Yérémia

29 I bibañga bini gwon bi yé ikété kaat mpôdôl Yérémia, nu a yé i Yérusalem; i kaat a bi ômle mimañ mi litén mi mi bi ke i minkôm, yak ni biprisi, bapôdôl ni bôt ba litén bobasôna Nébukadnézar a bi gwel i Yérusalem, a kena i minkôm i Babilôn. 2 A bi om yo i ngéda Yékônia+ a bé a ma nyodi i Yérusalem, ni nyañ kiñe,*+ ni bôt ba ngomin ba ndap kiñe, ni baane ba Yuda ni ba Yérusalem,+ ni bôt ba nyi bôlô lôñni baôô bikei.* 3 Élasa man Safan,+ ni Gémaria man Hilkia bon ba bi kena i kaat i. Sédékia,+ kiñe Yuda, a bi om i bôt ba bo iba i Babilôn yak Nébukadnézar, kiñe Babilôn. Kaat i bé kal le:

4 “Haana nyen Yéhôva nu mintôñ mi gwét, Nyambe nu Israel, a nkal bôt ba litén bobasôna, ba me bi boñ le ba nyodi i Yérusalem inyu ke i minkôm i Babilôn: 5 ‘Oña mandap ni yén ki mu, sala nwom, ni je ki matam map. 6 Biina bôda, ni gwal ki bon bôlôm ni bon bôda; yôñlana bon banan bôda, ni ti ki bingond binan i mabii, le yak bo ba bana bon bôlôm ni bon bôda. Ni bôl, ndi nsoñgi nan u sôs bañ. 7 Yéña le tison i het me bi om bé i minkôm i ba ikété nsañ, soohana Yéhôva inyu tison i, inyule ibale tison i i yé ikété nsañ, yak bé n’a ba ikété nsañ.+ 8 Inyule Yéhôva nu mintôñ mi gwét, Nyambe nu Israel, a nkal le: “Ni nwas bañ le bapôdôl banan ni bôt banan ba ngambi ba teembene bé,+ ni emble bañ to bieem gwap ba ñemel. 9 Inyule ‘bitembee gwon ba yé i añle bé i jôl jem, me ñom bé me bo,’+ hala nyen Yéhôva a mpot.”’”

10 “Inyule haana nyen Yéhôva a mpot: ‘I ngéda 70 ma nwii ma ga kola, me ga yoñ ngéda ni bé,+ me yônôs mbônga wem, me témbna bé hana homa nunu.’+

11 “Yéhôva a mpot le: ‘Inyule me nyi mahoñol me gwééne bé, me nsômbôl lona bé nsañ, he kogse bé,+ inyu boñ le dilo di nlo di ba loñge inyu nan, ni bana ki botñem.+ 12 N’a sébél me, n’a soohe ki me, yak me m’a emble.’+

13 “‘N’a yéñ me, ni léba ki me,+ inyule n’a yéñ me ni ñem nan wonsôna.+ 14 Me ga nwas le ni léba me,’+ hala nyen Yéhôva a mpot. ‘Me ga témbna bôt banan ba ba yé i minkôm, me kot bé nyoo i biloñ gwobisôna ni i bahoma me bi sand bé,+ me témbna ki bé,’ hala nyen Yéhôva a mpot. ‘Me ga témbna bé i homa me bi hééna bé ilole ni bé ke i minkôm.’+

15 “Ndi ni bi kal le: ‘Yéhôva a nti bés bapôdôl i Babilôn.’

