Bakéés

15 I mbus ndék ngéda, i dilo di libumbul li blé, Samsôn a ke i yuuga nwaa, a kena nye man kembee. A kal le: “Me nsômbôl jôp i tuñ* nwaa wem inyu tehe nye.” Ndi isañ nwaa a bi neebe bé le a jôp. 2 Isañ nwaa a kal nye le: “Me hoñlak le: ‘U ñoo nye.’+ Jon me nti nye mañge munlôm+ woñ wada. Manyañ nu muda nu mbus a yé nlam iloo nye. Soho, neebe nye.” 3 Ndi Samsôn a kal le: “Lini lisañ m’a bana bé nsohi inyu jam m’a boñ bôt ba Filistia.”

4 Samsôn a bi ke a gwel 300 ndon. A yoñ ngandak nwai, a yoñ ndon iba iba, a kañ nwel nwap, a ha nwai ha ñemkété. 5 I mbus, a kuye nwai, a nwas ndon le i kee ikété nwom mi blé mi bôt ba Filistia. Hala nyen a bi ligis gwom gwobisôna, mimbom mi blé, ni blé ba yé ngi bumbul, nwom mi minkôô mi wai ni nwom mi ôlivé.

6 Bôt ba Filistia ba bat le: “Njee a mboñ i jam lini?” Ba timbhe bo le: “Samsôn nu, nkil mut Timna, inyule a bi yoñ nwaa Samsôn, a ti nye mañge munlôm+ wada ikété boñge bôlôm ba ba bé ni nye.” Ha nyen bôt ba Filistia ba bi ke, ba ligis+ i muda nu bona isañ. 7 Samsôn a kal bo le: “Kiki ni mboñ hala, m’a yén bé nwee letee me pun memede.”+ 8 A nol bo wada i mbus wada,* bañga linolok; i mbus, a sôs, a yén i hôk liaa li Étam.

9 I mbus ngéda, bôt ba Filistia ba téé mintôñ nwap mi gwét i Yuda, ba sanda homa nyensôna i Léhi.+ 10 Bôt ba Yuda ba bat le: “Inyuki ni nlo i jôs bés?” Bôt ba Filistia ba timbhe le: “Di nlo i gwel* Samsôn inyu boñ nye kiki a bi boñ bés.” 11 Hala nyen 3 000 di bôt ba Yuda, di bi sôs i hôk liaa li Étam, ba kal Samsôn le: “U nyi le bôt ba Filistia bon ba ñane bés,+ inyuki u mboñ bés hala?” A kal bo le: “Me ntimbhe bo i jam ba mboñ me.” 12 Ndi ba timbhe nye le: “Di nlo i gwel* we le di ti we i moo ma bôt ba Filistia.” Samsôn a kal bo le: “Kuma soñ le bébomede n’a jôs bé me.” 13 Ba kal nye le: “To d’a kañ ndigi we, di nti bo we; ndi d’a nol bé we.”

Hala nyen ba bi kañ nye ni minkôô mi mondo ima, ba pémés nye ikété hôk liaa. 14 Kiki Samsôn a mpam i Léhi, bôt ba Filistia ba kahal lond ni maséé i ngéda ba bi tehe nye. Ha nyen mbuu u Yéhôva u bi ti nye ngui,+ i minkôô mi bé nye munu moo+ mi yila wengoñle minsiñga le hié hi nligis, mi kwo. 15 A tehe mañg u nlôm jagas nu a bi tip wo; a bada wo, a nol 1 000 hi bôt lôñni wo.+ 16 I mbus, Samsôn a kal le:

“Lôñni mañg u jagas, nwind wada, nwind ima!

Lôñni mañg u jagas, me nol 1 000 hi bôt.”+

17 Kiki a mal pot, a lep mañg u jagas, a sébél i homa nu le Ramat-Léhi.*+ 18 I mbus hala, nyus malép i bi gwel nye, a lôndôl Yéhôva, a kal le: “Wen u bi ti ngwélél woñ tohi ikeñi ini. Nano, baa w’a nwas le nyus malép i nol me, me kwo i moo ma bongikweeba?” 19 Ha nyen Nyambe a bi kan hisi ha i Léhi, malép ma pam.+ I ngéda Samsôn a bi nyo malép, a témbna ngui,* a bana ki makénd. Inyu hala nyen a bi sébél i homa nu le En-Hakôré,* a yé i Léhi letee ni len.

20 Samsôn a bi ba nkéés i Israel 20 ma nwii+ i dilo di bôt ba Filistia.