Kaat Korintô iba

12 Me nlama kadba. To hala kiki nseñ u ta bé i boñ hala, ndi m’a pôdôl biyiinda bi nlôl yak Nyambe+ ni masoola ma Nwet.+ 2 Me nyi mut wada nu a yé ikété adna ni Kristô; hala a yé 14 nwii le a bi yôña, a pam i ngii i nyônôs aa (me nyi bé too a bé ikété nyuu yé, too a bé bé ikété nyuu yé; Nyambe nyen a nyi). 3 Ñ, me nyi mut wada (me nyi bé too a bé ikété nyuu yé, too a bé bé ikété nyuu yé; Nyambe nyen a nyi) 4 nu a bi yôña, a pam i paradis, a nok bibañga le mut binam a nla bé pot, bi bi ta bé to mut binam kunde i pahal. 5 M’a kadba inyu ntén mut u, ndi m’a kadba bé inyu memede handugi inyu bibomb gwem. 6 Inyule to ibale me nsômbôl kadba, m’a ba bé jôñ mut, inyule m’a pot ndik maliga. Ndi me ntjél kadba, inyu boñ le mut to wada a hoñlene bañ me mam makeñi iloo ma a ntehe me me mboñ, tole ma a nôgôl i nyo wem, 7 ndik inyule me bi kôhna mintén mi masoola mini mi mbuma ñañ.

Ndi inyu boñ le me bédés bañ memede iloo hihéga, loo i bi tina me ikété minsôn,+ añgel i Satan, le i bép me mabai* hiki ngéda kayéle me bédés bañ memede iloo hihéga. 8 Me bi soohe Nwet ngélé aa inyu jam li, le i loo ini i nyodi me i nyuu. 9 Ndi a kal me le: “Konangoo yem i mbuma ñañ i kôli we, inyule ikété bomb yoñ nyen ngui yem i nene i nya i yôni.”+ Jon m’a ba maséé i kadba inyu bibomb gwem, kayéle ngui i Kristô i yééne i ngii yem kiki ndap libadô. 10 Jon me nkon maséé ikété bibomb gwem, ikété bisol, ikété njal, ikété ndééñga ni mandutu, inyu Kristô. Inyule i ngéda me yé ntombok, ha ni nyen me gwé ngui.+

11 Me mal yila jôñ mut. Ni nyégsa me i yila hala, inyule bé bon ni lamga bégés me. Inyule to hala kiki me ta bé to jam, me ntehe bé yom yo ki yo i i ñunda le me yé nuntitigi i bisu bi bôt ba nkadba le ba yé bañga baôma.+ 12 Ni maliga, bébomede ni bi tehe minson mi ñunda le me yé ñôma, ni njel biyimbne lôñni bihélha bi mam* ni mimpémba mi mam+ ikété ngandak hônba.+ 13 Inyule limbe jam li bi boñ le makoda mape ma loo bé, handugi le me bi yilna bé bé mbegee?+ Wee soho nwéhlana ni me ibale me bi boñ béba.

14 Nuna-ki! Hala a yé ngélé aa le me yé nkôôbaga i lo nyoo, ndi me ga yilna bé bé mbegee. Inyule nkus nan bé won me nyéñ,+ ndi bébomede; inyule bon+ bé bon ba nlama kôhle* inyu bagwal bap, ndi bagwal bon ba nlama kôhle inyu bon bap. 15 I pes yem, m’a sem mam momasôna ni ngandak maséé, me sem yak mensôna inyu nan.*+ Ibale me gwé i nya ngandak gwéha ini inyu nan, baa bé ni nlama ndik bana ndék gwéha inyu yem? 16 To i ba yaga lelaa, m’a yilna bé bé mbegee.+ Ndi to hala, ni nkal le me bi gwélél “likeñge,” me gwel ki bé “ni mandon.” 17 Ikété bôt me bi ômle bé, baa me bi gwélél wada mu inyu je bé nseñ? 18 Me bi ti Titô makénd i lo i bééni, me ep ki mankéé wada lôñni nye. Titô a bi je bé bé nseñ to ndék, hala bé?+ Di bi hiôm ni minlélém mi mahoñol,* hala bé? Di nôñôl ki i minlélém mi mabal, hala bé?

19 Baa ni nhoñol le di nyoñ i ngéda ini yosôna inyu kaaba i bisu binan? I bisu bi Nyambe nyen di yé i pot, ikété adna ni Kristô. Ndi a bagwéha, mam momasôna di mboñ ma yé inyu lédés bé. 20 Inyule me nkon woñi le i ngéda me nlo, me koba bé bé kiki me nsômbôl, to me me ba bé kiki ni nsômbôl, ndi me koba momol ipôla nan, ni njôñ, ni minyayak, ni mindañ, ni minsoga, ni minhuñbe,* ni bak nyonok ni ngôk, ni yubda. 21 Bebek le i ngéda me ntémb me loo, Nyambe wem a nla suhus me i bisu binan, y’a béda ki le me ee inyu ngandak ikété nan i i bi bôk i boñ béba, ndi i tam bé mam map ma nyega lôñni malal ma nyega,* ni maboñok mabe ngi wonyuu* ba bééna lem i boñ.