16 “Inyule haana nyen Yéhôva a mpot inyu kiñe i i yii i yééne ane i David+ ni inyu bôt bobasôna ba nyééne i Yérusalem, lôkisoñ nan i i bi ke bé i minkôm lôñni bé: 17 ‘Yéhôva nu mintôñ mi gwét a nkal le: “Me yé i ômle bo pansoñ, njal ni himala;*+ me ga yilha bo kiki matam ma faigé ma ma mbol,* ma ma yé mabe kayéle mut nye ki nye a nla bé je mo.”’+

18 “‘Me ga noñ bo ni pansoñ,+ njal ni himala; me ga boñ le biane bi nkoñ ’isi+ gwobisôna bi kon woñi i ngéda bi ga tehe i ndutu i ga pémél bo. Nyoo i biloñ gwobisôna i het me ga sand bo,+ bôt ba ga sima bo i ngéda ba ntiihe, bôt ba ga hel i ngéda ba ga tehe bo, ba ndeglege bo, ba yanak bo;+ 19 inyule ba bi emble bé bibañga me bi legel bo ni njel bagwélél bem le bapôdôl,’ hala nyen Yéhôva a mpot, ‘me omok, me tiimbaga.’*+

“‘Ndi ni bi nôgôl bé,’+ hala nyen Yéhôva a mpot.

20 “Inyu hala nyen, emblana bibañga bi Yéhôva, a bé bobasôna ba ni yé i minkôm, a bé ba me bi nyodna i Yérusalem, me kena i Babilôn. 21 Haana nyen Yéhôva nu mintôñ mi gwét, Nyambe nu Israel, a mpot inyu Ahab man Kôlaya, ni inyu Sédékia man Maaséya, ba ba mpot bitembee i jôl jem:+ ‘Me ga sem bo i moo ma Nébukadnézar,* kiñe Babilôn; a ga nol bo i bisu binan. 22 I jam li ga pémél bo li ga yila ndiihe i manyo ma bôt ba Yuda bobasôna ba ba yé i minkôm i Babilôn: “Yéhôva a nyilha we kiki Sédékia ni kiki Ahab, bôt kiñe Babilôn i bi bôm i juu!” 23 Inyule ba mboñ mam ma nwéhna nyuu i Israel,+ ba bi ke i ndéñg ni baa ba bôt bap ba libôk, ba pot ki bitembee i jôl jem ndi ki le me bi om bé me bo.+

“‘“Me nyi i jam ba bi boñ, me yé ki mbôgi,”+ hala nyen Yéhôva a mpot.’”

24 “Kal Sémaya,+ mut Néhélam, le: 25 ‘Yéhôva nu mintôñ mi gwét, Nyambe nu Israel, a nkal le: “U bi ômle i bôt bobasôna ba yé i Yérusalem bikaat i jôl joñ, u ômle yak prisi le Sôfônia+ man Maaséya, yak ni biprisi gwobisôna bikaat. Bikaat bi bé kal le: 26 ‘Yéhôva a ntéé we prisi le u yoñ tel i prisi Yéhôyada, inyu boñ le u yila mbéñge nson u témpel Yéhôva. Ibale mut njék a mbôdôl boñ kiki mpôdôl, wen u kôli ha nye dikéñ ni minsañ mi bikei i joo.+ 27 Inyuki u nkogse bé Yérémia, mut Anatôt,+ nu a mboñ kiki mpôdôl i bisu binan?+ 28 Inyule a bi ômle yak bés nwin i Babilôn le: “Ni ga nom nyoo ntandaa ngéda! Oña mandap, ni yééne ki mu. Sala nwom, ni je ki matam.”’”’”*+

29 I ngéda prisi le Sôfônia+ a bi añ i kaat ini i bisu bi mpôdôl Yérémia, 30 Yéhôva a pôdôs Yérémia, a kal nye le: 31 “Ômle bôt ba litén bobasôna ba ba yé minkôm nwin le: ‘Haana nyen Yéhôva a mpot inyu Sémaya, mut Néhélam: “Hala kiki Sémaya a ñañle bé mam, ndi ki le me ñom bé me nye, a ngwés ki boñ le ni hémle bitembee,+ 32 jon Yéhôva a nkal le: ‘Me yé i yoñ ngéda ni Sémaya, mut Néhélam, yak ni mbôda yé. Mut wé lihaa to wada a ga pei bé munu litén lini, a ga tehe bé to i loñge me ga bôñôl litén jem,’ hala nyen Yéhôva a mpot, ‘inyule a ntinde bôt i ndogbene Yéhôva.’”’”