Kaat Kôlôsé

1 Me Paul, ñôma nu Kristô Yésu ni njel sômbôl i Nyambe, ni Timôtéô+ mankéé wés, 2 di ntilna bapubhaga ni lôk kéé i Kôlôsé i i ntéñbe ikété adna ni Kristô:

Konangoo i mbuma ñañ ni nsañ bi nlôl yak Nyambe Tata wés bi ba lôñni bé.

3 Di nti Nyambe mayéga, Isañ Nwet wés Yésu Kristô, ngéda yosôna di nsoohe inyu nan, 4 hala kiki di bi nok inyu hémle ni nhémle Kristô Yésu ni inyu gwéha ni gwé inyu bapubhaga bobasôna, 5 inyu botñem Nyambe a bi téédana bé nyoo ngii.+ Ni bi bôk ni nok i botñem ini ni njel nwin u maliga u ñañ nlam 6 u u bi pam i bééni. Ndik kiki ñañ nlam u yé num matam, u ntjama* ki ikété nkoñ ’isi wonsôna;+ hala nyen u yé ki i boñ i bééni ibôdôl i kel ni bi nok, ni tibil ki yi konangoo i mbuma ñañ i Nyambe ikété maliga. 7 I jam lini jon ni bi nigil yak so nkol wés nugwéha le Épafras,+ nu a yé ki mut hémle ni ngwélél Kristô inyu yés. 8 Nye ki nyen a bi yis bés gwéha nan i pes mbuu.*

9 Inyu hala ki nyen, ibôdôl i kel di bi nok i mam mana, kekikel di nwaa bé soohe inyu nan,+ di badak le ni ba nyonok ni bañga yi+ i sômbôl yé lôñni bañga pék ni nogna i mam ma mbuu,+ 10 inyu boñ le ni boñ mam* i nya i kôli ni Yéhôva* le ndi ni lémél nye i nya i yôni, ni kenek ni bisu i num matam ikété hiki loñge nson, ni holok ikété bañga yi i Nyambe;+ 11 ni le ni kôhna ngui lôñni lipémba jolisôna inoñnaga ni lipém li ngui yé, le ndi+ ni pam i hônba i nya i yôni lôñni wongut ni maséé, 12 ni tinak Tata mayéga, nu a bi boñ le ni ba bôt ba kôli bana ngaba mu bum i bapubhaga+ ba ba yé ikété mapubi.

13 A bi tohol bés isi ane jiibe,+ a jubus bés ikété ane i Man wé nu gwéha; 14 inyu yé nyen di gwé kobla ni njel binoñ, nwéhél i bibéba gwés.+ 15 A yé pôna i Nyambe nu a nene bé,+ mbôkgwéé ikété bihégél gwobisôna;+ 16 inyule ni njel yé nyen mana mam mape momasôna ma bi héga i ngii ni hana ’isi, mam ma nene ni mam ma nene bé,+ to i ba yaga biyééne bi ane, to baane, to bangomin, to baénél. Mam mape momasôna ma bi héga ni njel yé,+ ma héga ki inyu yé. 17 Jam lipe ki, a bé niñ ilole mana mam mape momasôna ma mba,+ lôñni njel yé ki nyen mam mape momasôna ma bi héga, 18 a yé ño u nyuu, hala wee likoda;+ a yé bibôdle, mbôkgwéé ikété bawoga,+ le ndi a yila nu bisu ikété mam momasôna; 19 inyule hala a bi lémél Nyambe i boñ le a ba nyonok ni mam momasôna,*+ 20 ni njel yé nyen Nyambe nyemede a nsañgla ni mana mam mape momasôna,+ to mam ma yé ’isi, to mam ma yé i ngii, hala kiki a bi lona nsañ ni njel matjél+ a bi kôp i kék njiiha.*

21 Ni maliga, bé ba ni bé mbaglaga, ni bak baoo inyule ni bé hoñol minson mimbe, 22 nano Nyambe nyemede a mal sañgla lôñni bé ni njel nyuu minsôn i nu a bi wo, le ndi a téé bé i bisu gwé, ni bak bapubhaga, ngi mahindi mo ki mo, ni tinak bé to pôla le ba ôm bé nsohi,+ 23 ibale ni ntéñbe ni hémle,+ ni bak ni umi siñ siñ i ngii hikuu,+ ibabé i piñgla,+ to ke haa ni botñem i ñañ nlam ni bi nok, u ba bi añle bihégél gwobisôna hana nkoñ ’isi.+ Inyu ñañ nlam u nyen me Paul, me bi yila ngwélél.+

24 Nano me nkon maséé ni mandutu mem inyu nan,+ ndi me nôgda le me yé ngi kôhna njiiha i Kristô i nya i yôni munu minsôn nwem.+ I njiiha ini y’a ba loñge inyu nyuu Kristô, hala wee likoda.+ 25 Me bi yila ngwélél nu likoda lini inoñnaga ni nson kindak+ Nyambe a bi ti me, le me añal bañga i Nyambe i nya i yôni, 26 yon i yé jimb lipubi+ li li bé li sôli ibôdôl i tjai*+ di kôba ni ibôdôl i mangéda ma kôba. Ndi nano, li nyeli inyu bapubhaga bé bobasôna;+ 27 ikété biloñ gwobisôna, i bi lémél Nyambe i yis bo lipém li lingwañ li jimb lipubi lini, li li yé Kristô ikété adna ni bé;+ hala wee ni gwé botñem i kôhna lipém lôñni nye.+ 28 Nyen di ñañal, di béhge hiki mut, di niigaga ki hiki mut ni pék yosôna, le ndi di pam i hôla hiki mut nu a yé ikété adna ni Kristô i ba nhôôlak* ni i unda nye Nyambe.+ 29 Inyu hala yaga nyen me ntumbba ni nson, me boñok biliya ni ngui yé i i nsal ikété yem ni lipémba.+