manjel ma ma nke i diléléba letee ni i Bét-Bara lôñni i Yordan.” Jon bôt ba Éfraim bobasôna ba bi kodba, ba kéñ manjel ma ma nke i diléléba letee ni i Bét-Bara lôñni i Yordan. 25 Ba gwel baane iba ba Madian, Ôreb bo Zéeb; ba nol Ôreb i liaa li Ôreb,+ ba nol Zéeb i waa wai u Zéeb. Ba kônde ki noñ bôt ba Madian,+ ba témbna ño u Ôreb ni ño u Zéeb, ba ti nwo Gidéôn i mbok Yordan.