Kaat Korintô iba

1 Me Paul, ñôma nu Kristô inoñnaga ni sômbôl i Nyambe, lôñni Timôtéô+ mankéé wés, me ntilna likoda li Nyambe li li yé i Korintô, yak ni bapubhaga bobasôna ba ba yé i Akaya yosôna:+

2 Konangoo i mbuma ñañ ni nsañ bi nlôl yak Nyambe Tata wés lôñni Nwet le Yésu Kristô bi ba ni bé.

3 Bibégés bi ba ni Nyambe ni Isañ Nwet wés Yésu Kristô,+ Tata nu a yôni ni konangoo,+ ni Nyambe nu hogbe yosôna,+ 4 nu a nti bés hogbe* ikété manoodana* més momasôna,+ kayéle di pam i ti bôt bape+ hogbe ikété to mambe manoodana* ni njel hogbe Nyambe a nti bés.+ 5 Inyule nlélém kiki mandutu més inyu Kristô ma mbôl,+ hala ki nyen yak hogbe di nkôhna ni njel Kristô i mbôl. 6 Ndi to di mboma manoodana,* hala a yé inyu ti bé hogbe ni tohi; to ibale di nkôhna hogbe, hala a yé inyu ti bé hogbe i i nhôla bé i hônba minlélém mi mandutu yak bés di nkôhna. 7 Yak botñem yés inyu nan i mpiñgla bé, di yik le ndik kiki ni nok ndutu kiki bés, hala nyen n’a kôhna ki hogbe kiki bés.+

8 Inyule, a lôk kéé, di ngwés bé sôô bé i njiiha di bi kôhna i pes mbok Asia.+ Di bi nok ndutu iloo hihéga, ndutu i nloo yak ngui yés bésbomede, kayéle di bé kon woñi ngandak yak inyu biniñ gwés.+ 9 Ni maliga, di bi nôgda le di bi kôhna mbagi nyemb. Hala a bé inyu boñ le di bôdôl bañ bésbomede ñem, ndik Nyambe+ nu a ntugul bawoga. 10 A bi sôñ bés le di pei béba nyemb ini, a ga sôñ ki bés; nye ki nyen di mbôdôl ñem le a’ ke ni bisu i sôñ bés.+ 11 Yak bé ni nla hôla bés ni njel minyemhe minan inyu yés,+ inyule ibale ngandak bôt i nsoohe* inyu yés,+ Nyambe a ñemble, a hôla ki bés; inyu hala, ngandak bôt y’a ti ki mayéga inyu yés.

12 Inyu jam lini nyen di nkônôl maséé,* le kiññem yés i mbok mbôgi le di niñ munu nkoñ ’isi, ndi téntén ipôla nan, ni libak lipubhaga lôñni ñem maliga Nyambe a nti, ha ni pék i bôt ba binam bé,*+ ndi ni konangoo i mbuma ñañ i Nyambe. 13 Inyule di ta yaga bé i tilna bé mam mape handugi i mam ni nla añ,* ni nogok ki; me gwé ki botñem le n’a kônde nok i mam mana i nya i yôni,* 14 hala yaga kiki ni bi nok i ngim likala le ni gwé manjom i kônôl bés maséé,* kiki yak bés d’a bana manjôm i kônôl bé maséé i hilo hi Nwet wés Yésu.

15 Ni ini botñem nyen me bé gwés le me loo ndugi i bééni, kayéle ni kon maséé inyu ngélé i nyônôs iba;* 16 inyule me ban-ga ngôñ i yuuga bé i ngéda me mba me nke i Makédônia, ni i ngéda me mba me nlôl i Makédônia, inyu boñ le ni yéga me mu njel i ngéda me mba me nke i Yudéa.+ 17 Ndi i ngéda me bééna hala i mahoñol, me bi yoñ bé i jam li kiki yañga jam, hala bé? Tole, baa me bi hoñol i boñ hala ni litehge li mut binam,* kayéle me nkal le: “Ñ, ñ;” ndi i mbus, me kal le: “To, to”? 18 Ndi di nla bôdôl Nyambe ñem munu jam lini le, i mam di bi kal bé ma ta bé “ñ,” nlélém ngéda ma bak “to.” 19 Inyule Yésu Kristô, Man Nyambe nu di bi añal ipôla nan, hala wee me ni Silvanô* lôñni Timôtéô,+ “ñ” wé a bi yila bé “to,” ndi “ñ” wé a yé ndik “ñ.” 20 Inyule to ibale mimbônga mi Nyambe mi yé ngandak lelaa, nwominsôna mi bi yila “ñ” ni njel yé.+ Jon ni njel yé ki nyen di nkal Nyambe le “Amen”,+ le ndi Nyambe a kôhna lipém ni njel yés. 21 Ndi Nyambe nyen a mbogye* le bé ni bés di yé ba Kristô, nye ki nyen a bi yilha bés minhook.+ 22 A bi ha ki béndél yé i ngii yés,+ a ti ki bés bibep bi mam ma nlama lo* ikété miñem nwés, hala wee mbuu mpubi.+

23 Nano me nkum soñ ni niñ yem, Nyambe a bak me mbôgi, le inyu sôñ bé nyen me yé ngi lo i Korintô. 24 Hala a ngwés bé kal le di ñane hémle nan,+ ndi di yé baso bagwelnson inyu maséé manan, inyule ni njel hémle nan nyen ni téé.