Minson mi baôma

11 Baôma ni lôk kéé i i bé i Yudéa ba nok le yak bôt ba matén ba neebe bañga i Nyambe. 2 Jon i ngéda Pétrô a bi bet i Yérusalem, i bôt ba nit likwee+ ba bôdôl nye pééna,* 3 ba kal le: “U bi jôp i ndap i bôt ba ta bé nkweebaga, u je ki lôñni bo.” 4 Ha nyen Pétrô a tibil toñle bo i jam li bi tagbe, a kal le:

5 “Me bé soohe i tison Yôpé. Ikété yiinda, me tehe yom* kiki soso libadô, i lôlak i ngii, i sôhôk wengoñle ba gwé jo mu masuk mé mo ma-na, i sôs letee ni homa me bé.+ 6 Kiki me ntibil béñge mukété, me tehe binuga bi makôô ma-na bi hisi, binuga bi bikai, binuga* bi ñôdba ’isi, ni dinuni di ngii. 7 Me nok ki kiñ i nkal me le: ‘A Pétrô, telep, nol, u je!’ 8 Ndi me kal le: ‘To, a Nwet, inyule yom mahindi to yom nyega i ma jôp bé me i nyo.’ 9 Inyu ngélé i nyônôs iba, kiñ i lôl i ngii, i timbhe le: “I gwom Nyambe a mpubus, u sébél ha bañ gwo le ‘mahindi.’” 10 Hala a témb a bôña inyu ngélé i nyônôs aa; i mbus, gwom gwobisôna bi témb bi yôña i ngii. 11 I nlélém ngéda, bôt baa ba lo i ndap di bé yééne; ba bi ep bo i meeni, ba lôlak i Kaisaréa.+ 12 I mbus, mbuu u Nyambe u kal me le me kee lôñni bo ibabé pééna to ndék. Yak i lôk kéé isamal ini i ke lôñni me, ha nyen di jôp i ndap i mut nu.

13 “A añle bés lelaa a bi tehe añgel i téé i ndap yé, i kal le: ‘Ep bôt i Yôpé inyu sébél Simôn, nu ba nsébél ki le Pétrô,+ 14 a’ añle we lelaa we ni lihaa joñ jolisôna ni nla kôhna tohi.’ 15 Ndi i ngéda me bi bôdôl pot, mbuu mpubi u kwo i ngii yap nlélém kiki u bi kwo i ngii yés i bibôdle.+ 16 Ha nyen me hoñol bibañga bi Nwet i ngéda a bé kal le: ‘Yôhanes a bi sôble bé ni malép,+ ndi bé n’a sôblana ni mbuu mpubi.’+ 17 Jon, ibale Nyambe a bi ti bo nlélém likébla yañga, kiki a bi ti yak bés ba di bi hémle Nwet le Yésu Kristô, me njee me bé le me kéñ Nyambe njel?”+

18 I ngéda ba bi nok hala, ba waa pééna* ni Pétrô. Ba bégés Nyambe, ba kal le: “I yé toi ntiik le Nyambe a nti yak bôt ba matén hielñem i i nkena i niñ.”+

19 I bôt ba bi sanda+ i ngéda njiiha i bi bôdôl i mbus nyemb i Étien, ba ke letee ni i Fénikia, i Kiprô ni i Antiôkia, ndi Lôk Yuda yotama yon ba bé añle bañga i Nyambe.+ 20 Ndi bôt ba Kiprô ni ba Kiréné bahogi ba lo i Antiôkia, ba bôdôl kwel ni bôt ba mpot Grikia, ba añlak ñañ nlam u Nwet le Yésu. 21 Jam lipe ki, woo u Yéhôva* u bé lôñni bo, yak ngandak bôt i hielba inyu yila bahémle ba Nwet.+

22 Ñañ inyu yap u pam i likoda* li Yérusalem, ha nyen ba ep Barnabas+ letee ni i Antiôkia. 23 Kiki a mpam, a tehe lelaa Nyambe a nti banigil konangoo i mbuma ñañ, a kon maséé, a bôdôl ti bo makénd le ba kee ni bisu i nôgôl Nwet ni ñem wap wonsôna;+ 24 inyule Barnabas a bé loñge mut, a bak ki nyonok ni mbuu mpubi lôñni hémle. Inyu hala nyen limut li bôt likeñi li hémle Nwet.+ 25 Ha nyen a ke i yéñ Saulô homa nyensôna i Tarsô.+ 26 Kiki a ntehe nye, a lona nye i Antiôkia. Ba bi yén ngim nwii, ba kodbaga ni likoda, ba niigaga limut. I Antiôkia nyen inyu ngélé bisu, banigil ba bi kôhna jôl li nlôl ni Nyambe le Bikristen.+

27 Mu dilo di, bapôdôl+ ba nyodi i Yérusalem, ba lo i Antiôkia. 28 Wada wap nu ba nsébél le Agabô+ a telep, a pot mbañ ni ngui mbuu mpubi le njal ikeñi i yé bebee ni lo i nkoñ ’isi wonsôna;+ ni maliga, i bi lo i ngéda Klaudiô a bé énél. 29 Jon banigil ba bi yoñ makidik +le ba ga ômle lôk kéé i niñ i Yudéa mahôla,*+ hiki mut inoñnaga ni la yé; 30 hala ki nyen ba bi boñ, ba ômle mimañ mahôla ni njel* Barnabas bo Saulô.+